Joshuwa 13 - Bhukhu la Kuyamba

Dziko likhafunika kutolewa

¹ Tsapano Joshuwa akhadakalamba kwene-kwene, Chawuta adati kwayiye, “Iwe wakula, kwene-kwene koma pana mbuto yasala infunika kutolewa.

² Ili ndilo dziko lidasala mundime yentse yaa Filisitiya nadziko lentse la Geshuri.

³ Kuchoka pakamadzi ka Shihori chakumabveladzuwa kwa Ijipiti, mpaka kumalile yachakudzulu kwamalile ya Ekironi. Mbuto imweyi ikhadziwika kuti niyaa Kenani, likhatongewa namazimambo mashanu yachi Filisitiya, waku Gaza, waku Ashidhodhi, waku Ashikeloni, waku Gati, waku Ekiloni naawo waa Avimu,

⁴ akhakhala chakunyantsi kwadziko lentse laa Kenani, na Meyara guta laa Sidhoni kufika ku Afeki kumalile yaa Amori,

⁵ nadziko laa Gebhali nadziko lentse la Lebhanoni chakumabveladzuwa, kuchoka pa Bhaali-gadhi munyantsi mwaphili la Herimoni Lebho kufika pampata wa Hamati,

⁶ nawanthu wentse akhakhala mudziko lamapili, kuyambila ku Lebhanoni kufika ku Misirepoti-mayimu, nadziko lentse laa Sidhoni. Ine nin'zathamangisila wana wa Izraeli wanthu amwewo, nin'zapasa a Izraeli dziko limwelo kuti likhale nthaka yawo, kuteyeza bzandidakuwuzani.

⁷ Nakutenepo gawa dziko limweli kumishowo pfemba nakati-nakati yanshowo wa Manase, kuti ikhale nthaka yawo.”

Kugawiwa kwadziko lakumabveladzuwa kwa Jorodhani

⁸ Nshowo wa Rubheni na Gadhi nakati-nakati yanshowo wa Manase akhadapasiwa kale nthaka yawo na Mozisi kung'ambu kwa Jorodhani chakumabveladzuwa, mbuto ile yaadapasiwa na Mozisi mulanda wa Chawuta.

⁹ Kuyambila ku Aroyeri kumphepete kwachigowa cha Arinoni, naguta lili pakati padambo, namadziko yentse yam'madambo ya Medhebha mpaka ku Dhibhoni,

¹⁰ namaguta yentse ya Sihoni mambo waa Amori, uyo akhatonga mu Heshibhoni, kufika kumalile yawanthu wa Amoni.

¹¹ Kuphatanizila pomwe dziko la Giliyadhi, nazinango ndime za Geshuri na Maaka naphili lentse la Herimoni, nadziko lentse la Bhashani mpaka ku Saleka,

¹² nadziko lentse lamambo Ogi ku Bhashani, ule akhatonga mu Ashitaroti namu Edhireyi. Ndiye yekha adasala mu Refayimu, awa adakundiwa achithamangisiwa na Mozisi.

¹³ Koma wanthu wa Izraeli alibe kuthamangisa wanthu wa Geshuri panango wa Maaka, a Geshuri naa Maakati akukhala naa Izraeli nalelo.

¹⁴ Nshowo waa Levi ndiwo ulibe kupasiwa nthaka na Mozisi, iye adati kwayiwo, ntsembe zakutentha namoto zimpelekewa kwa Chawuta Mulungu wa Izraeli ndiyo nthaka yawo.

Dziko lidapasiwa Rubheni

¹⁵ Mozisi adapeleka nthaka yadziko kunshowo kwawana wa Rubheni kuteyeza mabanja yawo.

¹⁶ Nakutenepo dziko lawo likhayambila pa Aroyeri, kumphepete kwachigowa cha Arinoni, naguta lili pakati pachigowa nam'madambo mwa Medhebha,

¹⁷ na Heshibhoni namaguta yentse yam'madambo yaniti, Dhibhoni na Bhamoti-bhaali na Bheti-bhaali-meyoni

¹⁸ na Jahazi na Kedhemoti na Mefayati

¹⁹ na Kiriyatayimu na Sibhuma na Zereti-shahari paphili lili muchigowa

²⁰ na Bheti-peyori napamatelo yapaphili lapa Pisiga napa Bheti-jeshimoti.

²¹ Kulewa kuti maguta yentse yam'buwa nadziko lentse la Sihoni mambo waa Amori, adatonga mu Heshibhoni. Awa pabodzi naakulu-akulu waa Midhiyani adakundiwa na Mozisi, Evi na Rekemu na Zuri na Huri na Rebha, aya yakhali manduna ya Sihoni akhakhala mudziko limwelo.

²² Wanthu wa Izraeli adaphambo Bhalamu mwana wachimuna wa Bheyori uyo akhachita bzakuwombeza, adaphewa namabhemba pabodzi naanango wentse adaphewa.

²³ Kamadzi ka Jorodhani ndiyo yakhali malile yawanthu wanshowo wa Rubheni. Iyi ndiyo ikhali nthaka yawanthu wa Rubheni, kuteyeza mabanja yawo namaguta yawo namiyi yawo.

Dziko lidapasiwa Gadhi

²⁴ Mozisi adapasa nthaka yadziko kwawana wa Gadhi kuteyeza mabanja yawo.

²⁵ Dziko lawo likhali Jazeri, namaguta yentse ya Giliyadhi, nakati-nakati yadziko lawana wa Amoni kufika ku Aroyeri, kumabveladzuwa kwa Rabha.

²⁶ Kuyambila pa Heshibhoni kufika ku Ramati-mizipa naku Bhetonimu, yachiyambila pomwe pa Mahanayimu mpaka kudziko la Dhebhiri,

²⁷ yachilungama kuchigowa chaku Bheti-haramu naku Bheti-nimura naku Sukoti naku Zafoni, nadziko lentse la Sihoni mambo waku Heshibhoni. Kamadzi ka Jorodhani ndiyo yakhali malile yawo yakumabveladzuwa, kufika kugombe kwanyanja ya Galileya, chakumabveladzuwa kung'ambu kwa Jorodhani.

²⁸ Iyi ndiyo nthaka yawana wa Gadhi, kuteyeza mabanja yawo namaguta yawo namiyi yawo.

Dziko lidapasiwa Manase chakumabveladzuwa

²⁹ Mozisi adapasa nthaka kati nakati yawana wa Manase, idagawiliwa kwakati nakati yanshowo wa Manase kuteyeza mabanja yawo.

³⁰ Dziko lawo likhayambila pa Mahanayimu, nadziko lentse la Bhashani, nawumambo wentse wa Ogi mambo waku Bhashani, namiyi yentse ya Jayiri ili mu Bhashani, namaguta makumi matanthatu,

³¹ nakati-nakati yadziko la Giliyadhi na Ashitaroti na Edhireyi, namaguta yamambo Ogi waku Bhashani. Dziko limweli lidapasiwa wanthu wa Makiri mwana wa Manase kuteyeza mabanja yawo.

³² Uku ndiko kugawa kwaadachita Mozisi nthaka yadziko, mudambo la Moabhi kung'ambu kwa Jorodhani kumabveladzuwa kwa Jeriko.

³³ Koma Mozisi alibe kupasa nthaka yadziko nshowo waa Levi. Iye adati, Chawuta Mulungu wa Izraeli ndiyo nthaka yawo.