Joshuwa 10 - Bhukhu la Kuyamba

Kukundiwa kwaa Amori

¹ Adhoni-zedheki mambo wa Jerusalema, adabva kuti Joshuwa adapamba guta la Ayi achiliphwanya, achipha mambo wam'mwemo, bzaadachita ku Jeriko namambo walene. Adabva pomwe kuti wanthu waku Gibheyoni adayanjana naa Izraeli achitokhala pakati pawo.

² Adhoni-zedheki nawanthu wake adabva mantha, pakuti Gibheyoni ikhali guta likulu kuchita ninga guta likhana mambo kuposa guta la Ayi nawanthu walene wamphamvu.

³ Nakutenepo Adhoni-zedheki mambo wa Jerusalema adatuma atumiki kwa Hohamu mambo waku Hebhuroni na Piramu mambo waku Jarimuti na Jafiya mambo waku Lakishi na Dhebhiri mambo waku Egiloni, iye adati,

⁴ “Bwelani muzandithandize kumenya guta la Gibheyoni, pakuti layanjana na Joshuwa nawana wa Izraeli.”

⁵ Pamwepo mazimambo mashanu yaa Amori, mambo wa Jerusalema, mambo wa Hebhuroni, mambo wa Jarimuti, mambo wa Lakishi, namambo waku Egiloni adakocheza wankhondo wawo, nkuzika matenti adanyanganana naguta la Gibheyoni achimenyana nalo.

⁶ Wanthu wa Gibheyoni adatuma atumiki kwa Joshuwa paakhadazika nsasa wawo pa Giligali adati, “Mambo, lekani kutilekelela ise alanda wanu. Kulumizani, bwelani muzatithandize mutichize, pakuti mazimambo yentse yaa Amori an'khala mudziko lamapili akochezana kuti azatimenye.”

⁷ Nakutenepo Joshuwa naanyankhondo wake wentse, naanyankhondo wamphamvu adachoka pa Giligali.

⁸ Chawuta adati kwa Joshuwa, “Leka kuwagopa pakuti ndaayikha kale m'manja mwako, palibe ne m'bodzi wawo ankakwanisa kuyimisana nayiwe.”

⁹ Joshuwa naanyankhondo wake adafamba usiku wentse kuchoka ku Giligali, achiyenda ku Gibheyoni kwaadakafikila a Amori mwadzidzimu.

¹⁰ Chawuta adazungayilisa anyankhondo waa Amori. Wanthu wa Izraeli adapha wanthu azinji kwene-kwene waa Amori pa Gibheyoni. Wanthu wa Izraeli adaathamangisa nanjila yapampata wapa Bheti-horoni, adaapha mpaka ku Azeka naku Makedha.

¹¹ Wanthu wachi Amori paakhathawa a Izraeli, nanjila yakumatelo ya Bheti-horoni, Chawuta adagwesa minyala kuchoka kudzulu, mpaka pa Azeka, iwo adafa. Matalala yadapha wanthu azinji, wanthu adafa namvula yamatalala akhadawanda kupita wanthu adaphewa naa Izraeli namabhemba.

¹² Pamwepo Joshuwa adalewa-lewa na Chawuta, pantsiku Chawuta yaadayikha a Amori m'manja mwawana wa Izraeli, adabzilewa pamaso paa Izraeli, iye adati, “Dzuwa, yima pa Gibheyoni Mwezi, yima muchigowa cha Ayijaloni.”

¹³ Dzuwa lidayima, mwezi udayimambo, kufikila wanthu wa Izraeli abwezelambo kwaazondi wawo. Ko ibzi sibzidanembewa mu Bhukhu la Jashari? Dzuwa lidayima pakati pakudzulu, lilibe kukulumiza kudoka kwantsiku yentse.

¹⁴ Kulibe kumbachitikako ntsiku yakutenepo chikhalilo, panango kumbuyoko, Chawuta kutetekela munthu. Chawuta ntsiku imweyi adamenyela nkhondo a Izraeli!

¹⁵ Pamwepo Joshuwa naa Izraeli wentse waakhanawo adabwelela kunsasa wawo pa Giligali.

Joshuwa am'phata mazimambo mashanu yaa Amori

¹⁶ Mazimambo mashanu yaa Amori adathawa, adakabisala mphako yapa Makedha.

¹⁷ Joshuwa adawuziwa kuti, “Mazimambo mashanu yawoneka yadabisala mphako yapa Makedha.”

¹⁸ Joshuwa adati, “Kungulusani minyala mikulu, mufunge mulomo wamphakoyo, musankhule wanthu wakukhaliliza pamwepo.

¹⁹ Koma imwe lekani kukhala pamwepo, pitilizani kuteyela azondi wanu, afikileni nachakumbuyo. Lekani kuwalekelela achipita mumaguta yawo. Chawuta Mulungu wanu waayikha kale m'manja mwanu.”

²⁰ Nakutenepo Joshuwa pabodzi nawana wa Izraeli waakhanawo paadamala kuwapha bzakuwamalizilatu wentse, ang'ono-ng'ono adasala adakathawila m'maguta yakuchinjiliziwa,

²¹ wanthu wentse adabwelela kwa Joshuwa kunsasa wa Makedha mwan'delekho. Palibe ne m'bodzi bzake pawanthu wamudziko adasumusa lilimi nabzawana wa Izraeli.

²² Pamwepo Joshuwa adati, “Fungulani mulomo wamphako mubulise mazimambo yale mashanu muwabwelese kwayine.”

²³ Nakutenepo iwo adabulisa mazimambo mashanuyo mphako, mambo waku Jerusalema, waku Hebhuroni, waku Jarimuti waku Lakishi nawaku Egiloni, achiwayendesa kwa Joshuwa.

²⁴ Paadabulisa mazimamboyo adaayendesa kwa Joshuwa. Joshuwa adachemela a Izraeli wentse, adati kumanduna yawanthu wankhondo waakhadayenda nawo, “Fikani pafupi, muponde makhosi yamazimambo aya nanzayo zanu.” Pamwepo iwo adafika pafupi nkuponda minyendo yawo pamakhosi yamazimambo yale.

²⁵ Joshuwa adati, “Lekani kugopa, panango kushupika, khalani wamphamvu mulimbe, pakuti Chawuta an'zachita tenepo kwaazondi wanu wentse wamum'menyana nawo.”

²⁶ Pamwepo Joshuwa adapha mazimambo yentse mashanu, achiwamangilila pamiti mishanu. Adaamangilila pamiti mpaka, kumawulo.

²⁷ Koma panthawe yakunyula kwadzuwa, Joshuwa adawuza wanthu kuti abuluse mathupi yawo pamitipo, achikayathusa m'mphako mwaakhadabisala. Adayikha minyala mikulu pamulomo wamphakoyo, nalelo minyalayo ilipo pamwepo.

Joshuwa adapamba madziko mazinji yaa Amori

²⁸ Ntsiku imweyo Joshuwa adatola guta la Makedha, adapha mambo walene namulomo wabhemba, palibe ne m'bodzi adasala. Adaphelatu wanthu wentse akhali m'mwemo, palibe ne m'bodzi adathawa. Bzaadachita kwamambo waku Makedha ndibzo bzaadachita kwamambo waku Jeriko.

²⁹ Pamwepo Joshuwa naa Izraeli wentse waakhanawo adachoka pa Makedha, nkuyenda ku Libhina kwaadakamenya gutalo.

³⁰ Chawuta adayikha guta limwelo namambo walene m'manja mwaa Izraeli. A Izraeli adapha wanthu wentse namulomo wabhemba palibe ne m'bodzi adasala muguta limwelo, adachita bzibodzi-bodzi kwamambo walene, ninga bzaadachita kwamambo wa Jeriko.

³¹ Joshuwa naa Izraeli wentse waakhanawo adachoka ku Libhina nkuyenda kazika matenti yawo kuguta la Lakishi, adalizungunuka achilimenya.

³² Chawuta adayikha guta la Lakishi m'manja mwaa Izraeli. Joshuwa adatola gutalo pantsiku yachiwili, adapha wanthu wentse akhali m'mwemo namulomo wabhemba, bzaadachita kuguta la Libhina.

³³ Pamwepo Horamu mambo wa Gezeri adabwela kuzathandiza wanthu waku Lakishi, koma Joshuwa adamupha pabodzi nawankhondo wake, palibe ne m'bodzi adasala.

³⁴ Joshuwa naa Izraeli wentse waakhanawo adachoka ku Lakishi nkuyenda kuguta laku Egiloni, kwaadakazika matenti yawo achilimenya.

³⁵ Guta limwelo adalitola ntsiku imweyo, adapha wanthu wentse akhali m'mwemo namulomo wabhemba, bzaadachita kuguta la Lakishi.

³⁶ Joshuwa naa Izraeli wentse waakhanawo adachoka ku Egiloni, nkuyenda kuguta la Hebhuroni, achikalimenya.

³⁷ Adalipamba, achilimenya namulomo wabhemba, achipha wanthu wentse wam'mwemo pabodzi namambo walene namiyi yalene, palibe ne m'bodzi wawo adasalamo, bzaadachita guta la Egiloni, kwaadapha wanthu wentse akhali m'mwemo.

³⁸ Pamwepo Joshuwa naa Izraeli wentse waakhanawo adabwelela kuguta la Dhebhiri, kwaadakamenya gutalo.

³⁹ Iye adalipamba namambo walene namaguta yayene yentse, adapha wanthu wentse akhali m'mwemo namulomo wabhemba, palibe ne m'bodzi wawo adasalamo, bzaadachita ku Hebhuroni naku Libhina namazimambo yalene, ndibzo bzaadachita ku Dhebhiri namambo walene.

⁴⁰ Nakutenepo Joshuwa adakunda dziko lentse, dziko lam'mapili namu Negebhu namubzigowa namumatelo namazimambo yawo yentse, palibe ne m'bodzi adasala, adapha bzentse bzikhafema, kuteyeza bzaadawuziwa na Chawuta Mulungu wa Izraeli.

⁴¹ Joshuwa adaakunda kuchoka ku Kadheshi-bhareneya kufika ku Gaza, namadziko yentse ya Gosheni mpaka ku Gibheyoni.

⁴² Joshuwa adatola mazimambo namadziko yentse kabodzi, pakuti Chawuta Mulungu wa Izraeli akhaamenyela nkhondo.

⁴³ Pamwepo Joshuwa naa Izraeli wentse waakhanawo adabwelela kunsasa wawo pa Giligali.