Taitus 2 - UWONBƆR A GBƆNPƆŊ LIKƆƆNL

Nwɔɔnbamɔm

¹ Ni kpaa le nin fin Tatusi n wɔɔn bi ibamɔn a wɔɔm.

² Wɔɔn bininkpeebin wee bin fir ki ŋmag biba wee ki laa fiin bi ŋu yi, ki li jɔɔ nbinben ŋan nin jilima, ki li fir chor bi ba, ki li nɔɔ ibamɔn a wɔɔm, ki li jɔɔ njiɛm, ki li pɔɔn biba bi fala a jimin.

³ Man mu jigin, wɔɔn bipiininkpeeb wee bi li jɔɔ jilima bi binbemin, ki laa ye bitingbiibi, ki laa ye bidanyubi, amaa wee ki li wɔɔn nan ŋan.

⁴ Ni ye man ke, bi li tinn bipiisapɔm wee bi li ban bichiɛb nin bi buwaab,

⁵ ki li chor biba, ki li be kasi, ki li jɔɔ inunman bi niin yin, ki li be nbamɔm, ki li ye ban cheel bi chiɛb a mɔɔŋi, ni ma li che uba kaa li fir pag ki bii Uwonbɔr a bɔri.

⁶ Man mu jigin, pɔɔg binaachipɔm mu a gbanann wee bi li chor bi ba.

⁷ Nin niwann biɛn ni ŋaam limagil ki sei bi ki li tun nan ŋan na. A wɔɔm a poolin ke, a wɔɔn bi tininforin nin inunman na.

⁸ Ki li pag ibamɔn yan wee uba kaa li fir pag bii ti, wee ban kaa chee a wɔɔm nmɔn n ji ifa, nan bu-n baa jɔɔ niba a bɔbir ki li fir pag sei ti.

⁹ Wɔɔn ban ye biyom wee bi li cheel bi yudam a mɔɔŋi niwann biɛn nin, ki li pɔɔn bi ba ki li be nbinben man li gbee bi yudam a num, ki laa far bi imɔkpeli,

¹⁰ ki laa su bi wan yɔɔri, amaa wee ki wɔɔn ke bi sin ye ban wee bi li ŋa bi yada le, wee niwann biɛn nin bin che Uwonbɔr wan ye ti feeru win a wɔɔmin li jɔɔ kɔlisa.

¹¹ Uwonbɔr a nyunyunbasanl lan ta feegab dan ni, kpiir uninfo biɛn bu-u.

¹² U nyunyunbasanl nmɔn wɔɔn ti ke ti yiim nan kaa ye nwonjiɛn binben nin dulinya nan a kɔlisa birug biɛn, wee ki li chor ti ba ki li ye ban jɔɔ lasaab, ki li jɔɔ nwonjiɛn binben n-yonn man wee ti be nan yaan.

¹³ A li ke taah le jɔɔ tama ki guu ti kaar a daalin, le ti lig lidaal lan wee ti Wonbɔr gbingbemilin nin ti feegabdaan Yisa Masiya kaah na yin degirin nin kupag man,

¹⁴ wan ta uba ki ŋa nkpenim a manug ki sei ti, ki nyan ti titoonbir biɛn a yomirin, le ki ŋa ti u baantɔɔl a ninfob ban be kasi ki jɔɔ linunmanl nin itoon ŋan a tum.

¹⁵ Ni niɛ nan le ye nan wee a li wɔɔn bi. Ki li jɔɔ npɔɔn man wee bi ta seiŋin biɛn ki pɔɔg bi gbanann ki li kpaan bi. Ki laa che uba nlig ziɛŋi.