Tibɔkpiirkaan 1 - UWONBƆR A GBƆNPƆŊ LIKƆƆNL

¹ Tibɔkpiirikaar tan wee Uwonbɔr nan ta sei Yisa Masiya ke, un ta wɔɔn u toontum nan yin tun daandaan nan. U nan che U malaka le wɔɔn U toontunnu Jɔnn,

² le Jɔnn nan jin siɛra waah kan nan biɛn nin bu, ti ma ye, Uwonbɔr a mɔleen nin Yisa Masiya a siɛra.

³ Wan karin ilinlen leen yan be kugbɔŋ nan a poolin ke tikaar be udaan bu, le ban mu gbir tibɔr nmɔn ki ta ŋa bi sufu ni ke tikaar be bi bu, nan bu-n iyoo mala.

Ipoor yan tenn biwonjiɛm a laginn tilile

⁴ Min Jɔnn, le sɔb kugbɔŋ nan ki tenn biwonjiɛm a laginn tilile tan be Asiya a yerin ni: Linyunyunbasanl nin nposɔɔn lan nyan Uwonbɔr ban li be nin ni, Uma wan be, nin wan nan be, nin wan yin dan, ki ji nyan ntinaam milile man be u naangbɔŋin u nintogilin li be ni ban.

⁵ Linyunyunbasanl nin nposɔɔn lan ji nyan Yisa Masiya, wan ye ibamɔn a siɛradaau win, kibininkpeeg kan chinn fii nkumin, nin wan ye dulinya nan a bɔrtiib biɛn a bɔru win li be ni ban. Wan jiɛ ti wee ki ta u cham ki nyan ti tibirin nin,

⁶ le ki che ti ŋa u naam a ninfob nin biminmanib ke ti li jiɛn Uwonbɔr wan ye u Baa-n, u binba le kpaan nin kupag nin npɔɔn iyoo nin iyoo! Ibamɔn.

⁷ Lig, u be titalangbann nin ki chaan, le nnumbim biɛn na li kan u; hali nin ban nan ŋu win li kan u; le dulinya yaab biɛn na li mɔɔ u bu. Ni sin li ŋa man! Ibamɔn.

⁸ “Min le ye Npiinim nin Njoorim,” Uyudaan Uwonbɔr le len man, “Min wan be, nin wan nan be, nin wan yin dan, npɔɔn biɛn daan.”

Masiya a zii

⁹ Min, Jɔnn wan ye ni nabig, wee ki ye ni kpiɛg ti fala-n nin ti naamin nin ti mɔril a nyiginimin nan ye ti yaan Yisa bu-n, wee ki nan be ligungonl lan be nnyum a sisiigin Patmosi-n Uwonbɔr a mɔleen bu nin maah ye Yisa a siɛra bu-n.

¹⁰ Uyudaan a kpakɔɔl daal, n nan be nin Kinaaŋ le, le ki gbir likukɔl kaah tiɛn paab n bɔɔn ki nann kunaatuŋ,

¹¹ ki len ke, “Sɔb nan wee a kan nan ki ŋa kugbɔŋ kpabkaagin ki ta tan sei biwonjiɛm a laginn a kerim milile-n na: Ti ma ye Efesusi, nin Simarina, nin Pagamum, nin Tayatira, nin Sadusi, nin Filadelifiya nin Laodisiya.”

¹² Le n gbiɛ lig n bɔɔn ke n kan likukɔl lan pag ki tenn nim nmɔn. N-yonn man wee n labir n bɔɔn paamin, le n kan salima a filaam a tutɔɔnbol ilile kaah si,

¹³ le filaam a tutɔɔnbol nmɔn uba nan be niin “ki nann uninfosaal a big”, ki yee daala kan fɔg ki tan piin u taabili bu le salima a changbam lol paan u gbingbanl bu.

¹⁴ Le u yul nin u yukper peen ke tigunn nin, bee liŋunlin, le u num paam be ke nŋmipeen nin.

¹⁵ U taai nan nann tukur tan wee bi ta pul nŋmi-n ke ti nyagin man nin le, le u kukɔl a fur nann nnyum puukaam.

¹⁶ U nan ŋmag iŋmabil ilile le u nɔɔjiim, le takoobi kaaŋ kan jɔɔ imɔɔŋ ilee nyan u mɔnn. Le u num paam nyagin ke nwosisiigin nin.

¹⁷ Maah nan kan u n-yonn man nin le n lu u ta tum ke utakpiirin. Le u ta u nɔɔjiim ki paan nbu ki len ke, “Laa san bijawaami. Min le ye Npiinim nin Njoorim.

¹⁸ N ye Wan Fo-n le; N nan kpou, liga n fii nkumin na ki ye wan fo-n le hali nin iyoo yan kaa jɔɔ diɛm! Le ki ŋmag Nkum nin Kitakpiin tiŋ a naanganl a piin.

¹⁹ “Mambu, sɔbim ŋaah kan nan na, nan be daandaan nan nin nan na yin ŋa ni bɔɔn.

²⁰ Ŋaah kan iŋmabil ilile yan n nɔɔjiim paamin nin salima a filaam a tutɔɔnbol ilile liwoolin nin a taai ye nan le: Iŋmabil ilile-n ye biwonjiɛm a laginn tilile-n a malakam le, le salima a filaam a tutɔɔnbol ilile-n mu ye biwonjiɛm a laginn tilile-n.