Lituln 26 - UWONBƆR A GBƆNPƆŊ LIKƆƆNL

Pɔɔl kaah jin uba a siɛra ki wɔɔn Ubɔr Agiripa man

¹ Iyaayoo le Ubɔr Agiripa nan bei Pɔɔl ke, “N jaa ŋa, a li fir pag a bɔr kaah ye man ki sei ti.” Le Pɔɔl yuur u nɔɔ ki poor u ki piin u bɔr:

² “Ubɔr Agiripa, ni ye liyul ŋanl le ki seim nin maah si a nintogil dinan ke n pag nbamɔm ki wɔɔniŋ, nin Juu yaab kaah pag ki galinim man biɛn,

³ diginn, n nyi ke a jɔɔ nbiɛm ki nyi Juu yaab a kaal nin bi mɔkpel kaah ye man. Ni ma bu n baliŋ le a mɔr ki gbir n bɔr nan ki seim.

⁴ “Juu yaab biɛn nyi maah nan be man n-yonn man wee n la nan ye kibigin, npiinimin n binbem kaah nan ye man ntɔɔl a tiŋin, nin Jerusalam.

⁵ Bi nyim ke ni fɔg ki bi li fir ji n siɛra, ni ye bi ban ke, bi li fir wɔɔniŋ ke n nan ŋmag Farasii yaab a siim man pɔɔn le ki jɔɔ Farasii yaab a binbem.

⁶ Amaa daandaan nan maah nan si wee ni jim tibɔr nan, ni nyan n tama wan wee Uwonbɔr nan siin ti yaajam limɔsiinl lan nin bu le.

⁷ Limɔsiinl nmɔn bu le che tim Juu yaab a bol piig nin ilee nan jɔɔ tidindann ke li na li gbeen, ni ma che bi jiɛn Uwonbɔr nween nin kunyiɛg. Ubɔr aa, tama wan wee n jɔɔ nan bu le che Juu yaab galinim nan.

⁸ Babu che ni li pɔɔ ni ban nin ni ŋa yada ke Uwonbɔr fiin bitakpiibaa?

⁹ “Chinchinn, min tɔɔl nan tiɛr ke ni kpaa talar nin n tun maah li fir tun man biɛn ki bii Yisa wan ye Nazarif a ninfou nan a yinl.

¹⁰ Man nmɔn le n sin nan tun Jerusalam. Kumanug a yudam le nan seim nsan le n chor biwonjiɛm ki kɔɔn bi tiloondirin, le baah ti ji bi tibɔr ki nan diɛ ki ke bin ku bi nan, min tɔɔl ti kpiɛg ban ke bin ku bin bu le.

¹¹ Iyoo biɛn n ti kɔɔ tiwonjiɛndirin le ki dar bi tuli, ki mug bi ki che bin sug bi yudaau. N nan fiin n ŋuul bi bu ki tan lagira, mambu che n ni nan chaa itindoo le ki tan mugir bi.

Pɔɔl kaah nan pag waah kpenn u binbem man

¹² “Nsan chonl nmɔn ni, le n ti nan fii ki chaa Damasiko ke n tan tun ke kumanug a yudam kaah seim nsan ki wɔɔnim man nin.

¹³ Ubɔr aa, nwosisiigin le n nan be nsann bu ki chaa, le ki kan nwonween kaah nyan paab, ki nyagin ki jon nween, ki nan nyagir ki jin min nin n ninɔɔtabin bu.

¹⁴ Le ti biɛn lu tum, le n gbir likukɔl pag ki beim tim Juu yaab a leen yin ke, ‘Sɔɔl, Sɔɔl, ba ŋa wee a mugirim maa? Ni pɔɔ nin a ta a taal liɛ ipiinh.’

¹⁵ “Le n baan u ke, ‘Uyudaau, a ye ŋmiɛ?’ “Le Uyudaan jiin ke, ‘Min Yisa le a mugir nmɔn.

¹⁶ Fii ki sir a taai buu. N degir a bu le ki ganiŋ ke a li ye N toontunnu, ki ye siɛra ki wɔɔn bininfob ŋaah kam man, nin nan wee n la yin kpiir ki wɔɔniŋ.

¹⁷ N li nyaŋ a tɔɔl a ninfob a nɔɔn, nin ban kaa ye Juu yaab nan a nɔɔn. N yin tuŋ le bi ban,

¹⁸ a tan ligir bi num ki nyan bi libunbɔnlin ki kpenn bi ŋa nwonween ni na, ki nyan bi Sintani a pɔɔmin ki sei bi Uwonbɔr a pɔɔm, wee bin kan tibir a jiɛn per, nin npaan n ban wee Uwonbɔr n ta bi ŋa U yaab ban be kasi-n a sisiigin baah ŋaam yada n bu.’

Pɔɔl kaah pag u toon kaa ye man

¹⁹ “Man bu Ubɔr Agiripa, maa ŋa tukangbirdaan maah kan zii kan paabin ni.

²⁰ Chinchinn, n mɔɔn Uwonbɔr a bɔr nmɔn le ki sei Damasiko yaab, nin Jerusalam yaab, nin Judiya a tingbɔŋin biɛn. Le ki mɔɔn ti sei ban kaa ye Juu yaab mu. N wɔɔn bi le ke bin kpenn bi binbem wee ki ta biba ki sei Uwonbɔr a, ki li be nbinbem man sin li wɔɔn ke bi kpenn bi binbema.

²¹ Ni ma bu le Juu yaab choom, iwonjiɛn niin a poolin ki ban bin kum.

²² Amaa n kan Uwonbɔr a teril le ki nan kpaa dinan, le n be ki ji ni siɛra ki tenn ban gbee bininfob nin ban kaa gbee bininfob. Maah len man nan kaa lagir Uwonbɔr a linlem nin Moziz kaah nan len ke ni li tun man nin ni,

²³ ke Masiya li ji fala, ki li ye chinchinn a ninfo wan yin fii nkumin, ki wɔɔn u tɔɔl a ninfob nin ban kaa ye Juu yaab nan tibɔr tan li wonn bi num.”

²⁴ Pɔɔl kaah pag man nmɔn le Fetusi tiɛn u bu ke, “Pɔɔl; a waara. A biɛm takpem nan bu le che a waar.”

²⁵ Le Pɔɔl jiin u ke, “Jilimadaan Fetusi, maa waari, tibɔr tan wee n pag nan ye ibamɔn le ki jɔɔ itaa.

²⁶ Ubɔr Agiripa nyi tibɔr nmɔn, ni ma bu le n pag n wiib ki tenn u. N gaa jin ke tibɔr tan wee n pag nan kaa ye tibɔwoon kaari, nan bu-n taa nan pag ki woon ni.

²⁷ Ubɔr Agiripa, a ŋa Uwonbɔr a linlemin yada waa? N nyi ke a ŋa bi yadau.”

²⁸ Le Ubɔr Agiripa jiin Pɔɔl ke, “A tiɛr ke a li fir che n ŋa uwonjiɛn n-yonn wama nan yaan naa?”

²⁹ Le Pɔɔl jiin u ke, “Ni baga kaa be n-yonn wama bee takpemi, min miɛ Uwonbɔr le ni laa ye a binba amaa fin nin bininfob ban biɛn pelig n bɔr dinan nan li ŋa biwonjiɛm ke maah ye man nan, tikulor tan wee bi lolim nan a binba n choo nyan.”

³⁰ Le ubɔr Agiripa, nin uyudaan Fetusi, nin Bɛnisi, nin bininfob ban biɛn nan be niin nmɔn fii.

³¹ Ki nyan kudiig nmɔn yaan, le ki nin pag ki gbeer tab ke, “Uja nan kaah tun nan nan kaa kpaan nin un kpo bee un kɔɔ kuloondiigin ni.”

³² Le Agiripa bei Fetusi ke, “Uja nan kaa nan bi balin Siiza ke, ti bi li fir jaa u.”