Lituln 10 - UWONBƆR A GBƆNPƆŊ LIKƆƆNL

Piita nin Kɔnelu

¹ Uja uba le nan be Sizariya, le u yinl ye Kɔnelu. U nan ye Rom yaab a tɔtogib a sanliiru le, ki ŋmag bitɔtogib kobig, ki be Itali a tɔtogib a paabimin.

² Kɔnelu nin u niin yaab biɛn nan ye biwonsam le. U nan ter bilanjiim pam, ki miɛ Uwonbɔr iyoo biɛn.

³ Le weemba daal a jɔɔg tikur titaa a yonn, le u kan zii. U nan kan Uwonbɔr a malaka le u dan u ban ki nan ke, “Kɔnelu!”

⁴ Kɔnelu kaah kan malaka nmɔn nin, le bijawaam choo u, le u baan u ke, “Uyudaan baa yen naa?” Le malaka nmɔn jiin ke, “A miɛm nin a teril lan wee a jɔɔ ter bilanjiimin ye litiɛril a piin le Uwonbɔr ban.

⁵ Daandaan nan tun bininfob biba Jopa wee bin tan yin uja wan wee bi yi u ke Simɔnn, wee u yinl liba mu ji ye Piita nni.

⁶ U be ugbanjab wan wee bi yi u ke Simɔnn n-yaa niin le, u niin nmɔn mal limɔgil le.”

⁷ Malaka wan nan pag sei win kaah nan jon nin, le Kɔnelu yin u niin a toontum bilee nin u tɔtogir uba, wan nan be u ban idaa biɛn ki tun itoon ki tenn win.

⁸ Ki bei bi niwann nan biɛn ŋa, le ki tun bi Jopa a tiŋin.

⁹ Naah nan won kutaag wee bi chaan, ki nan tan mal Jopa nween paamin, le Piita don kudiititɔrug a paab, ke un tan miɛ Uwonbɔr.

¹⁰ Le nkom nan choo u le u ni ban tijiir un ji. Baah nan be ŋaan tijiir nmɔn ni, le u kan zii.

¹¹ Le u kan paab loor le niba nann likinkenl takpenl ki nyan paab ki jiirin nin imɔgban ina.

¹² Le u kan tiwankor tan jɔɔ itaa ina nin tan be nnyumin nin tan fuul tum nin nnɔɔm likinkenl n-yaan.

¹³ Le u gbir likukɔl yin u ke, “Piita fiiu wee ki ku ŋman.”

¹⁴ Le Piita ke, “Uyudaan! Ibamɔn buu, maa la nyi jin niwann nan kaa ŋan bee nan ye tijaginn ni.”

¹⁵ Le likukɔl nmɔn ji mann bei u ke, “Laa yin nan wee Uwonbɔr ŋa ni kasi ke naa ŋan ni.”

¹⁶ Likukɔl nmɔn nan len le ki tan kpaa nfim mitaa, libol nmɔn le bi ta likinkenl nmɔn don paab.

¹⁷ Piita kaah la nan be tiɛr waah kan zii kan nin a taai-yin, iyaayoo le Kɔnelu kaah tun ban nin, baan ki biɛ Simɔnn a niin kaah ye yan ki sir ntimansanmɔnn.

¹⁸ Le ki yin ki baan njee uba be do wee u yinl ye Simɔnn Pitaa?

¹⁹ Piita le la nan be tiɛr waah kan zii kan nin bu le, le Kinaaŋ bei u ke, “Simɔnn bijab bita choon baŋ.

²⁰ Ni bu fii ki jiir tuma, ki laa biɛn njee a nɔɔ bi bee a laa nɔɔ, nan bu-n min le tum bi.”

²¹ Le Piita jiirin tum ki nan bei bijabin ke, “Min le ni ban nmɔn. Babu wee ni dan naa?”

²² Le bi jiin ke, “Kɔnelu le tun ti, u ye Rom yaab a tɔtogib a sanliiru le, ki ye uninfo buchin, ki san Uwonbɔr, le Juu yaab biɛn tenn u jilima. Kasi a malaka le dan ki nan bei u ke un yiŋ wee a dan u niin, wee un gbir nan wee a li pag sei u.”

²³ Le Piita yin bijabin ki ta bi kun u niin le ki ŋa bi u cham. Ni won kutaag le Piita fii ki nɔɔ bi, le biwonjiɛm ban be Jopa n-yaa ni bibaam chiɛn u.

²⁴ Le ni ŋmiɛ ki won kutaag le u foo Sizariya, ki miin Kɔnelu pii yin u maali nin u jɔtiib, le bi biɛn dan ki nan ka guu Piita a foom.

²⁵ Piita kaah nan foon ki yin kɔɔ n-yonn man ni, le Kɔnelu kan u ntimansanmɔnn le ki gbaan tum ki sei u jilima.

²⁶ Amaa le Piita bei u ke, “Fiiu, min tɔɔl ye uninfo le.” Le ki fiin u.

²⁷ Waah nan pag nin Kɔnelu nan, le ki kɔɔ iniin nmɔn yaan ki miin bininfob takpem le lagin ki ka.

²⁸ Le u bei bi ke, “Ni tɔɔl nyi ke tim Juu yaab a siim kaa chee ke ti li chaa ban kaa ye Juu yaab ban ni, bee ki ŋmarin bi ni. Amaa Uwonbɔr wɔɔm ke n laa yin u ba ke waa be kasi bee waa ŋan ni.

²⁹ Mambu, naah yim n bu le n dan kaa yii. Ni yim ba bu?”

³⁰ Le Kɔnelu jiin u ke, “Ni ween ina sɔ dinan, le n nan be miɛ Uwonbɔr n niin nan a yoo bu, njɔween paam a kur titaa. Libol nmɔn le n kan uja uba le u yee tiwann yɔɔr le ti nyagin ki nan sir n nintogil,

³¹ ki len ke, ‘Kɔnelu, Uwonbɔr gbir a miɛm ma, ki li tiɛr a piini yan wee a pu bilanjiimin.

³² Ni tun uba Jopa, wee un tan yin wan wee bi yi u ke Simɔnn, wee u yinl liba ji ye Piita nni. U ye uchaan le ki be Simɔnn wan ye ugbanjab n-yaa niin wee i mal limɔgilin.’

³³ Ni ma bu le n che bi yiŋ ni weem, ŋaah dan nan, ni ŋan. Daandaan nan ti biɛn be do Uwonbɔr a nintogil. Ti ban ti gbir tibɔr tan wee ti Yudaau wɔɔŋ ke a bei ti n le.”

Piita a mɔboi

³⁴ Le Piita piin ki bei bi ke, “N nin biɛ ke ni ye nbamɔm le ke Uwonbɔr kaa gann ni,

³⁵ Amaa U gaan ibol biɛn ban san u, ki tun nan ŋan nin le.

³⁶ Ni nyi tibɔr tan wee Uwonbɔr nan pag sei Iziral yaab ki wɔɔn bi tibɔŋann tan ye nposɔɔn Yisa Masiya bu, u ma ye ti biɛn a Yudaau.

³⁷ Ni nyi nan ŋa Judiya a tiŋin, ni nan piin Galilii le Jɔnn kaah nan pag linyunful lan a bɔrin,

³⁸ ni biɛn nyi Uwonbɔr kaah gbeen Yisa wan nyan Nazarif nan U pɔɔm man, ki sei u Kasi a Naaŋ nin npɔɔn nin waah nan choon ki tun itoon ŋan ki teb ban biɛn nan be ulinlarin a pɔɔmin ni, nan bu-n Uwonbɔr le nan be u ban.

³⁹ “Tim le ye u siɛra dam nin waah tun nan biɛn Juu yaab a tingbɔŋin nin Jerusalam. Le bi nan kpa u lidapunpunl bu le u kpo,

⁴⁰ amaa le iweehn itaa daal, le Uwonbɔr fiin u nkumin, le ti kan u.

⁴¹ Amaa naa ye bininfob biɛn le nan kan wi, amaa ban wee Uwonbɔr pii gann bi wee bi ye siɛra damin le nan kan u, nin tim ban nan lagin ki jin ki nyun nin u kum a fiim a bɔɔn nin.

⁴² Le u sei ti nsan ke ti li mɔɔn Uwonbɔr a bɔŋann nmɔn ki tenn bininfob, ki ji ti siɛra ke u ma le Uwonbɔr nyan ke u li ye ban fo nin ban kpo a bɔjiru.

⁴³ Bilinlem biɛn nan jin u siɛra ke wan biɛn ŋa u yada ke u kan tibir a jiɛn pera u yaa yinlin bu.”

Ban kaa ye Juu yaab kaah gaa Kasi a Naaŋin man

⁴⁴ Piita kaah la nan be pagin, le Kasi a Naaŋ jiirin ki nan gbeen ban biɛn nan gbir tibɔr nmɔn nin.

⁴⁵ Le ni gar biwonjiɛm ban nan jii bi pun ki chiɛn Piita nan, Kasi a Naaŋ a piin kaah kpaar wur ban kaa ye Juu yaab n mu bu-n.

⁴⁶ Nan bu-n bi gbir baah pag ileen pɔɔn ki donn Uwonbɔr a yinl. Le Piita ke,

⁴⁷ “Uba li fir len ke bininfob nan n laa gaa Uwonbɔr a nyunful laa? Bi gbee nin Kasi a Naaŋ ke ti mu kaah nan gaa man nin le.”

⁴⁸ Le ki ke bin fu bi Uwonbɔr a nyunful Yisa Masiya a yinlin buu. Le bi gɔɔ Piita ke un paar bi ban iweehn ilee.