Kolosiya 3 - UWONBƆR A GBƆNPƆŊ LIKƆƆNL

¹ Mambu, ni nan fii nin Yisa nkumin na, ni ta ni sufu ki sei paab a naamin a wan yɔɔrin na, nan yaan wee Yisa ka Uwonbɔr a nɔɔjiim paamin.

² Ni ta ni potiɛl ki ŋa paab a naam a wann bu-u, ki laa ta ni potiɛl ki ŋa dulinya nan a wan yɔɔr bu.

³ Nan bu-n ni kpou, le ni miɛfol woo Masiya ni le ki be Uwonbɔr ban.

⁴ Masiya wan ye ni miɛfolin nan degirin ke, iyaayoo nim nin uma na li degirin nin kupag.

Limiɛfol kpegil nin limiɛfol pɔnl

⁵ Mambu ni ku nan ye dulinya nan a binbem man be nin ni na: Nan ye iwanchɔgin toon, nin ni piibanlin bee ni jabanlin, nin tijaginn a toon, nin nmɔsanyunsɔɔm, nin titoonbir nin kujaŋuuŋ ni ma ye libawol manil.

⁶ Ni niɛ nan bu Uwonbɔr a ŋuufiiŋ chaan ban tun man nmɔn bu.

⁷ Ni nan ti jɔɔ man a binben n-yonn man wee ni nan be-n.

⁸ Amaa daandaan nan ni kpaa le nin ni choo ni ba nyan ni niɛ biɛn nin, ni ma ye liŋuul, nin kiŋuufiiŋ, nin kininaŋ, nin kutingbiig nin timɔleenbir tan nya ti mɔɔŋi yin.

⁹ Ni laa por tibɔkar ki tenn ni tabi, nan bu-n ni pii pir ni binben kpeg a ŋaarin ki gaba,

¹⁰ ki yee nbinben pɔɔn le, nbinbem nmɔn le Uwonbɔr pɔŋir mi nin nyinyimin le mi nann uma wan naan min.

¹¹ Ni ma kaa jɔɔ nbɔgirim ban ye Juu yaab nin Girig yaabin, ban jii bi pun nin ban kaa jii bi pun, ban ye bicham nin bidindamin, nin ban jɔɔ kulɔŋ a binbem nin ban jɔɔ kufɔŋ a binbem, biyom nin ban ye bi ba, amaa Masiya le ye bi biɛn le ki be bi biɛn ni.

¹² Mambu, naah ye Uwonbɔr a ninfogannkaabin wee u jiɛ ni ki ŋa ni kasi-n, ni ta linyunyunbasanl nin tiŋann, nin jiininba, nin nbinben ŋan nin limɔril ki kpann daala ki yee u.

¹³ Ni li jɔɔ limɔril nin taba, wee ki jiɛn per tab a galin, ki jiɛn per tab ke Uyudaan kaah jiɛn per ni man nin.

¹⁴ Nin tiyeer nan biɛn, nan jon ni biɛn ni ye ni li jiɛ taba, njiɛm li lagin ni biɛn ki ŋmag nin nmɔkpaa man be kasi.

¹⁵ Ni che Masiya a posɔɔmin li ŋmag ni sufu, ke naah ye tigbanann tiba a ninfob wee u yin nposɔɔn ni. Ni li tenn Uwonbɔr kunɔɔpooga.

¹⁶ Ni che Masiya a bɔŋann nin li be nin ni nbamɔma, wee ni li wɔɔn ni tab, ki gbeer tab nin nlamgɔrikaam, ki li gaah ilan, liwonpagil a lan, nin Kinaaŋ a lan nin linungbeel ni sufu ni ki sei Uwonbɔr.

¹⁷ Mambu ni ŋaan nan biɛn ke, naah ye ni mɔleen bee ni toon ke, ni ŋa ni biɛn Uyudaan Yisa a yinl bu, ki li tenn Uwonbɔr wan ye Baa-n kunɔɔpoog u bu.

Biwonjiɛm kaah li be nin tab man limiɛfol pɔnlin

¹⁸ Biniinpiib, ni chee sei ni chiɛba, man le kpaan Uyudaan ban.

¹⁹ Bijab ni li jiɛ ni piiba, ki laa ŋmag bi nin titintann ni.

²⁰ Nbuwaab, ni li cheel ni baam nin ni nam a mɔɔŋi iyoo biɛn na, nan bu-n man le gbeeg Uyudaan a num.

²¹ Baam, ni laa to ni buwaab bu, wee bi gbanann ngbɔɔ.

²² Biyom, ni li cheel ni dulinya nan a yudam a mɔɔŋi niwann biɛn na, ni li tun man wee ni laa ye iyoo yan a binba wee bi lig ni, ke bi num ngbee ni, amaa wee ki li tun man nin ni sufu biɛn nin jilima ki tenn Uyudaan na.

²³ Ni tun nan biɛn ke, ni li tun nin ni sufu biɛn, ke ni tun tenn Uyudaan le, naa ye uninfosaali,

²⁴ naah nyi ke ni na li gaa lifaal Uyudaan ban nin wee ni ye tiyɔrin. Ni ma bu Uyudaan Masiya le ni tun ki tenn.

²⁵ Wan tun titoonbir na li gaa u toonbir nmɔn a yɔr, le naa jɔɔ njiɛm a gannimi.