Hiibru Yaab 9 - UWONBƆR A GBƆNPƆŊ LIKƆƆNL

Dulinya nan nin paab a wonjiɛnl

¹ Chinchinn a poorin nan jɔɔ liwonjiɛnl a siim le nin dulinya nan a wonjiɛn bol.

² Bi nan tii kunanboŋ le. Ki yi ki poolin niba yaan ke kasi a bol nan yaan wee fila a titɔɔnbol nin teebul nin kasi a boroboro kan wee bi jɔɔ tenn liwonseil a mann bolin nan be.

³ Kunanboŋ kiba mu ji nan be kunanboŋ nmɔn a poolin le likinkenl takpenl nan deg ku bu, le bi yi ki ke kasi mu a kasi a bol,

⁴ kunanboŋ nmɔn a poolin nan jɔɔ salima a binbinl nan yaan wee bi nan nyɔɔr nnyɔgkusim ki tenn Uwonbɔr, le Uwonbɔr a poor adaka kan wee salima nan tab ki bu-n mu be niin. Adaka nmɔn a poolin nan jɔɔ salima a binbog kan gbee nin tijiir tan wee bi yi maana nan, nin Arɔnn a jaangbiɛg kan nan bunn tifarin, nin itangbag ilee yan wee bi nan sɔb nsiim ki paan i bu-n nan kpee niin.

⁵ Le tiwann naan wann tan jɔɔ jilima ki nann bininfob nin tikpinkpann nan tɔɔ adaka nmɔn bu, le bi kpinkpann nmɔn deg nan yaan ye tibir a jiɛnper a bolin. Amaa taa li fir pag tibɔr nmɔn biɛn daandaan nan ni.

⁶ Ni ye niwann biɛn a sili nan ti ŋa ke, biminmanib nan ti kɔɔ le iyoo biɛn chinchinn a nanboŋ n-yaan ki tan tun bi wonjiɛnl a toon.

⁷ Amaa biminmanib a yudaau a binba le nan ti kɔɔ kunanboŋ kan be poolin nin taaliba libinl a poolin, u nan ti ŋmag ncham le ki kɔɔ, nan wee u li ta mann ubaantɔɔl a bir bu, nin bininfob kaah tun tibir tan wee kaa nyi.

⁸ Kasi a Naaŋ nan wɔɔn ni niɛ le ke, nsan man chaa kasi mu a kasi a bolin kaa la loori, chinchinn a wonjiɛn nanboŋin kaah la si n bu.

⁹ Ni niɛ le ye nan mag ki wɔɔn n-yonn man wee ti be daandaan nan, ni wɔɔn ke ipiin nin kumanug kan wee bi nan mann nin kaa nan fir ŋunn uwonjiɛn a potiɛli.

¹⁰ Ni nan ye tijiir, nin tiwann nyuwann, nin kuchiig daal a kaal nin dulinya nan a siim kaah wɔɔn man hali ki nan kpaa tipoopɔnn nin a yoo.

¹¹ Masiya kaah nan dan wee ki ye biminmanib a yudaau wan ye tiwann ŋan tan pii nan be-n, u nan kɔɔ kuwonjiɛn nanboŋ kan yab ki ŋan jon kan be dulinya nan yaan, wee naa ye bininfob le tii ki-n yaan le.

¹² Waa nan ŋmag iŋɔɔb nin nnaabum a cham le ki kɔɔ nin yaan ni; amaa nba bu le u nan kɔɔ kasi mu a kasi a bolin ki ta u tɔɔl a cham ki mann kumanug kan ye nkpenim a manug kan kaa jɔɔ diɛm Uwonbɔr ban ki sei ti.

¹³ Bi minmanib nan ti taar iŋɔɔb nin inaaja a cham le nin kinaasiɛg kan bi nyɔɔ ki a fatam le ki jɔgin bininfob bu ban jɔɔ tijaginn bi kaal bu-n wee nin ŋa bi kasi bi gbanann nin.

¹⁴ Mambu ke, Masiya ma a chamin tun nan jon man na, uma wan kaa jɔɔ igalin wee kinaaŋ kan be u ni kaa jɔɔ diɛmin nan che u ta uba ki mann kumanug ki sei Uwonbɔr, ki ŋunn ti potiɛri a toon yan yin liin ti kɔɔn nkumin nin, wee nin che ti fir jiɛn Uwonbɔr wan foo-n!

¹⁵ Ni ma bu le Masiya ye ti sandanfaaru tipoopɔnn n-yaan, ke nin che ban wee Uwonbɔr yin bin kan Uwonbɔr a mɔsiinl lan ye lifaal lan kaa jɔɔ diɛmi. Nan bu-n Masiya pii nan kpo ke un da ban nan tun tibir n-yonn man wee tipookpegirin la nan si-n le, ki nyan bi tibir nmɔn a tudarilin.

¹⁶ Ni ye uninfo por u faal waah nan kpo ke u faalin ji man ke, naa tun itoon ni, see ke u nan kpo,

¹⁷ Nan bu-n uba kaa li fir ji uninfo a faal wee udaan la fo; amaa see ke udaan nan kpo.

¹⁸ Ni nan bu le che hali chinchinn a poorin kaa nan bi li fir tun itoon wee ncham kaa be.

¹⁹ Moziz kaah nan ta Uwonbɔr a siimin biɛn ki wɔɔn bininfobin biɛn n-yonn man nin, le u ta nnaabum a cham nin nnyum, nin tipeekormann nin iduufala ki lol tabin tab ki ta bɔ ncham nin nnyumin yaan ki jɔg jɔg Uwonbɔr a gbɔŋ kpabkaagin nin bininfobin biɛn bu.

²⁰ Le ki len ke, “Ni niɛ le ye tipoorin a cham, tan wee Uwonbɔr ke ni li ŋmagin.”

²¹ Man mu jigin le u nan ta ncham nmɔn ki jɔg jɔg kuwonjiɛn nanboŋin bu nin niwann nan biɛn nan be kunanboŋin nmɔn a poolin wee bi jɔɔ mann bi kaal a manugin.

²² Ibamɔn buu nsiimin wɔɔn ke ncham le ye min ŋunn niwann biɛn, ni bu ncham kaa nyan ke tibir a jiɛnper kaa be.

Masiya a manug le nyann tibir

²³ Ni nan kpaa talar le, nin bi li mann kumanug ki ŋunn tiwann tan nann paab a wan yɔɔrin, amaa paab a wan yɔɔrin tɔɔl jɔɔ kumanug kan ŋan jon ti niɛ nan.

²⁴ Nan bu-n Masiya kaa nan kɔɔ bininfob kaah maa wonjiɛn bol lan nan nann wonjiɛn bol bamɔnlin yaan ni; paab baantɔɔl le u nan don, le ki si ti taalin Uwonbɔr a nintogil.

²⁵ Waa nan don paab nmɔn ke u ta li gbaa jɔɔ uba ki mann kumanug ke biminmanib a yudaau kaah ti kɔɔ kasi mu a kasi a bol ibin biɛn ki ŋmag ncham man kaa ye u tɔɔl a cham ki tan mann man nin ni.

²⁶ Ni bi ye man ke Masiya nan bi li ji fala n-yonn takpem naah nyan dulinya a piinimin. Amaa daandaan nan u degirin ti bu nba bu le, iyoo nan a diɛmin ki ta uba ki mann kumanug ki nyan tibir.

²⁷ A li ke uninfo kaah ye un kpo nba bu man nin, wee ni bɔɔn ke bin ji u tibɔr man nin,

²⁸ man mu le Masiya a manugin nan mann nba bu ki nyan bininfob takpem a bir; le u ji li jirin, kaa ye u nan ji tibir a fala, amaa u li ŋmag feegab ki nan sei ban guu win.