Hiibru Yaab 3 - UWONBƆR A GBƆNPƆŊ LIKƆƆNL

Yisa kaah jon Moziz man

¹ Mambu, n nabum ban be kasi nan, wee ki kpiɛ Uwonbɔr a yimin yaan nin, ni li tiɛr Yisa buu, wan ye ntoon nin biminmanib a yudaau wan wee ti ŋa u yada tiwonjiɛn samin nin.

² U nan si nba bu le ki sei wan gann win, a li ke Moziz kaah nan si nba bu u toon yin ki sei Uwonbɔr a ninfob biɛn man nin.

³ Yisa le ye wan kpaan jilima ki jon Moziz, a li ke uniinmaar kaah jɔɔ jilima ki jon iniin nin tɔɔl man nin.

⁴ Iniin biɛn jɔɔ wan maa i le, amaa Uwonbɔr le ye wan maa niwann biɛn.

⁵ Moziz nan si nba bu le Uwonbɔr a ninfob biɛn ban waah ye utoontunn ki be Uwonbɔr a niin nin ki ji siɛra, ki wɔɔn bi Uwonbɔr kaah yin len man n-yonn man la chaan.

⁶ Amaa Masiya ma si nba bu le Uwonbɔr a ninfob biɛn bu ki ye U bija, tim le ye Uwonbɔr a niin yaab, ni ye ti li jɔɔ lipoobil le nin tama kan wee ti far ligbingbanl ki bu-n.

Uwonbɔr a ninfob a foorim

⁷ Ke Kasi a Naaŋ kaah len ke: “Dinan, ni ye ni gbir U kukɔl ke,

⁸ ni laa ta niba ŋa tukangbirdami, wee ki kɔnn bininkpeeb ke ni yaajam kaah nan mag u n-yonn man wee bi nan be kukunkɔɔg a paabin ni,

⁹ nan yaan wee ni yaajam nan magim ki tan kpaa ibin pina, wee bi num kan nan wee N tun ni.

¹⁰ Mambu le N ŋuul nan fii bi nɔɔm nmɔn bu, le N len ke, ‘Bi sufu ŋmarin le iyoo biɛn, le baa nyi N san yi.’

¹¹ Le N nan poo tipoor N ŋuufiiŋin bu ki ke, ‘Baa li kan lifooril N ban ni.’

¹² N nabum, ni li nyi wee ni ni uba laa jɔɔ sufu birug kan li che un fɔɔr ki jiɛn Uwonbɔr wan ye limiɛfol daan nin ban ni.

¹³ Amaa ni li pɔɔgir tab a sufu idaa biɛn na, taah la be Dinan nin, wee ni ni uba laa ye tukangbirdaan tibir a larug bu.

¹⁴ Nan bu-n ni ye ti ŋmag ti chinchinn a dindann nbamɔm ki tan kpaa ti miɛfol a joorim ke, tim nin Masiya na yin ye nba le.

¹⁵ A li ke maah pii bi len ke, “Dinan, ni ye ni gbir U kukɔl ke, ni laa ta niba ŋa tukangbirdami, ke ban kɔnn nin bininkpeeb kaah nan ŋa man ki yii Uwonbɔr nni.”

¹⁶ Ŋmam le nan gbir Uwonbɔr a kukɔl, wee ki yii nnaa? Naa ye ban biɛn wee Moziz nan nyan bi Ijibir nnaa?

¹⁷ Ŋmam bu wee Uwonbɔr a ŋuul nan fii bi bu ibin pinaa? Naa ye ban tun tibir nbu, ban a gbanann nan paar kukunkɔɔg bu nnaa?

¹⁸ Ke ŋmam wee U nan poo tipoor ke baa li kan lifooril U ban nin na, wee naa ye ban yii U mɔb nnaa?

¹⁹ Ni bu, ti kan ke baa nan fir kɔɔ lifooril nmɔn yaan ni, nan bu-n bi kaa jɔɔ yada-n bu.