Efesusi 5 - UWONBƆR A GBƆNPƆŊ LIKƆƆNL

Nwonween a binbem

¹ Mambu ni li toog Uwonbɔr a, naah ye U bijiɛkaamin,

² ki li be njiɛm a binbema, ke Masiya kaah jiɛ ti ki ta u ba ki mann kumanug kan jɔɔ nbaam mɔɔm ki sei Uwonbɔr ti bu man nin.

³ Amaa ni laa che ti gbir iwanchɔgin toon lipiibanlin bee lijabanlin a wama ni sisiigin ni, bee ki laa tun tijaginn a toon iba, bee kujaŋuuŋ, nan bu-n naa ŋan nin Uwonbɔr a Kasi a ninfob li be man ni.

⁴ Ki jiɛn ifa a geli nin ijɔr leen nin igel pɔɔr yan kaa kpaan ni, amaa nan kpaan nin ti li ŋaan ye liwonpagil le.

⁵ Ni nyi ni niɛ nan bu: Ke uninfo wan tun iwanchɔgin toon upiibanlin bee ujabanlin, bee tijaginn a toon, bee kujaŋuuŋ ke, u yaa daan ye utingban kɔɔr le, le kaa na yin kan niba Masiya nin Uwonbɔr a naamin ni.

⁶ Ni laa che uba n ta tibɔyɔɔr nan ki lar ni, ni ma che Uwonbɔr a ŋuul fii ban kaa jɔɔ limɔcheelin bu.

⁷ Mambu ni laa jɔɔ nɔɔ nin tab nin bi.

⁸ Ni gbaa tɔɔl la nan be libunbɔnlin le, amaa le ti Yudaau bu, ni nin kpann ban be nwonweenin le daandaan nan. Mambu ni li be ke nwonween a buwaaba,

⁹ (nan bu-n nwonween a loonl ŋan ki jɔɔ nbuchin binben nin ibamɔn)

¹⁰ ni baan ki biɛ nan gbee Uyudaan a num.

¹¹ Ni laa che ni nɔɔ be libunbɔnl a toon yan kaa jɔɔ nyɔɔr nmɔn yaan ni, amaa wee ki nyan ti npaan ni na.

¹² Ni ye ifa le nin uninfo n pag limɔyiildaan nmɔn kaah woog ki tun nan a bɔr.

¹³ Amaa ni ye nwonween wonn niwann biɛn bu ke, ni nya npaan ni le ki ga,

¹⁴ nwonween le wonn niwann biɛn bu le ti ga. Mambu le ni sɔb Uwonbɔr a gbɔŋin ke, “Fin wan dɔ jiɛn nan, ligira, fii nkumin na, wee Masiya a wonweem nwonn a bu.”

¹⁵ Mambu ni li nyi niba bu, naah li be man, ni laa be ke ban kaa jɔɔ nlamin ni, amaa ni li be ke bilandamin,

¹⁶ ni taah npɔɔn man wee ni jɔɔ nan ki tun naah kpaan ni tun man nin linunmanl, nan bu-n idaa yan wee ti be nan bir pam.

¹⁷ Mambu ni laa be ijɔrig a binbemi, amaa ni biɛm Uyudaan a bam kaah ye man.

¹⁸ Ni laa nyu ndaam ki gbee, ke lidanyulin le nwanchɔgin binben nya, amaa wee ki che Uwonbɔr a Kasi a Naaŋin gbeen ni.

¹⁹ Ni li pag tenn tab nin ilan na, liwonpagil a lan, nin Kinaaŋ a lan. Ki li gaah ilan ki pagir Uyudaan ni sufu-n na,

²⁰ ni li pagir ti Baa Uwonbɔr iyoo biɛn nin niwann biɛn nin na ti Yudaau Yisa Masiya a yinl bu.

Biniinpiib nin bichiɛb a bɔr

²¹ Ni taam ni ba ki sei taba ke naah tenn Masiya jilima man nin.

²² Biniinpiib, ni taam ni ba ki sei ni chiɛb ke naah ta ni ba ki sei Uyudaan man nin.

²³ Nan bu-n uja le ye u poo a yudaau ke Masiya kaah ye biwonjiɛm a yudaau man nin, biwonjiɛm le ye Masiya a gbanann, le U mu ye bi feeru.

²⁴ Biwonjiɛm a laguŋ kaah ta bi ba sei Masiya man nin, man le ye biniinpiib mu n ta bi ba ki sei bi chiɛb nin niwann biɛn ni.

²⁵ Piidam, ni li jiɛ ni piiba, ke Masiya kaah jiɛ biwonjiɛm man wee ki kpo bi bu-n,

²⁶ ki nan ban bi li be kasi, ki nan ta Uwonbɔr a mɔleen ki ŋunn bi nnyumin,

²⁷ naah li ŋa man wee un ta biwonjiɛm a laguŋ kan nyaginin ki sei u baa, wee tijaginn tiba laa sal bi ni bee bi laa jɔɔ tijaginn ni bee igalin iba, amaa wee ki li be kasi ki laa jɔɔ igalin ni.

²⁸ Ni ye man le, piidam ye bi li jiɛ bi piib le ke bi tɔɔl a gbanann nin. Uja wan jiɛ u poo ke u jiɛ u ba le.

²⁹ Nan bu-n, uba kaa be ki nan u tɔɔl a gbanann ni, amaa u jinn ti le ki mann ti, ke Masiya kaah mann biwonjiɛm man nin,

³⁰ nan bu-n tim li ye U gbanann nmɔn a bɔgi.

³¹ “Ni niɛ nan bu le uja ye un nya u baa nin u na ban le uma nin u poo nkpaag bimɔb, wee bi bilee nmɔn lagin ki ŋa gbanann tiba.”

³² Ti ye tibɔr bamɔn tan woo le, amaa min pag Masiya nin biwonjiɛm a laguŋ a bɔr le.

³³ Ni ma bu, ni biɛn nan li jiɛ ni piib ke naah jiɛ ni ba man nin, wee uniinpii mu li tenn u chal jilimau.