2 Timoti 2 - UWONBƆR A GBƆNPƆŊ LIKƆƆNL

Yisa Masiya a tɔtogiru wan si bogiliba nan a bɔr

¹ Mambu, n bija, fin che a gbanann li pɔɔu Masiya a nyunyunbasanlin bu.

² Ta tibɔr tan wee a gbir n pag kuninfogbaluŋ a numin nin, ki wɔɔn bininfob ban si nbamɔm wee ki mu ye ban li fir wɔɔn bi kpiɛtiibin.

³ Kpiɛ ti bu ki ji fala ŋaah ye Masiya a tɔtogir wan ŋan nin bu.

⁴ Utɔtogir kaa jɔɔ u nɔɔ kɔɔn ban kaa ye bitɔtogib a bɔrin ni, nan bu-n u ban un tun nan li gbee bitɔtogib a yudaau a num le.

⁵ Man mu le ni ye ki sei utaaguun, waa li fir kan nnyaŋim a yuchigirigi see ke u nɔɔ litaguunl a siim kaah ye man.

⁶ Ukpaar wan a num man le ye wan yin chinn kan u tol tikpajiirin.

⁷ Li tiɛr nan wee n len nan bu, Uyudaan li che a biɛ ni biɛn.

⁸ Li tiɛr Yisa Masiya wan nan fii nkumin ki ye Defid a yaabilin bu. N bɔŋann nin sɔ,

⁹ tan bu wee n ji fala hali ke bi nan lolim tikulor a li ke tukangbirdaan nin. Amaa uba kaa li fir lol Uwonbɔr a bɔri.

¹⁰ Mambu le n pɔɔn nba niwann biɛn nin Uwonbɔr a ninfob gannkaab nbu, ke bi mu n kan nŋmarim man be Masiya nin, nin jilima kan kaa jɔɔ ndiɛmin.

¹¹ Tibɔr nan ye ibamɔn le; Ni ye ti kpo nin u ke, ti mu ji na li jɔɔ limiɛfol nin u;

¹² ni ye ti pɔɔn tiba ke, ti mu wo li ji u nnaamin. Ni ye ti yii u ke, u mu wo li yii ti

¹³ ni ye taa si bogiliba ke, uma le yin si bogiliba le, nan bu-n waa li fir yii u baantɔɔl a binbemi.

Uwonbɔr a num kaah gbee utoontunn wan

¹⁴ Li gbaa tiɛri bi tiwann nan biɛn na, kpaan bi Uwonbɔr buu, ke bin nyam tibɔyɔɔr a pagimin, taa jɔɔ nyɔɔri, amaa ni bii ban pelig nle.

¹⁵ Pɔɔn a ba ki ta a ba sei Uwonbɔr ke wan wee U ganniŋ, ke utoontunn wan kaa san ifa wee ki ŋmag Uwonbɔr a bɔr tan ye ibamɔn nin nbamɔm.

¹⁶ Nyam a ba tibɔr tan kaa kpaan nin uwonjiɛn li pag n-yaan, nan bu-n bininfob ban be man nmɔn a bol mann fɔbig le nin Uwonbɔr.

¹⁷ Bi wɔɔm nmɔn li yann ke libiɛl kaah pɔr tigbanann nin man nin. Bi ni bibam le ye Hamenasi nin Filetusi,

¹⁸ ban bor kaa nɔɔ ibamɔn a samin. Bi ke nkum a fiim pii jon na, mambu che bi bii bibam a yadau.

¹⁹ Nin ni ma biɛn yɔli, Uwonbɔr kaah pii bil lifiɛl lan nin sir nbamɔma, le u daagim a sɔbim paa li bu: “Uyudaan nyi ban ye u yaab,” le “Wan biɛn mu ban un nɔɔ Uyudaan ke, un kpenn u binbema ki nya titoonbir a tumin na.”

²⁰ Iniin takpen a poolin jɔɔ tiwann tan bi jɔɔ ŋaan tijiir a booli, naa ye salima nin tikur ninann a binba le bi ta naan ti, amaa tidaar nin tiyɔgir mu yaar be niin; bi jɔɔ tibam ki tun kuchiig daal le, le ki jɔɔ titɔ mu tun idaa biɛn a toon.

²¹ Ni ye uninfo ŋmag uba nin tibuchinn kaa tun tibir ke, bi li ta u ki tun ibuchin toon, yan ye kasi, ki ŋan sei Uyudaan wee ki ŋa sili nin un tun itoon ŋan nin ke.

²² Guun nya kuninfopɔŋ a kɔlisa birug n-yaan na, ki li jɔɔ nbuchin binben na, nin njiɛm, nin limɔril nin nposɔɔn, amaa wee ki li lig fin nin ban a sufu ween wee bi yi ti Yudaau ki ban literilin.

²³ Nyam a nɔɔ ijɔrig nin nlinliim a mɔkpel faalin na, nan bu-n a nyi ke ni jɔɔ ikɔn le chaan.

²⁴ Naa ŋan nin Uyudaan a toontunnu li ban ikɔn ni, amaa u li jɔɔ nbinben ŋan nin bininfob biɛn, ki li ye wan li fir wɔɔn, ki li jɔɔ limɔril.

²⁵ Ni kpaa le nin u li be soon ki fir wɔɔn ban yii u bɔrin, ki li jɔɔ tama ke Uwonbɔr li sei bi nkpenim man li wɔɔn bi ibamɔn nin,

²⁶ wee bi lam n jirin, wee bin ŋmar ki nya ulinlaril a peŋ kan wee u ta pen choo bi wee bi tun u bamin.