2 Timoti 1 - UWONBƆR A GBƆNPƆŊ LIKƆƆNL

¹ Min Pɔɔl wan ye Masiya a toom Uwonbɔr a bam bu-n, le u ke n mɔɔn limiɛfol a bɔr tan wee Uwonbɔr nan siin limɔsiinl Masiya bu-n,

² le n sɔb ki tenn Timoti wan ye n bibankaagin: Ti Baa Uwonbɔr nin ti Yudaau Masiya a nyunyunbasanl nin nposɔɔn li be a bu.

Kunɔɔpoog a seim nin Pɔɔninba

³ N poor Uwonbɔr wan wee n jiɛn u nan, ke n yaajam kaah nan ŋaan man nin, nin lipotiɛŋanl, n wonmiɛlin n tiɛr nibu n sufu ni, nween nin kunyiɛg.

⁴ N nan tiɛr a nyinyinn mɔɔŋin bu ke, ni ban n kaŋ le wee nin mɔŋim.

⁵ N tiɛr yada bamɔŋ kan wee a jɔɔ-n bu, ki ye yada kan wee a yaa Lɔsi nin a na Yunisi nan jɔɔ n-yaa booli le, le n nyi ke a tɔɔl jɔɔ yada nmɔn.

⁶ Ni niɛ nan bu le n tiɛriŋ ke a figir Uwonbɔr a piin yan be a ni-n, maah nan ta n nɔɔi ki paan a bu n-yonn man ni.

⁷ Uwonbɔr kaa ta Kinaaŋ kan li che ti san bijawaam le sei ti, amaa U sei ti Kinaaŋ kan li che ti jɔɔ npɔɔn le, nin njiɛm nin taah li dar tiba a tul man.

⁸ Mambu laa san ifa nin a ji ti Yudaau a siɛra bee min wan ye u loondikɔɔru win a siɛra, amaa Uwonbɔr a pɔɔm bu che min nin fin nlagin ki ji fala tibɔŋann nan bu,

⁹ Uma nan fee ti gab ki yin ti ke ti li be kasi a miɛfolin na, naa ye taah tun nan bu, amaa ni ye u baantɔɔl kaah lol man le nin u nyunyunbasanlin bu. U nan san ti kunyunyunbaag Masiya bu hali n-yonn man nan jon nin,

¹⁰ amaa daandaan nan ni kpiir ki wɔɔn ta, ti feegab daan Masiya wan degirin ti bu-n bu, wan nyaŋ nkum wee ki che limiɛfol nin tigbanann tan kaa kpegin nɔɔ tibɔŋann bu ki dan nin.

¹¹ Tibɔŋann nan bu, le Uwonbɔr nan gannim ki ŋaam umɔleenmɔɔn, nin ntoon nin wan wɔɔnn.

¹² Ni ma che n ji fala ke maah ji man nan. Nin ni ma biɛn ni, ifa kaa jɔɔmi, nan bu-n n nyi wan wee n ŋa u yada-n, le n nyi ke u sin li guurim ki nan kpaa u jirin daal.

¹³ Ŋaah gbir man n ban nin, li ŋmag nwɔɔm bamɔm man wee n ta wɔɔn niŋ nbamɔm, nin yada nin njiɛm Masiya bu.

¹⁴ Li ŋmag tinyɔɔŋann tan wee bi nan ta wɔɔniŋ nna, Kasi a Naaŋ kan be ti ni-n li teriŋ wee a fir ŋmag ti nbamɔm.

¹⁵ A nyi ke ban biɛn nan be Asiya a yerin n nan labir bi bɔɔn kpaa ma, bi ni bibam le ye Faajɛlusi nin Hɛrimojɛnesi.

¹⁶ N miɛ Uwonbɔr le ke un san Onesiforusi a niin yaab kunyunyunbaag, nan bu-n u ye wan nan pɔɔgir n sufu le, le ifa kaa nan jɔɔ wi nin tikulor tan nan lolim nbu.

¹⁷ Waah nan foon Rom a tiŋin nin, u nan bam le linunmanl hali ki nan kan n bol.

¹⁸ Ti yudaau n san u kunyunyunbaag u jirin daal! A baantɔɔl nyi waah nan terim Efesusi a tiŋin man.