2 Tesalonika 3 - UWONBƆR A GBƆNPƆŊ LIKƆƆNL

Ni miɛ Uwonbɔr sei ti ni

¹ Ni joorimin, n nabum, ni li miɛ Uwonbɔr ki tenn ta wee Uyudaan a bɔrin fir mɔɔn weem wee bin gaa ti nin jilima, ke naah nan gaa ti man nin.

² Ki ji miɛ Uwonbɔr ke un nyan ti bipootondam nin tininfobir a nɔɔn, nan bu-n naa ye uninfo biɛn le jɔɔ yada.

³ Amaa Uyudaan ye yada daan le, u li pɔɔg ni gbanann ki guur ni wee kininbɔŋ n laa kan ni.

⁴ Uyudaan che ti jɔɔ tidindann ni bu ke ni tun, ki le mann tun ke taah bei ni man nin.

⁵ Uyudaan n che ni biɛ Uwonbɔr a jiɛm nin limɔril lan nyan Masiya ban nin.

Naah kpaan ti tun itoon man

⁶ Uyudaan Yisa Masiya a yinl bu, le ti bei ni ke, n nabum, ni nyan ni num ki sin jiɛn n nabum man biɛn san ligbanyagil kaa be taah wɔɔn bi ke bi li be man nni.

⁷ Ni baan tɔɔl nyi nbamɔm ke ni ni ye ni li tun le ke taah tun man ni. Taah nan be ni ban nin, taa nan san ligbanyagil,

⁸ bee ki jin uba a jiir yɔli wee kaa yɔn ti bu. Amaa ti pɔɔn tiba le ki tun nween nin kunyiɛg, naah li ŋa man wee ti laa ye litugil ki sei ni ni uba.

⁹ Nan bu che ti tun nin kaa ye ke taa bi li fir ji ni wan yɔli amaa ti ŋa limagil le ki wɔɔn ni ke ni li nɔɔ.

¹⁰ Hali n-yonn man wee ti nan be ni ban ni, ti nan sei ni nsiim ke: “Wan yii kaa tun ke, u mu laa ji.”

¹¹ Ti gbir ke biba be ni sisiigin ki ye bigbanyagdam. Baa tun nin inunman ni; amaa le ki sin jɔɔ bi nɔɔi kɔɔn biba a bɔrin.

¹² Bininfob nmɔn a bol le ti jɔɔ Uyudaan Yisa Masiya a yinl ki kpaan bi ke bin pɔɔn biba wee ki tun ki kan bi tɔɔl a jiir ki ji.

¹³ Amaa nim ma bu ke, n nabum, ni laa ke ni bagir itoon ŋan a tum bu.

¹⁴ Ni ye uba kaa chee ti wɔɔnim man be kugbɔŋ nan yaan nan ke, ni li mann nyi u bu ki laa che ni baga be u ni, wee ifa n choo u.

¹⁵ Nin ni ma biɛn ni, laa ta man a ninfobol kpann a dataagi, amaa kpaan mu ke a nabigin.

Tibɔjoor kaar

¹⁶ Uyudaan wan ye nposɔɔndaan baan tɔɔl n sei ni nposɔɔn isaŋ biɛn nin niwann biɛn nin. Uyudaan li be nin ni biɛn.

¹⁷ Min Pɔɔl le taa n tɔɔl a nɔɔ ki sɔb ipoor nan, maah sɔb n yinl man kugbɔŋ biɛn a diɛmin le yen. Man le n sɔb.

¹⁸ Ti Yudaau Yisa Masiya a nyunyunbasanl li be ni biɛn bu.