2 Korenti 9 - UWONBƆR A GBƆNPƆŊ LIKƆƆNL

Biwonjiɛm kaah ter tab man

¹ Naa kpaa talar nin n sɔb kugbɔŋ ki bei ni naah li tun ki tenn biwonjiɛm man ni.

² N nyi naah ban ni ter bi. N gbaa far ligbingbanl le ni bu Masedoniya yaab ban, ki bei bi ke nim ban be Akaya a timin ni, jirib n-yaan ni nan ŋa sili le nin ni ter, ni yaa nunmanl bu che Masedoniya yaab mu ban bin ter le.

³ Amaa n tun ti nabum nan le ke taah nan far ligbingbanl nan bu-n kaa ye yɔli, amaa ni ŋan ni ŋa sili ke maah pii bei bi man ni.

⁴ Ni ye Masedoniya a tiŋ a ninfob nan nɔɔm foon ni ban ki miin naa la ŋa sili ke, ifa li jim, le naa ye n yaa binba le ifa nmɔn yin ji amaa ti biɛn a fai, nan bu-n ti nan fa ligbingbanl nibu bi ban na.

⁵ Mambu le n tiɛr ke ni ŋan nin n balin ti nabumin, wee bi chinn gɔnn ni wee ki mann tibuchinn a piini yan wee ni nan siin limɔsiinlin ki diɛ. Le i ŋa sili ke ibuchin piin ni, ni ma wɔɔn ke ni ŋa ni tɔɔl a bamin le naa ye uba le mug ni.

⁶ Ni li tiɛr ni niɛ, wan bun idi wama ke u na yin chiɛ wama le, le wan mu bun idi nin tibuchinn ke u mu na yin chiɛ takpem le.

⁷ Uninfo biɛn n pu u piini waah tiɛr man u sufu ni, ki laa pu nin npoobiin ni, bee uba n mug wi, nan bu-n Uwonbɔr ban wan pu ipiin nin npopeen le.

⁸ Le Uwonbɔr le che U nyunyunbasanl takpem li be ni bu, wee niwann biɛn nin iyoo biɛn ke, ni li jɔɔ naah ban nan biɛn, wee ni che ke ni fir tun itoon biɛn.

⁹ Ke naah sɔb Uwonbɔr a gbɔŋin ke, “U ta U piin ki yaal sei faladam U buchin kaa jɔɔ diɛmi.”

¹⁰ Uwonbɔr wan tenn bininfob idibool wee bi bu-n, ki ji tenn bi tijiir wee bi ji-n, U ma le li sei ni idibool ki che yin nɔb, man le U li che ni chiɛ ibuchin di takpem.

¹¹ Ni li ŋa biwandam niwann biɛn ni, wee ki li pu kulaguŋin iyoo biɛn, tim bu ni piini nmɔn li kpann kupag ki tenn Uwonbɔr.

¹² Litoonl lan wee ni tun nan kaa pa ye nan tenn biwonjiɛm baah ban nan le, amaa nitɔɔl che Uwonbɔr ga npagim le takpem.

¹³ Naah ter bi nbu, ni ma wɔɔn naah ye ban, bininfob li pag Uwonbɔr nin limɔcheel lan wee ni jɔɔ ki kpenn ni binbem ki sei Masiya u bɔŋann nbu-n, nin naah por ipiin ni ki sei bi nin bininfob biɛn man.

¹⁴ Baah miɛ Uwonbɔr ki tenn nin, bi sufu le kun ni, Uwonbɔr kaah ta nyunyunbasanl lan kaa jɔɔ tarig ki sei ni nbu.

¹⁵ Ni che ti sei Uwonbɔr kunɔɔpoog, nin waah sei ti ipiin yan kaa jɔɔ nmagimi.