2 Korenti 5 - UWONBƆR A GBƆNPƆŊ LIKƆƆNL

¹ Ti nyi ke dulinya nan a gbanann tan nann kunanboŋ wee ti be nan ber ke, ti jɔɔ iniin yan wee Uwonbɔr maa, iniin yan kaa jɔɔ nlumi ki be Uwonbɔr a niin, iniin yan wee uninfosaal kaa maa yi.

² Ni bu ti nin jegil le ki guu lidaal lan wee Uwonbɔr naah li ta ti ki kɔɔn iniin nmɔn yaan.

³ Nan bu-n ti nan kɔɔ iniin nmɔn yaan ke, taa na yin gaan ni.

⁴ Amaa taah be tigbanann tan nann kunanboŋin nin, ti dun le ki fabin. Naa ye ke taa ji ban tigbanann nin a binbem le, amaa ti ban Uwonbɔr a niin le, wee lidaal nan foo ke limiɛfol n nan niɛ tigbanann tan kpegin wee nin diɛ.

⁵ Uwonbɔr le ŋa ti sili ki guun nan be nan paam, ki ta u Naaŋ ki sei ti le ni ye siɛra ke u li sei ti nan biɛn wee U siin limɔsiinlin.

⁶ Ni ma bu, ti jɔɔ tidindann le iyoo biɛn ki nyi ke taah be tigbanann a niin yin ni, taa be Uyudaan ban ni.

⁷ Yada bu le ti be, taa be ti num kaah ga nan nin bu.

⁸ N len na, ti jɔɔ tidindann, n bi li ban ke na ti pii bi nyan tigbanann a niin nan yaan na ki kun Uyudaan ban na.

⁹ Nibu, ti num man le nin ti penn u sufu, taah be tigbanann a niin nan yaan, bee taah kaa be ti yaan ni.

¹⁰ Nan bu-n ti biɛn na li sir Masiya a nintogil tibɔr a ji daal; uninfo biɛn na li gaa u yɔr u toon kaah nan ye man waah nan be tigbanann nan yaan ni, naah ŋan naa, naa kaa ŋan naa u yɔr le yen.

Taah ŋa Uwonbɔr a jɔtiib Masiya bu man

¹¹ Mambu, ti nyi naah ye ti li san Uwonbɔr man, nibu le ti pɔɔgir bininfob a gbanann baah li ta biba ki jirin u ban man. Uwonbɔr nyi ti binbem kaah be man, le n jɔɔ tama ke ni mu nyi n sufu ni naah ye man.

¹² Naa ye ti pagir tiba le ni ban jigin ni, amaa ti tenn ni nsan le, wee ni fir faa igbingban ti bu, naah li ŋa man wee ni fir kan njiim ki sei ban far igbingban baah ga nan nbu ki jon nan be sufu nin bu.

¹³ Ni ye ti yelig le ke, Uwonbɔr bu le ti ye man; ti mu kaa ji yelig ke, nim bu le ti ye man.

¹⁴ Masiya a bamin le ŋmag ti, taah biɛ ke uninfo uba le kpo ki sei bininfob biɛn ni, ni bu bininfob biɛn kpeg le.

¹⁵ Bininfob biɛn bu le u nan kpo, ke ban fo-n la ji be bi ba bu, amaa ki li be ke wan nan gaa bininfob biɛn a kum ki kpo ki ji fiin nkumin ni.

¹⁶ Daandaan nan ki jɔɔ chaa, taa ji lig uba ke dulinya nan a ninfob kaah lig u man nni. Hali taah nan lig Yisa man ni, taa ji lig u man ni.

¹⁷ Ni bu uninfo wan be Masiya ban ke, udaan nin ye uninfopɔɔn le, u binben kpegim nbiɛn jon na, le nbinben pɔɔn dan!

¹⁸ Ni niɛ biɛn nyan Uwonbɔr ban le, u ma che ti jir mɔŋ nin U Masiya bu, le ki sei ti jir mɔŋ a toon.

¹⁹ Ke Masiya bu le Uwonbɔr jir ki mɔŋir nin dulinya a ninfob, kaa ji kaan bininfob a bir tan wee bi tun ni. Le ki ta jir mɔŋ a bɔr ki sei ti.

²⁰ Mambu ti ye ban si Masiya a taalin le, le Uwonbɔr be nin ti ki che ti yi bininfob. Yisa bu le ti balin ni: Ni jir ki mɔŋ nin Uwonbɔr a.

²¹ Tim bu le Uwonbɔr nan che wan kaa jɔɔ tibir labir tibirdaan, u ma bu le ti na yin ŋa Uwonbɔr a buchim.