2 Korenti 13 - UWONBƆR A GBƆNPƆŊ LIKƆƆNL

Ikpaan joorikaa nin ipoor

¹ Ni niɛ le yin kpiɛ maah gɔnn ni nfim mitaa. “Ni kpaa talar le nin tibɔr biɛn li jɔɔ siɛradam bilee bee bita.”

² N pii nan sei ni ikpaan maah nan be ni ban nfim milee nna. Daandaan nan hali maah kaa le ji be ni ban ni, n le ji kpaan ni le. N nan jirin ke, maa yin jiɛn ban pii chinn ŋa tibir bee ban gurin a tuli a darimi,

³ naah ban ni biɛ ke Masiya le sin jɔɔm ki pagi. Waa ye kidaburig le ni sisiigin ni, u jɔɔ npɔɔn ni ban.

⁴ Nin ni bamɔn, bi nan kpaa u lidapunpunl bu u daburigi ni, ni biɛn yɔli u jɔɔ limiɛfol Uwonbɔr a pɔɔm bu. Man nmɔn bu le ti mu jɔɔ u daburigi nmɔn, ni biɛn yɔli Uwonbɔr a pɔɔm bu ti mu li jɔɔ limiɛfol nin Yisa ki tun ki tenn ni.

⁵ Ni mag ni bau njee ni sin be nin yadaa; ni baan ni bau. Naa nyi ke Masiya be ni ban naa? Wee naa ye ni lu ni magilin le-n.

⁶ Le n ga jin ke ni li biɛ ke taa lu limagilin ni.

⁷ Daandaan nan ti miɛ Uwonbɔr ki tenn ni ke ni laa tun niba a biri. Naa ye ke bininfob n kan taah nyaŋ limagilin man ni, amaa ti ban ni tun nan ŋan, hali gbaa ni yin nann ke ti walin gur le-n.

⁸ Taa li fir tun niba ki bii ibamɔn nmɔn ni, amaa ti le yin tun ibamɔn le.

⁹ Ni mɔ ti le n-yonn man wee ti jɔɔ idaburig amaa wee nim pɔɔ ke; ti wonmiɛl ye nan li mann ni le.

¹⁰ Mambu le n sɔb kugbɔŋ nan ki tenn ni, ni ye maa be ni ban ke, wee ki nan dan ni ban n-yonn man ke n laa fiin n ŋuul npɔɔm bu. Ti yudaau nan seim npɔɔn nmɔn ke n ter ni le, naa ye n bii ni.

¹¹ Ni joorimin n nabum, n chabir ni le, ni li ban nbinben ŋan na, ni gbirim maah len nan nan, ni li jɔɔ lipotiɛl libau, ki li be nin nposɔɔn, le Uwonbɔr wan jɔɔ njiɛm nin nposɔɔni li be nin ni.

¹² Ni li poor tab nbamɔma.

¹³ Biwonjiɛmin biɛn poorin ni.

¹⁴ Ti yudaau Yisa Masiya a nyunyunbasanl nin Uwonbɔr a bam, nin Kasi a Naaŋ a mɔkpaam li be ni biɛn ban.