2 Korenti 12 - UWONBƆR A GBƆNPƆŊ LIKƆƆNL

Pɔɔl kaah kan zii nin tibɔkpiirikaar man

¹ Ni le ye n li far ligbingbanl le. Hali nin naah kaa jɔɔ tinyɔɔr nan biɛn ni, n li wɔɔn ni zii nin tibɔkpiirikaar tan nyan Uyudaan ban.

² N nyi uja uba wan ye Masiya a ninfou, wee Uwonbɔr nan taa u don papaab. Ni bin piig nin ina sɔ. Maa nyi njee ni nan ye tigbanann le bee naah kaa nan ye tigbanann ni, maa nyi, Uwonbɔr a binba le nyi.

³ Le n nyi uja nan naah ye tigbanann bee naah kaa ye tigbanann ni maa nyi, amaa Uwonbɔr ma nyi,

⁴ le u don paab, nin yaan nmɔn le u nan gbir imɔbon yan wee uninfosaal kaa jɔɔ npɔɔn nin un pagi.

⁵ N li fa ligbingbanl uja nan a bosu bu, amaa maa li fa ligbingbanl n baantɔɔl bu, see n daburigi a binba bu.

⁶ Hali ni ye n gann ki ke n fa ligbingbanl ke, maa li ŋa kujɔrugi, nan bu-n n yin pag ibamɔn le. Amaa maa yin fa ligbingbanli, wee nin che uba npagim ki jo npagim man kpaan nim mi ki jiin maah tun man bee maah pag nan ni.

⁷ Nan bu wee maa far ligbingbanl ki tan lagirin ye maah nan kan kpiir wɔɔn takpem nbu, le nkunkon man ye Sintani a toom min chɔgim ki paar be n gbanann ni ke nin mugirim wee n laa donn n baa ki tan lagiri.

⁸ N balin Uyudaan nfim mitaa ke un nyan nkunkon nmɔn n ban na.

⁹ Amaa le u beim ke, “Maah saŋ kunyunyunbaag man ni kpaan nin ŋa, N pɔɔm jɔɔ yaag idaburigin le.” Ni bu n li fa ligbingbanl takpem n daburigi yin bu, wee Masiya a pɔɔm li be n ban.

¹⁰ Mambu, Masiya le che n num gbee, n daburigin, n sugirin, limugilin, fala a poolin, ki ga tibɔmugkaar. Ni ye idaburig choom ke, iyaayoo le n jɔɔ npɔɔn.

Pɔɔl a baga kaah be Korenti yaabin man

¹¹ N ŋa nba le kujɔrug, amaa nim le che n ŋa man. Nim le bi li pagim, nan bu-n hali maa le ye niba ke, amaa ban lar ke bi ye “itoon pɔɔndamin,” kaa jomi.

¹² Nan wɔɔn ntoon kaah ye wan ye siɛra nin limagil nin ligaril a toonl le. N nan tun ni niɛ biɛn ni ban nin limɔril le takpem.

¹³ Ba a bɔgirim be nim nin ni wonjiɛn tab bimiɛnin a sisiigin naa? Maah kaa nan ye litugil ki sei ni nbuu? Ni jiɛn per ma.

¹⁴ Daandaan nan n ŋa sili le ke n dan nan gɔnn ni wee nin kpiɛ nfimitaa. Maa nan yin ye litugil le ki sei ni, nan bu-n naa ye naah jɔɔ nan nle n ban ni, amaa nim le n ban. Nan bu-n naa ye nbuwaab le ban tiwann ki siig ban ye bi, amaa ban ye bi le ban tiwann ki siig nbuwaab.

¹⁵ Ni li mɔŋim pam, ni ye n ta n faal biɛn nin npɔɔm ki ter ni ke. Ni ye n ban ni takpem ke, nim ma yin bam wama lee?

¹⁶ Ni che ni li ye man na, maa ye litugil ki sei ni. Nin ni ma biɛn ni, ni ke n ye kibibirig le ki pen choo ni!

¹⁷ Maah tun bininfob ban ni ban nin, bi ni uba jin ni dulim min buu?

¹⁸ N nan balin Tatusi ke un dan ni ban, ki ji nan che ti na a big kiba mu chiɛn u. Tatusi nan nyi ki jin ni dulim waa? Min nin u ma kaa piɛ kinaaŋ le nin nsan n baa?

¹⁹ Ni tiɛr ke ti degin tiba le ni ban naa? Ti be Uwonbɔr a nintogil le ki pag ke ban be Masiya-n ni; n jɔtiib, nan biɛn wee ti tun ni, ni ye nan li sei ni ngbananpɔɔn le.

²⁰ N lam yugir nin n dan wee kaa na yin kan ni maah ban ni li be man nni, wee ni mu kaa yin kam naah ban n li be man ni. N san bijawaam le nba ke limɔkpel na li be, bee lipiiponl, bee lijagaal, bee nbɔgirim bee kutingbiig, bee libɔɔnsul bee kalanbaani chɔgiŋ, nin kuŋmaruŋ.

²¹ N san bijawaam le ni ye n ji jirin ni ban ke Uwonbɔr li seim jiininba ni nintogil, n na li jɔɔ lisufubiil nin ban tun tibir wee kaa la kpenn bi binbemin ki nyan tijaginn nin iwanjaab toon nin nwanchɔgin binben, ni ma nin ye bi tooi.