2 Korenti 10 - UWONBƆR A GBƆNPƆŊ LIKƆƆNL

Pɔɔl kaah kɔn u tooi bu man

¹ Min Pɔɔl wan jɔɔ jiininba nin nbinben ŋan Masiya ban ni, le tenn ni bimɔb nan, min wan wee ni ke n be ni ban ke n san bijawaamin amaa wee n nyan ngbaan ke n jɔɔ lipoobilin!

² N balin ni le ke n nan dan ni ban n-yonn man ke n laa jɔɔ lipoobil a li ke maah tug man ki jiin ban tug ke ti be dulinya nan a binbem le nni.

³ Ni ye ibamɔn le ke ti be dulinya-n le, amaa taa kɔn dulinya nan a kɔnli.

⁴ Tikunkɔntiɛr tan wee ti jɔɔ kɔn likɔnl nmɔn ni, kaa ye dulinya nan a kunkɔntiɛri. Amaa ti ye tan jɔɔ Uwonbɔr a pɔɔm man li fir bii Sintani a pɔɔm le.

⁵ Ti pag bii limɔkpel nin kalanbaanidam ban ke bi jɔɔ nlam ki jon Uwonbɔrin. Ti nyaŋir ipotiɛ biɛn, ki che ni cheel Masiya a mɔb.

⁶ Ni ye ni jɔɔ limɔcheel ke, ni bɔɔn bu ti mu li ŋa sili ki dar tukangbirdam biɛn a tuli.

⁷ Nim lig nan wee uninfo fir ga nin u numbim a binba nle. Ni ye uba jɔɔ tidindann ke u ye Masiya yaau ke, u li nyi ke ti mu ye Masiya yaab le, ke waah ye man ni.

⁸ Hali ifa kaa li jɔɔ mi, ni ye n fa ligbingbanl npɔɔn man wee ti Yudaau sei ti ke ti ter ni nbu ke, amaa wee kaa tir ni jaa tum ke, ifa kaa li jɔɔm mambu.

⁹ Maa ban n li sɔb n gbann nan ki yugin ni lami.

¹⁰ Bininfob biba ke, “Pɔɔl a gbann ni nann le ke upɔɔndaan uba-n, amaa le u nan foon ti ban n-yonn man ke, u ye ulanjiin le, le u mɔboi kaa ji jɔɔ npɔɔn ni.”

¹¹ Ni ŋan bininfob nmɔn nbiɛ ke taah kaa be ni ban wee ki sɔb tigbann nin ke ti tun man ni, ti nan foon n-yonn man ke, man le ti yin tun.

¹² Taa ban ti ta tiba ki bigin nin ban donn biba. Ni ye bi bigin biba ki jɔɔ biba ki wɔɔn tab ke, baa jɔɔ nlami.

¹³ Amaa tim ma, taa li don tiba ki jo ti toon kaah ye man ni, amaa ti le yin che ti gbingbanfaal be Uwonbɔr kaah sei ti itoon yan ni yaan le, itoon yan for ni ban ni.

¹⁴ Taa far ligbingbanl ki lagiri, a li ke taa bi dan ni ban le ke, ti bi li fa lagir, nan bu-n ti nan ta Masiya a bɔŋanni ki wɔɔn na.

¹⁵ Taa far ligbingbanl ki lagir bininfob biba a toon bu. Ti jɔɔ tama ke, ni yada kaah yabirig chaa-n, ti toon kaah ye nan ni sisiigin li yabig takpem,

¹⁶ wee ti li fir jo ntim man fɔg ki jon ni yaa tiŋin, ki mɔɔn tibɔŋann nmɔn. Taa ban ti fa ligbingbanl uba kaah tun nan u yerin nin ni.

¹⁷ Amaa “Wan far ligbingbanl ke, un faam u gbingbanl Uyudaan bu.”

¹⁸ Naa ye uninfo wan pagir uba le bi num gbee, amaa see wan wee Uyudaan a num gbeen.