1 Tesalonika 4 - UWONBƆR A GBƆNPƆŊ LIKƆƆNL

Nbinben man gbeeg Uwonbɔr a num

¹ N nabum, ni joorimin, ti wɔɔn ni na li ŋa man wee ni binbem li gbeeg Uwonbɔr a num, ke naah pii be man nin. Daandaan nan ti balin ni le ki bei ni ke ni le li gbaa be man na Uyudaan Yisa a yinlin.

² Ni nyi nwɔɔnim man wee ti ta sei ni Uyudaan Yisa a pɔɔmin.

³ Ni ye Uwonbɔr a bam le ke ni li be kasi wee ki nyan ni ba iwanchɔgin toon nin ni jabanlin bee ni piibanlin;

⁴ ke ni biɛn n tinn ki biɛ naah li ŋa man ki fir ŋmag ni baan tɔɔl a gbanann kasi nin jilima a binbemin,

⁵ ki laa jɔɔ nmɔsanyunsɔɔm ke ban kaa ye Juu yaab wee kaa nyi Uwonbɔr n kaah be man n ni;

⁶ ni ma bu tibɔr nan yaan uba laa tun ki bii u kpiɛg bee ki ji u kpiɛg dulimi. Uyudaan li dar bininfosaalib ban biɛn tun tibir nan a booli a tul, ke taah pii chinn bei ni ki kpaan ni man nin.

⁷ Uwonbɔr kaa yin ti ke ti li jɔɔ tijaginn ni, amaa ke ti li jɔɔ kasi a binbem.

⁸ Mambu uninfo wan yii kaa nɔɔ nwɔɔnim nan ke, naa ye uninfosaal le u yii amaa u yii Uwonbɔr wan sei ni U Kasi a Naaŋin le.

⁹ Daandaan nan ki jiin kunabitiig a jiɛmin paam, naa ji ye ti sɔb le ki sei ni, Uwonbɔr le wɔɔn ni tɔɔl naah li jiɛ tab man.

¹⁰ Le ni ye ibamɔn le, ni sin ban n nabum man biɛn be Masedoniya a tiŋin nin. Jigin ti balin ni le ke ni mann tun man takpema.

¹¹ Ni che ni li ye ni toonl ke ni li be nbinben ŋan, ki che ni baga li be ni tɔɔl a toon yin ki li jɔɔ ni nɔɔi tun ki jiu, ke taah bei ni man nin,

¹² naah li ŋa man wee ni binbem li ye jilima ki sei ban kaa ye biwonjiɛmin, wee ni laa be uba bu.

Uyudaan a dam

¹³ N nabum, taa ban ni li be ki laa nyi ban dɔɔn jiɛn nin bu, bee ki jɔɔ npoobiin ke bininfob ban gur kaa jɔɔ tama-n kaah be man nni.

¹⁴ Ti ŋa yada ke Yisa kpo ki fii nkumin na, ni ma bu che ti jɔɔ yada ke Uwonbɔr le ŋmagin ban nan dɔɔn jiɛn Yisa nni ki dan.

¹⁵ Uyudaan baan tɔɔl a mɔbonl le ti bei ni ke, tim ban la be ti miɛfolin wee ki guu Uyudaan a damin, taa na yin chinn ban dɔɔn jiɛn nni.

¹⁶ Uyudaan baan tɔɔl li nya papaab ki jiirin, ki nan sei bimɔb nin nkukɔ pɔɔn wee ti gbir malakam a ninkpelu a kukɔl nin Uwonbɔr a natun yinkaagin a mɔr, le bininfob ban nan gaa Yisa wee ki nin kpe-n li chinn fii nkumin.

¹⁷ Le ni bɔɔn bu, le tim ban mu la fo wee ki gur be dulinya nan yaan nin mu li yug lagin nin bi ki too Uyudaan kitilangbɔŋin. Le ki nin gbaa be nin Uyudaan iyoo biɛn.

¹⁸ Mambu ni ta imɔbon nan ki pɔɔg tab a gbanann na man.