1 Piita 5 - UWONBƆR A GBƆNPƆŊ LIKƆƆNL

Uwonbɔr a peei

¹ Nim ban ye bininkpeeb ni sisiigin ni, n balin ni le maah ye ni ninkpekpiɛgin, wan jin siɛra Masiya a fala a jim nin min wan na li kan n tol u pag a kpiirimin nin:

² Ni li kpaa Uwonbɔr a peei yan wee u taa ŋa ni nɔɔn nin na, ki li tun ke uwonjiɛn sanliira wee ni laa ye bi mug ni le amaa ni tɔɔl a bam bu, ke Uwonbɔr kaah ban ni li be man nin; kaa ye ilig a bam bu, amaa ki li ye ban ŋa sili nin ni tun;

³ ki laa ta ni mug ban wee Uwonbɔr ta bi ŋa a nɔɔn nin ni, amaa che fin le li ye limagil ki sei ipee nmɔn.

⁴ Wee upeekpaabɔr nan degirin ke, a kan kupag a yuchigirig kan kaa wiirin.

⁵ Binaachipɔm, man mu li ye ni, ni li jɔɔ limɔcheel ki tenn ban jon ni. Ni biɛn, ni ta jiininba ke tiwann yɔɔr tan wɔɔn ke ni jɔɔ jiininba ki sei tab, nan bu-n, “Uwonbɔr yiin kalanbaanidam le, amaa le ki san jiininbadam kunyunyunbaag.”

⁶ Mambu, ni jiin niba, Uwonbɔr a nɔɔ man jɔɔ npɔɔn nin ban na, wee iyoo nmɔn nan foo ke, u nan don ni paab.

⁷ Ni taa ni bɔmugkaar biɛn ki sei wa nan bu-n u baga be nin ni.

⁸ Ni choom niba ki li nyi niba bu. Ni dataag ulinlaril le choon le jin ke ugbegin wan ŋuun ki ban uninfo un choo niɛ-n.

⁹ Ni laa chee, ki li ŋmag ni yada kenken na, nan bu-n ni nyi ni nabum ban be dulinya munl nan biɛn be man a fala ni le.

¹⁰ Le Uwonbɔr wan ye linyunyunbasanl biɛn daan ni, wan yin ni ke ni kan u pag kan kaa jɔɔ diɛm Masiya nin, naah jin fala wama a bɔɔn nin, Uma tɔɔl le ji li jiin ni siin ni yada-n ki che ni pɔɔg, le ni sir kenken.

¹¹ Uma kpaan nin npɔɔn n-yonn yan kaa jɔɔ diɛmi. Ibamɔn.

Ipoor yan joor

¹² Silasi wan wee n nyi ke u ye uwonjiɛn ibamɔn nin, li terim le n sɔb kugbɔŋ nan wama, ke n pɔɔg ni gbanann wee nin jin siɛra ke nan be nan ye Uwonbɔr a nyunyunbasanl le ibamɔn. Mambu ni li ŋmag ni nin nbamɔma.

¹³ Ni nabum ban be Babilɔnn ki ye ban wee Uwonbɔr nan lagin gann nin nimin, poor ni, le n bija Mag mu poor ni.

¹⁴ Ni li poor tab nin njiɛma. Nposɔɔn li be nim ban biɛn be Masiya ni-n.