1 Piita 4 - UWONBƆR A GBƆNPƆŊ LIKƆƆNL

Nbinben a kpenim

¹ Mambu, Masiya kaah nan jin fala u gbanann nin man nin, ni ŋaam sili ki li ŋmag u binbem nmɔn na, nan bu-n wan jin fala u gbanann nin nin diɛ tibir a manuga.

² Naah ŋa man nin, waa che u binbem a joorim dulinya nan yaan ye tigbanann a kɔlisa, amaa Uwonbɔr kaah ban man.

³ Nan bu-n ni nan jin isaŋ takpem le iyoo yan nan jon nin ki tun nan wee ban kaa ye biwonjiɛmin gann ki tun. Bi nan tun nan ye nwanchɔgin toon, nin kɔlisabirug, nin lidanyugbeel, nin lidanyugbeel a toonbir, ki lagin tab ki nyu ndaam gbeeg, ki mann ibawol.

⁴ Bi tiɛr ni ye tichann le naah kaa ji kɔɔn nin titoonbir a toon takpemin ni, mambu le bi lagin tisugir ki tunn ni.

⁵ Amaa bi na li pag baah tun man ki sei wan ŋa sili ki li ji ban fo nin ban kpo a bɔrin.

⁶ Ni nan bu le bi nan mɔɔn tibɔŋann nin hali ki sei ban kaa ji be bi miɛfolin daandaan nan nin, wee bin ji bi tibɔr uninfosaal a gbanann bu, amaa le bi li kan limiɛfol kinaaŋin bu.

Ban ŋmag Uwonbɔr a piini nbamɔm a bɔr

⁷ Tiwann biɛn a diɛm mala. Mambu ni che ni potiɛri li ween na wee ki li chor ni ba wee ni li fir miɛ Uwonbɔr.

⁸ Nan jon niwann biɛn ye ni li jiɛ tab le nbamɔm, nan bu-n njiɛm deginn tibir takpem bu le.

⁹ Ni li gaan tab kuchɔŋa ki laa ŋulin tab bu.

¹⁰ Uninfo biɛn n taam ipiin yan wee Uwonbɔr sei win, ki ter u kpiɛtiib nbamɔm nin nŋmagŋam Uwonbɔr a nyunyunbasanl kaah ye man balbal.

¹¹ Ni ye uba pag ke, u li pag tibɔr tan ye Uwonbɔr a mɔleen ya. Ni ye wan yin tun ke, u li tun nin npɔɔn man wee Uwonbɔr ta sei win na, wee niwann biɛn ni Uwonbɔr a yinl n kan kupag Yisa Masiya bu. Kupag nin npɔɔn ye u yaan le hali nin iyoo yan kaa jɔɔ diɛmi. Ibamɔn.

Uwonjiɛn kaah li ji fala man

¹² N jɔtiib, ni laa che nin gar ni nin naah ji limagil a nanwi a fala-n ni, a li ke ni ye tiwanchann le ni ban ni.

¹³ Amaa ni che ni li mɔ na nin naah por ki ji Masiya a fala-n bu, wee ni nan kan nmɔn takpen u pagin a kpiirimin.

¹⁴ Ni ye bi sug ni Masiya a yinlin bu ke, ni kan tikaara, nan bu-n Kinaaŋ a pag nin Uwonbɔr be nin ni.

¹⁵ Ni ye ni jin fala ke, nin laa ye ke uninfokur a fala a jimi bee unaayig bee wan tun titoonbir biɛn ni, bee wan tugin bininfobi.

¹⁶ Amaa uninfo jin fala waah ye uwonjiɛn nbu ke, u laa san ifa, amaa udaan npag Uwonbɔr nin waah jɔɔ uwonjiɛn a yinl nmɔn na.

¹⁷ Ni ma bu isaŋ foou nin Uwonbɔr npiin ki ji U niin yaab tibɔra; ke ni ye ni yin piin nin tim ke, ke ban kaa chee Uwonbɔr a bɔŋann nin yaal na li be nii?

¹⁸ Le, “Ni ye ni pɔɔ ki sei nin bibuchim nkan nŋmarim ke, ke ban kaa jɔɔ nween nin tibirdam yaal na li be nii?”

¹⁹ Mambu, ban ji fala Uwonbɔr a bam bu-n bi le li tun nan ŋan na, ki ta biba ki sei bi yada daan wan naan bin ki le li tun nan ŋan iyoo biɛn na.