1 Korenti 15 - UWONBƆR A GBƆNPƆŊ LIKƆƆNL

Masiya a kum a fiim

¹ N nabum, n ban n tiɛr ni maah nan mɔɔn tibɔŋann tan ki sei ni wee ni gaa ti ki ŋmag nle.

² Tibɔŋann nan bu ni ŋmara, ni ye ni ŋmag tibɔr tan wee n nan mɔɔn sei ni nbamɔm ke. Naa ye man ke ni yada li gab yɔli.

³ Nan wee n gaa-n ni ma le n mu ta sei ni le ni ye nan kpaa talar chinchinn: Ke Masiya kpo ti yaa bir bu le ke naah sɔb Uwonbɔr a gbɔŋ man ni,

⁴ le bi nan pii u, le u fii nkumin iween itaa daal ke naah sɔb man ni,

⁵ u nan degirin Piita bu, le ki ji degir u tooi piig nin bilee-n mu bu.

⁶ Ni bɔɔn bu le u nan degir u nabum ban nan yab ki jon bininfob kobiŋmu-n bu n-yonn nmɔn, bi ni takpem la be bi miɛfolin, amaa biba ma kpou.

⁷ U nan degir Jemisi bu, le ki nan degir u tooi nbiɛn bu.

⁸ Ni biɛn nan a joorim, le u degir min tɔɔl bu, min wan wee u nan yim ke uyom a dann ni.

⁹ Min le nan joor bɔɔn itoon nmɔn yaan kaa bi kpaan nin bi li yim ntoon ni, nan bu-n n nan mugir Uwonbɔr a ninfob le.

¹⁰ Amaa Uwonbɔr a nyunyunbasanl bu le n ye maah ye wan nan, le u nyunyunbasanl lan be n ni nmɔn kaa ye yɔli. Nan bu-n n tun ki jon itoon nin biɛn na, amaa naa ye min le tun ni Uwonbɔr nyunyunbasanl lan nan be n ban ni-n le tun.

¹¹ Ke naah ye min bee bi miɛ ni, tibɔŋann nan le ti mɔɔn, tibɔŋann nmɔn le ni mu ŋa ti yada.

Ti kum a fiim a bɔr

¹² Amaa ni ye tibɔrin mɔɔn ke Masiya nan fii nkumin na ke, niin wee nim bibam ke nkum a fiim kaa bee?

¹³ Ni ye nkum a fiim kaa be ke, Mambu ke Masiya gbaa tɔɔl kaa nan fii nkumin ni.

¹⁴ Masiya kaa nan bi fii nkumin ke, taah mɔɔn tibɔŋann tan ni ye yɔli le, nin ni yada wan wee ni ŋaan.

¹⁵ Mambu ke ti ŋa tibɔkar a siɛradam ki sei Uwonbɔr a, nan bu-n ti jin siɛra ke Uwonbɔr nan fiin Masiya nkumin na. Amaa nkum a fiim kaa be ke, man ke Uwonbɔr mu kaa nan fiin Masiya nkumin ni.

¹⁶ Ni ye nkum a fiim kaa be ke, man ke Masiya tɔɔl kaa nan fiin nkumin ni.

¹⁷ Masiya kaa nan bi fii nkumin ke, ni yada bi ye yɔli le, le tibir la be ni bu.

¹⁸ Ni bi wɔɔn ke ban kpo nin Masiya-n bora.

¹⁹ Ni ye taah be ti miɛfolin nin bu le ti jɔɔ tama nin Masiya ke, man ke ti jɔɔ kunyunyunbaag ki jon bininfob biɛn na.

²⁰ Amaa ni ye ibamɔn le, Masiya sin nan fii nkumin na, u ma ye chinchinn a ninfou wan fii nkumin.

²¹ Uninfo kaah nan ta nkum ki dan dulinya nan yaan ni, man mu le uninfo ji ta nkum a fiim ki dan.

²² Adam bu le bininfob biɛn kpeg, Masiya mu bu bininfob biɛn li kan limiɛfol.

²³ Uninfo biɛn nin u kum a fii yoo, Masiya le chinn fii, le ban ye u ninfob mu na li fii u jirin daal.

²⁴ Ni bɔɔn bu le dulinya a diɛm nfoon, u nan nyaŋ nnaam kaah ye niwann nan biɛn nin mi pɔɔm ke ni bɔɔn bu u yin ta nnaamin ki ŋa u Baa Uwonbɔr a nɔɔn le.

²⁵ Masiya le yin ŋmag niwann biɛn ki tan kpaa iyoo yan wee Uwonbɔr na li nyaŋ u dataam biɛn.

²⁶ Kidataag kan wee u na li bii joor ye nkum le.

²⁷ “U ta niwann biɛn ki ŋa u nɔɔn na.” Amaa naa wɔɔn ke Uwonbɔr tɔɔl kpiɛ niin ni, U ma ta niwann biɛn ki ŋa Masiya a nɔɔn.

²⁸ Ni ye U tun ni niɛ nan ke, bija-n tɔɔl yin be u ma wan ta niwann biɛn ŋa u nɔɔn n ban le, le Uwonbɔr nin ye niwann biɛn ki ŋmag niwann biɛn.

²⁹ Daandaan nan ni ye, nkum a fiim kaa be ke, baah fun ban bitakpiib a nyunfulin yin ŋa nii? Ni ye bitakpiib kaa fii nkumin ke, ba ŋa wee bininfob fu nnyum ki tenn baa?

³⁰ Ke babu wee ti le be kininbɔŋin iyoo biɛn naa?

³¹ N nabum, n be nkum a daŋin le lidaal biɛn, n jɔɔ ligbingbanfaal nin taah jɔɔ nbinben man ti Yudaau Masiya-n nin bu, ni ma bu le n len man.

³² Ke ni ye n kɔn Efesusi a tiŋ a ninfob ban nann kulɔŋ a wankorin bininfob a potiɛri bu ke, ba a nyɔɔr wee n kan naa? Ni ye nkum a fiim kaa be ke, “Ni che ti ji ki nyu, wee won ke ti won kpo.”

³³ Ni laa che uba nlar ni. “Kujɔtiibirug bii nbinben ŋan le.”

³⁴ Ni che ni lam njirin, wee ni li be ke naah bi ye ni li be man ni, wee ki laa ji tun tibiri; nim bibam kaa nyi Uwonbɔr i. N len man le ke n jin ni ifa.

Tigbanann a fiim a bɔr

³⁵ Amaa uba li baan ke, “Ban kpo na yin fii nkumin niin? Bi gbanann na yin be niin?”

³⁶ Kujɔrugaa! Ŋaah bun nan ni kaa li pa, see ke ni kpo.

³⁷ Ni ye a bun niba ke, ŋaa ŋu ligbaamil lan yin be nni, amaa ni le yin ye biwanboolib le, nba ke idi bee niba.

³⁸ Amaa Uwonbɔr le tenn tigbanann waah ban man, le ki tenn biwanboolib biɛn mi tɔɔl a gbanann.

³⁹ Tigbanann biɛn kaa piɛ, bininfob a gbanann be tiba le, le tiwankor a gbanann be tiba, le nnɔɔm a gbanann be tiba, le ijan mu yaal be tiba.

⁴⁰ Paab a gbanann be le, ki jiɛn tum a gbanann, amaa paab a gbanann a ŋam be nbinba le, ki jiɛn tum a gbanann a ŋam.

⁴¹ Nween a ŋam be nbinba le, le uŋmal a ŋam be nbinba, le iŋmabil mu a ŋam mu be i binba, iŋmabil a ŋam kaa piɛ nin tabi.

⁴² Nkum a fiim mu na yin be man le, tigbanann tan wee bi ta pii-n bur le, amaa ti nan fii ke, taa ji yin buri;

⁴³ Baa pii ti nin tibuchinn ni, amaa le ti fii nin tibuchinn, bi pii ti ndaburim a piim le amaa le ti fii nin npɔɔn;

⁴⁴ Bi pii ti dulinya a gbanann le, amaa le ti fii nin Kinaaŋ a gbanann, dulinya nan a gbanann be ke, kinaaŋ mu a gbanann be.

⁴⁵ Man le ni sɔb Uwonbɔr a gbɔŋin ke, “Chinchinn a ninfou Adam nan ye wan fo le,” le Adam wan joorin mu ye wan tenn kinaaŋ a miɛfol.

⁴⁶ Kinaaŋ kaa nan chinn ki dan ni, dulinya nan a gbanann le nan chinn ki dan, ni bɔɔn bu le Kinaaŋ a gbanann mu ŋɔɔrin ni.

⁴⁷ Chinchinn a ninfo win nan nyan titann nin le, le uninfo wan kpiɛ milee n mu nyan paab.

⁴⁸ Dulinya nan a ninfob be le ke uja wan nan nyan titann ni nin le, le ban ye paab yaabin mu be ke uja wan nyan paabin.

⁴⁹ A li ke taah jɔɔ uja wan nan nyan titann nin nan a nunaŋin, man mu le ti ji yin jɔɔ uja wan nyan paab nan mu a nunaŋ.

⁵⁰ N nabum, n bei ni le ke, tigbanann nin ncham kaa li fir kɔɔ Uwonbɔr a naamin ni, le nan bur mu kaa li fir kɔɔ nan kaa bur a naamin ni.

⁵¹ Ni pelim man, n yin wɔɔn ni tibɔwoonkaar le. Ti biɛn nan kaa yin kpo, amaa ti biɛn na li kpenn.

⁵² Lidaal nmɔn, binum a gabinim nin bi ligirim kunaatuŋ joor kaagin li mɔ, kunaatuŋ nmɔn nan mɔ ke, bitakpiib na li fii nkumin nin tigbanann ŋan, le ti mu n kpenn.

⁵³ Ni kpaa talar le ke tigbanann tan burin nkpann tigbanann tan kaa li buri, le tigbanann tan kpegin, mu nkpenn tigbanann tan kaa kpegi.

⁵⁴ Ni ye nan bur kpann nan kaa burin wee nan kpeg kpann nan kaa kpegin ke, ileen yan pag ki sɔb bilin yin ŋa ibamɔn le, “Nkum kaa kan nnyaŋimi.”

⁵⁵ “Nkum a nyaŋim be laa? Nkum, a pɔɔm man wee a jɔɔ junn nin be laa?”

⁵⁶ Nkum a jum ye tibir le, le tibir mu a pɔɔm nya nsiimin le.

⁵⁷ Amaa Uwonbɔr le ye kunɔɔpoog; U ma sei ti n nyaŋim ti Yudaau Yisa Masiya bu.

⁵⁸ Mambu n nabum, ni mann sir nbamɔma. Ni laa che niba n boon ni, ki li tun u yudaan a toon yin iyoo biɛn na, nan bu-n ni nyi ke ni toon yan wee ni tun ki tenn u yudaan ni kaa yin gab yɔli.