1 Korenti 14 - UWONBƆR A GBƆNPƆŊ LIKƆƆNL

Kinaaŋ a piini yan kpiɛ

¹ Ni li nɔɔ njiɛm ki sin li ban Kinaaŋ a piini, ni nunman li ye ilinlen leen a piin.

² Wan pag ileen pɔɔn ke, waa pag tenn uninfosaali, amaa u pag tenn Uwonbɔr le. Uba kaa biɛr i taai amaa u pag liwool a bɔr nmɔn kinaaŋ a pɔɔmin le.

³ Amaa wan pag ilinlen leen ke u pag tenn bininfob le npɔɔn, ki pɔɔgir bi gbanann nin ibalin.

⁴ Wan pag ileen pɔɔn ke, u pag pɔɔgir uba le, amaa wan pag ilinlen leen ke u pag ter biwonjiɛm le.

⁵ N bi ban ni biɛn li pag ileen pɔɔn, amaa n jann ban ni pag ilinlen leen le. Wan pag ilinlen leen jon wan pag ileen pɔɔn na, see u kar wɔɔn le nin ter biwonjiɛm.

⁶ N nabum, ni ye n dan ni ban ki nan pag ileen pɔɔn ke, ni ye baa a ŋan ki sei naa, wee naa ye n ta tibɔkpiirikaar dan ni ban bee nbiɛm bee ilinlen leen bee nwɔɔnim a mɔbonl laa?

⁷ Hali ni ye niwann nan kaa fo wee ki jɔɔ kufuug ke liwol bee kubiɛg a dann, wee kaa mɔɔ gɔr ke, a yin ŋa niin ki bɔgir liwol a mɔr bee kubiɛg a mɔr wee naa ye ki mɔɔ ki gɔr lee?

⁸ Wan pee bitɔb a wol wee kaa pee yin bitɔtob ke, ŋma yin ŋa bitɔb a silii?

⁹ Ni ye man le, see ke a pag ileen pɔɔn wee i ween, naa ye man ke bi yin ŋa niin ki biɛ? A le yin pag ki tenn nfaam le.

¹⁰ Naa jɔɔ nbiɛnimi ileen a booli be dulinya nan yaan, amaa ileen nmɔn biɛn jɔɔ bu.

¹¹ Ni ye maa nyi uba kaah pag tibɔr tan ki tenn nim ke, n ye libobanl le udaan ban le u mu ye libobanl n mu ban.

¹² Ni ye man le. Ni sufu kaah ban Kasi a Naaŋ a piini nbu-n, ni che ni sufu mu li be ipiin yan li ter biwonjiɛm ma.

¹³ Mambu wan pag ileen pɔɔn ke un miɛ Uwonbɔr wee un che un fir ki wɔɔn nan wee u pag nmɔn a taai.

¹⁴ Ni ye n miɛ Uwonbɔr ileen pɔɔn nin ke, n naaŋin le n miɛ, amaa n sufu ni naa jɔɔ tinyɔɔri.

¹⁵ Ke n ni yin ŋa nii? N li miɛ Uwonbɔr n naaŋin, le ki ji miɛ u n sufu ni, n li gaah ilan n naaŋin ki ji gaah n sufu ni.

¹⁶ Ni ye a pagir Uwonbɔr a naaŋin a binba ke, ni yin ŋa niin wee uninfo wan be ni sisiigin kaa nyi ŋa len nan ni n len ke “Ibamɔn naa”?

¹⁷ Nba ke a wonpagil nmɔn ŋan amaa naa ye nan pɔɔg uba a sufu.

¹⁸ N poor Uwonbɔr nin maah fir pag ileen pɔɔn a booli ki jon ni biɛn.

¹⁹ Amaa ni ye n be biwonjiɛmin ke, n nɔɔ li pag imɔbon ŋan iŋmu yan li ter n tab ki jon nin n pag ileen pɔɔn a booli imɔbon turpiiga.

²⁰ N nabum, ni laa tiɛr ke nbuwaabi. Amaa tibir ma paam ke ni li be ke nbiliɛmin, amaa ni potiɛlin ni li be ke binunwondama.

²¹ Nsiimin yaan ni sɔb ke, “N yin ta ban pag ileen pɔɔn a booli a booli nle nin bininfocham a mɔgbai le ki pag sei bininfob nan, amaa nin ni ma biɛn na, baa yin pel n bɔr nmɔn ni,” Uyudaan le len man.

²² Ileen pɔɔn ye siɛra le ki sei ban kaa ŋa yada-n amaa naa ye yadadami; ilinlen leen ma pag tenn yadadam le naa ye ban kaa ŋa yada nni.

²³ Ni ye biwonjiɛm biɛn lagin tab, wee bi biɛn piin ki pag ileen pɔɔn, wee biba kaa biɛ ni taai bee ban kaa ŋa yada-n yaa ni biba kɔɔn ke, baah li len ke ni waar lee?

²⁴ Amaa ni ye biwonjiɛm lagin tab ki pag ilinlen leen wee wan kaa ŋa yada bee wan kaa biɛ ni taai kɔɔn ki gbir ke, u li ji uba tibɔr ni biɛn bu ke u ye tibirdaan le.

²⁵ Iyaayoo le u sufu ni a bɔwoonkaar biɛn li nyan npaan ni, le un gbaan tum ki jiɛn Uwonbɔr ki len ke, “Uwonbɔr sin be nin ni.”

Biwonjiɛm kaah li kaa ki jiɛn Uwonbɔr man

²⁶ N nabum, ti ji yin len ke baa? Ni lagin tab ni jiɛn Uwonbɔr ke, uba jɔɔ ilan, bee nwɔɔnim, le utɔ mu jɔɔ tibɔkpiirikaar, le uba mu pag ileen pɔɔn a booli, le uba mu jɔɔ karwɔɔn. Ni niɛ nan biɛn ye nin tun le ki sei biwonjiɛm npɔɔn.

²⁷ Ni ye uba pag ileen pɔɔn ke, ni ninfob bilee bee bita li fir pag amaa ni ye bi li pag le ki tenn tab le uba mu n karwɔɔn.

²⁸ Ni ye karwɔɔn kaa be ke, wan pag ileen pɔɔn nmɔn nŋmi na, wee ki pag sei u baantɔɔl nin Uwonbɔr.

²⁹ Bilinlem bilee bee bita li fir pag wee ban gurin mu n dibir nbamɔm ki biɛ tibɔr nmɔn kaa len man.

³⁰ Amaa ni ye tibɔkpiirikaar dan nim ban kan n yaa ni uba ban wee u yin pag ke, wan bi chinn be pagin nŋmi-n na.

³¹ Ni biɛn li fir pag ilinlen leen ki tenn tab wee nin che ni biɛn n kan ntinnim ki ji pɔɔg ni gbanann.

³² Bilinlem le ye bi naam a pɔɔm ki fir ŋmag mi.

³³ Uwonbɔr kaa ye kuŋmaruŋ a Wonbɔru wi. Nin tiwann tan ye yɔli, amaa U ye wan tun nin ni sam bu le. Ke naah be man biwonjiɛm biɛn a sisiigin ni,

³⁴ bipiib nŋmi-n bi mɔɔŋi soon n-yonn man wee ni be ni jiɛn Uwonbɔr a. Nsan kaa be nin bin pag tibɔri, naa kpaan nin bin ŋa bisanliib ke Uwonbɔr a siim kaah wɔɔn man nin.

³⁵ Ni ye bi ban bin biɛ niba ke, bin baan bi chiɛb bi niin yin; ni ye ifa le nin upii n pag tibɔr kuwonjiɛndiigin.

³⁶ Uwonbɔr a bɔrin piin nim ban lee? Bee ti foon ni yaa binba ban lee?

³⁷ Ni ye uba tiɛr ke u ye ulinlenn bee u jɔɔ Kinaaŋ a piini ke, ni ŋan nin u yaadaan n biɛ ke nan wee n sɔb ki sei ni nan ni ye Uyudaan a siim le.

³⁸ Ni ye u yii ni niɛ ke, ni mu a baga laa be u ni.

³⁹ Ni ma bu n nabum, ni che ni sufu li be ilinlen leen a pagimin, ki laa kɔɔg ileen pɔɔn a booli a pagimi.

⁴⁰ Amaa ki che niwann biɛn li tun ki nɔɔ tab nin ni sam bu-u.