1 Jɔnn 2 - UWONBƆR A GBƆNPƆŊ LIKƆƆNL

Masiya wan ye ti titer win

¹ N bijiɛkaam, n sɔb kugbɔŋ nan le ki tenn ni, ke nin laa che ni tun tibiri. Amaa ni ye ke uba tun tibir ke, ti jɔɔ wan gaa pag tenn ti Baa-n ki kpiɛ ti bu, Yisa Masiya, Ubuchin daan nin.

² Uma ye tibir a manug kan ŋunn ti bir, le naa ye tim a binba a bir bu amaa nin dulinya munl nan biɛn a bir.

³ Ti nyi ni ye ti chee Uwonbɔr a siimin ke, ni ma li che ti biɛ U.

⁴ Wan len ke, “N nyi u,” amaa wee kaa tun Uwonbɔr kaah siin man nin ke, udaan por tibɔkar le, le ibamɔn nin kaa be u ban ni.

⁵ Amaa wan biɛn chee u mɔbonlin ke, Uwonbɔr a jiɛm ŋa ibamɔn udaan ban na. Ni niɛ nan le che ti biɛr taah be nin Uwonbɔr man:

⁶ Wan ke u be nin Uwonbɔr ke, ni kpaa le nin u li be ke Masiya kaah nan be man nin.

Nsiim pɔm a bɔr

⁷ N jɔtiib, naa ye nsiim pɔm le n sɔb ki tenn ni, amaa nsiim kpegim, man wee ni nan jɔɔ npiinimin nin. Nsiim kpegim le ye tibɔr tan wee ni gbirin.

⁸ Nin ni ma biɛn nin, nsiim pɔm le n sɔb ki tenn ni, le ti kan ni bamɔn u ni nin ni ni, nan bu-n libunbɔnl fɔɔr le chaa le ibamɔn a wonweem pii nyagin le.

⁹ Wan ke uma be nwonween nin amaa wee ki sin nan u nabig ke, udaan la be libunbɔnlin le.

¹⁰ Wan jiɛ u nabig ke, udaan be nwonween nin le, le niba kaa be u ban ki li che un gbiɛri.

¹¹ Amaa wan nan u nabig ke, udaan be libunbɔnlin le ki choon jin; kaa nyi waah chaa nan paami, nan bu-n libunbɔnl nmɔn che u jɔɔn na.

¹² N buwaab, n sɔb kugbɔŋ nan le ki tenn ni, nan bu-n Masiya a yinl bu ni kan tibir a jiɛn pera.

¹³ N sɔb kugbɔŋ nan le ki tenn nim ban ye baam, nan bu-n ni nyi u wan nan be npiinimin nbu. N sɔb le ki tenn nim ban ye iwanpɔlin, nan bu-n ni nyaŋ titoonbir daan nin na. N sɔb le ki tenn nim ban ye n buwaab, nan bu-n ni biɛ ti Baa-n nna.

¹⁴ N sɔb le ki tenn nim ban ye baam, nan bu-n ni nyi wan nan be npiinimin. N sɔb le ki tenn nim ban ye iwanpɔlin, nan bu-n ni jɔɔ npɔɔn, le Uwonbɔr a mɔleen be nin ni, le ni nyaŋ tibirdaan nin na.

¹⁵ Ni laa jiɛ dulinya bee nan ye dulinya nan a wann ni. Ni ye uba jiɛ dulinya ke, ti Baa a jiɛmin kaa be udaan ban ni.

¹⁶ Niwann nan biɛn be dulinya nan yaan nan, uninfosaal a toonbirin a bam, inunbil a kɔlisa nin ligbingbanfaal waah jɔɔ nan nin waah li fir tun nan, naa nyan ti Baa ban ni, amaa ni nyan dulinya nan yaan le.

¹⁷ Dulinya nin ki kɔlisa li jo, amaa wan tun Uwonbɔr kaah ban man ke, udaan yin gbaa be le ki chaa.

Masiya a dataag

¹⁸ N bijiɛkaam, iyoo yan joor sɔ, ke naah pii gbir ke Masiya a dataag chaan nin, hali daandaan nan gbaa Yisa a dataam takpem dan na. Mambu le ti biɛ ke ni ye iyoo joor kaa le.

¹⁹ Bi nyan ti ban na, amaa baa sin ye ti yaabi. Bi bi ye ti yaab ke, bi bi li paar ti ban; amaa baah nyan ti ban nin nmɔn le wɔɔn ke bi ni uba kaa ye ti yaa wi.

²⁰ Amaa Kasi daan nin kpaar nkpam ki wur ni buu, le ni biɛn nyi ibamɔn nin.

²¹ Naa ye naah kaa nyi ibamɔn nin bu le n sɔb kugbɔŋ nan ki tenn ni, amaa naah nyi ibamɔn nin nbu, nan bu-n tibɔkar kaa nya ibamɔn nin ni.

²² Ŋma ye tibɔkardaan naa? Wan kaa chee ke Yisa le ye Masiya-n. Udaan ye Masiya a dataag le. U yii Baa-n nin U bigin le.

²³ Wan yii Bija-n ke udaan kaa jɔɔ Baa-n ni; wan gbir sei Bija-n ke, udaan jɔɔ Baa-n mu.

²⁴ Ni che naah nan gbir nan npiinimin nin li be ni sufu ni na. Ni ye ni tun man ke ni mu li be Bija-n nin Baa-n ban.

²⁵ Waah siin ti limɔsiinl lan ye le ke, U li sei ti limiɛfol lan kaa jɔɔ diɛm.

²⁶ N sɔb ni tiwann nan le ki tenn ni ki jiin ban ban bin lar ni ki kɔɔn kulɔŋ nbu.

²⁷ Nim bu ke naah nan gaa likpanwuril lan nin be ni ban, ni bu naa ji ban uba nwɔɔn ni. Amaa a li ke likpanwuril nmɔn kaah wɔɔn ni niwann biɛn nin, wee likpanwuril nmɔn ye ibamɔn nin, kaa ye kularugin, a li ke likpanwuril nmɔn kaah wɔɔn ni man nin, ni li be u ban na.

²⁸ Tɔ daandaan nan n bijiɛkaam ni li be u ban na, wee u nan degirin ke ti li jɔɔ tidindann ki laa san ifa u jirimin daali.

²⁹ Ni nyi ke u ye ubuchin ke, ni ŋan nin ni li nyi ke wan biɛn tun nan ŋan ke, Yisa le ma udaan.