JONASE 2 - Maketuru le Lubba ke tar kabba

Jonase to me kanji te

¹ Nje-kisi ke ndɔ ke ndɔ are tɔku kanji ddee uru Jonase. Jonase to ndɔ muta, ke til muta me kanji te le.

² Jonase duju Nje-kisi ke ndɔ ke ndɔ ke to Lubba laa me kanji te:

³ N̂-pa na: «Me ne wungu te ke ingam, m-duji ei Nje-kisi ke ndɔ ke ndɔ, a ilam te. Lo te le nje-yoje m-bbari kare umam a, oo ndum.

⁴ Ilam gel maann te beer dann ba te, maann ke aw ula guku dɔm, maann ke e-dda are aw kuja, maann ke e-dda are aw lenge nday dɔm te.

⁵ A ema m-pa na: « E-tubbam ilam ddew ew sei! A kem a koo key lei ke maji tɔyn bbay.»

⁶ Maann uwam gɔsem te. Buja ubbam, mu bbiri dɔm te.

⁷ M-ddisi ndereng gɔl ddingirije te. Nange utu tae dɔm te nyɔm. A, ei, Nje-kisi ke ndɔ ke ndɔ Lubba lem ɔrum kem baa me buja te!

⁸ Kare ke singam goto a, mole mem dɔ ei Nje-kisi ke ndɔ ke ndɔ te, ngaa tar-duju lem aw ndereng tee rɔi te me key te lei ke maji tɔyn.

⁹ Dewje ke undaje mede dɔ kɔrje te ke to neje ke baa daw n̂-tubbaje neje ke maji rɔde te ke ddang.

¹⁰ A ema, ma kari ne-polo ke pa tam te ta kari ne wooyo. Ma dda ne ke munn ndum ta dda. Kaji to me ji Nje-kisi ke ndɔ ke ndɔ te.»

¹¹ Nje-kisi ke ndɔ ke ndɔ unn ndu are kanji le ngaa kanji le tɔmɔ Jonase ilae dɔ nange te ke tutu.