Кердипэ 35 - Библия опэр крымски романи чиб

О Яков авэл палэ андэ Вефиль

¹ О Дэл пхэнляс э Яковески: — Ваздэтут андэ Вефиль, ачё отхэ тай кер отхэ алтари э Дэвлэски, Саво сикавдяспэс туки, кана ту нашлян тэ пхралэстар катар Исав.

² О Яков пхэнляс пэ кхерутнэнги тай алаенги, кон эсас амэнца: — Шужарэн тумэн катар джятя дэла, савэ тумэнца, тай паровэн тумэнги о савутя.

³ Дэчи кидэнтумэн ко дром, тай амэ гелям андэ Вефиль, катэ мэ кан керав алтари э Дэвлэски, Саво зборисаило манца андэ дес ки хурлукеско тай сас манца, кай тэ на джяв.

⁴ Он динэ ко Яков алаи э джяте дэвлэн, савэ сас лэндэ, тай о чяня андар кана, тай о Яков хранляс лэн тал дуби андэ Шэхем.

⁵ Дэчи он гелэ ко дром. Э траш э Дэвлэски лиляс алаи о диза агорял лэндэ, аякха кай никхон на родэлас э Яковески пуен.

⁶ О Яков тай алаи, кон сас лэса, алэ андэ Луз (самким Вефиль) ки пху Ханаан.

⁷ Отхэ ов кердяс алтари тай тхэдяс одова тхан Эль-Бет-Эль, вай отхэ о Дэл пхутэрдяспэс лэски, кана ов нашло пэ пхралэстар.

⁸ Э Девора, сави хавдярэлас э Рэвэка, мули тай сас паромэ тал дуби паш ко Вефили. Оничин ов сас тхэдо Аллон-Бахут.

⁹ Кана о Яков ало палэ андар Паддан-Арам, о Дэл генэ сикавдяспэс лэски тай алгышты лэс.

¹⁰ О Дэл пхэнляс лэски: — То нав Яков, ай акана ту на кан бучёс Яков. То нав кан овэл Израиль. Аякха о Дэл тхэдяс лэс Израиль.

¹¹ Ов пхэнляс лэски: — Мэ — о Дэл о Баро-Зорало. Мэ аракхлён тутар пуя тай бутё. Дюняс тай бут дюнядэс кан овэн тутар, тай патишая кан овэн тутар.

¹² Э пху, сави Мэ динём э Авраамес тай э Исаакес, Мэ кан дав тутэ тай ла тэ пуендэ.

¹³ Тай о Дэл ваздиняспэс лэстар отхэ.

¹⁴ О Яков тхэдяс о бар тэрдиндос одолэ тханэстэ, катэ о Дэл зборизэлас лэса, тай чёрдяс опэр лэстэ винас тай маслинаки олия.

¹⁵ О Яков тхэдяс о тхан, катэ о Дэл зборизэлас лэса, Вефиль.

О мэрипэ э Рахиляко

¹⁶ Он ачявдэ о Вефиль тай сас надур катар Эфрата, кана ки Рахиль лиляс тэ аракхлёл пуёс, тай о аракхлипэ сас бут пхаро.

¹⁷ Ой бут сидэла дукх, кана аракхлёлас о пуёс. Э джювли, сави керэлас ярдыми тэ аракхлёл, пхэнляс лаки: — Ма траша, тутэ кан овэл генэ екх чяво.

¹⁸ Кана э Рахиль мукелас по тэнышы тай мэрэлас, ой тхэдяс пэ чявэс Бэн-Они, ай о дад тхэдяс лэс Вениамин.

¹⁹ Э Рахиль мули тай сас паромэ опэр дром ко Эфрата (самким Вифлееми).

²⁰ Опэр лаки гробостэ о Яков тхэдяс бар тэрдиндос. Одова бар тэрдо опэр гробус ки Рахиляко джи авдес.

²¹ О Израиль джялас англэ тай тхэдяс катуна пал Мигдал-Эдэр.

²² Кана о Израиль бэшэлас андэ одолэ пхуятэ, о Рувим пашлило пэ дадэски иргатинкаса э Билхаса, тай о Израиль галило адалэстар. Ко Яков сас дэшудуй чявэ.

О чявэ э Яковески

²³ Катар Лия: о Рувим, баштутно э Яковеско, о Симеон, о Левий, о Иуда, о Иссахар тай о Завулон.

²⁴ Катар Рахиль: о Иосиф тай о Вениамин.

²⁵ Катар Рахиляки иргатинка ки Билха: о Дан тай о Неффалим.

²⁶ Катар Лияки иргатинка ки Зилпа: о Гад тай о Асир. Аки о чявэ э Яковески. Он аракхлилэ лэски андэ Паддан-Арам.

О мэрипэ э Исаакеско

²⁷ О Яков ало пэ дадэстэ ко Исаак андэ Мамрэ, кай пашэ Кирьят-Арба (самким Хеврон), катэ бэшэнас о Авраам тай о Исаак.

²⁸ Алаи о деса э бэшымаски э Исаакески сас шэлу охтодэша брэш.

²⁹ О Исаак сас пхуро тай чяло бэшымаса. Ов мукляс по тэнышы, муло тай гело пэ мулэ папудэндэ. Лэски чявэ о Исав тай о Яков пароскердэ лэс.