Wuj Richin ri Molojri'il 9 - Kaqchiquel Bible

Ch'obonik chirij ri k'aslen y ri kamik

¹ Yin xinch'ob yan ronojel re', y xq'ax chinuwech chi ri choj kik'aslen y ri e aj-na'oj ek'o pa ruq'a' ri Dios. Man qetaman ta ri achike niqak'uluwachij, roma man niq'ax ta chiqawech ri peteneq chiqawech-apo.

² Y kan keri' chuqa' konojel: Ri choj ruk'aslen y ri man utz ta ruk'aslen, ri ch'ajch'oj y ri man ch'ajch'oj ta, ri nusuj kamelabel y ri man nusuj ta, ri kan nuben ri nubij y ri man nuben ta.

³ Chuqa' yin xinwil ri man utz ta ri yebanatej chuwech ri ruwach'ulew, chi xa kan konojel junan nikik'uluwachij, jun chik chi ri ruch'obonik ri wineq xa nojineq rik'in etzelal, y rokik k'a e k'es xa kan xaxe ri etzelal ri yekiben y chi xa kan chi'anin k'a xkeken-el.

⁴ Toq jun wineq k'a k'es na chikikojol ri ch'aqa' chik, xa kan k'a tikirel na chi nuchojmirisaj ri ruk'aslen, achi'el nubij ri tzij: Más rejqalen jun ti tz'i' k'es ke chuwech jun koj kamineq chik.

⁵ Ri k'a e k'es, k'a yech'obon na y ketaman chi k'o jun q'ij yebeken, jak'a ri xa e kaminaqi' man yech'obon ta chik. Maneq chik ch'akoj chikiwech y xa kan yemestex-qa chi'anin.

⁶ Chiri' k'a xtik'is-wi ri ajowabel, ri etzelal, ri ch'upun-k'u'x y man e jajun ta chik rije' kik'in ri k'a e k'es na toq nikiben ri k'o chi niban chuwech ri ruwach'ulew.

⁷ Rokik k'a at k'es na, kan tatija' ri akaxlan-way. Taqumu' ri a-vino rik'in kikoten roma ri Dios kan nuya' rutzil pan awi' roma ri asamaj.

⁸ Kan jantape' k'a chuqa' takusaj ri saqilej atziaq, y taya' k'a ri aq'om pan awi', richin ri rusumal-awi' jebel nitzu'un.

⁹ Y roma ri ak'aslen xa q'axel, toq kan atk'o rik'in ri awixjayil kan tana' k'a ruki'il ri ak'aslen, roma kan jare' ri nuya' ri Dios chawe richin awichin rat rokik at k'es. Y jare' ri nach'ek chire ronojel ri asamaj.

¹⁰ Y ronojel k'a ri natz'et richin chi niban, kan tabana' k'a, roma chupan ri jul ri akuchi xkabemuq-wi kan, xa maneq chik samaj, maneq chik ch'obonik, maneq chik retamaxik más etamabel, ni retamaxik na'oj.

Ri man pa ruchojmilal ta ri nibanatej

¹¹ Chuwech re ruwach'ulew kan k'o chik k'a ri xinwetamaj: Chi toq niban jun anin, man xaxe ta ri jun ri más anineq nanin ri nich'akon. Chuqa' toq k'o jun labal man xaxe ta ri aj-labal ri kan ik'owineq kuchuq'a' ri xkech'akon; ri nitij q'ij-q'ij man xaxe ta kichin ri achi'a' aj-na'oj; ni ri beyomel man xaxe ta kichin ri etamanela', y chuqa' man ronojel ta ri rutzil xaxe ta kichin ri jebel yech'obon, roma xa qonojel roj niqil ronojel re'.

¹² Y roj man qetaman ta achike xtuben ri qak'aslen chiqawech-apo. Xa achi'el ri ker ri nikiya-ki' pa ya'l y ri taq aj-xik' chikopi' toq nikiya-ki' pa pikbel. Xa kan keri' chuqa' niqaben roj. Toq man jun niqach'ob, kan jari' niqaqa ri ruk'ayewal ri k'aslen pa qawi'.

¹³ Chuqa' k'o jun xbanatej ri nuk'ut ri kich'obonik ri winaqi' pa ruwi' ri na'oj. Y re' janila itzel xuben chuwe.

¹⁴ Roma k'o k'a jun ko'ol tinamit y kan juba' ok winaqi' ek'o chupan.Y k'o k'a jun nimalej rey xpe richin niben oyowal rik'in, y kan xusutij-rij richin xekiya' pa ruk'ayewal.

¹⁵ Y chupan k'a ri jun ko'ol tinamit ri' k'o k'a jun achin ri stape' kan man jun k'o rik'in, kan k'o-wi janila runa'oj, y rik'in ri na'oj ri' xtikir xukol ri rutinamit. Y toq rukolon chik ri rutinamit, toq xbiyin ri q'ij, ri winaqi' xa jumul xkimestaj.

Ja ri na'oj ri más k'atzinel pa ruwi' ronojel

¹⁶ Roma ri' yin ninbij: Ja ri na'oj ri más utz ke chuwech ri uchuq'a'. Jak'a ri na'oj ri k'o rik'in jun wineq ri xa man jun k'o rik'in, man jun bey niq'alajirisex ta. Y chuqa' ri wineq kan man nikajo' ta nikak'axaj ruch'abel jun wineq ri keri' rubanik.

¹⁷ Xa kan más k'a nak'axex ri ch'uch'uj ch'abel richin jun wineq ri k'o runa'oj, ke chuwech ri ruch'abel ri kan k'o uchuq'a' pa ruq'a', ri kan nitojoj chikij ri xa maneq kina'oj.

¹⁸ Ri na'oj kan más k'a rejqalen ke chuwech ri jalajoj kiwech kamisabel ri ye'ukusex pa labal. Roma toq man rik'in ta na'oj nibanatej jun banobel, kan nuyoj ronojel ri utz. Xa rik'in jun aj-mak, kan k'iy k'a ri man utz ta nuk'en-pe.