Wuj Richin ri Molojri'il 2 - Kaqchiquel Bible

¹ Yin kan xinch'ob-qa chi wakami ninya' k'a chire ri wánima ronojel ri nurayij. Y jari' xinben. Jak'a xintz'et chi re' xa q'axel chuqa'.

² Y yin chuqa' xinbij k'a chire ri tze'en: Rat xa yach'ujirisan y chire ri kikoten xinbij: Rat xa man jun utz nak'en-pe, xicha'.

³ Yin xinwajo' xinwetamaj wi ruk'amon naqum k'iy vino chupan ri ka'i-oxi' q'ij chire ri qak'aslen. Xinben xaxe roma xinwajo' xinwetamaj re', jak'a man xiq'aber ta roma keri' xinwajo'. Y xintz'et chi ri vino chuqa' man jun nuk'en-pe chawe.

⁴ Xinju' k'a wi' chuxe' nimalej taq samaj, xenbanala' k'a q'anej nima'q taq wachoch richin ninq'et-tzij, chuqa' xenbanala-qa nutiko'n richin uva,

⁵ xenbanala-qa nutiko'n chupan ri nuqejoj y xinben chuqa' kutzil ri akuchi xentik-qa kotz'i'j. Y chupan k'a re' xentikila' ronojel ruwech che' ri yewachin.

⁶ Xenben nima'q taq yakbel-ya', richin chi chiri' nink'en-wi ya' richin yenya'aj ri che' ri e nutikilon-qa.

⁷ Xenloq' nusamajela' chi achi'a' chi ixoqi' ri xeyuqe' pa samaj wik'in y chuqa' ek'o xe'alex pa wachoch. Kan e k'iy nuwákix y nukarne'l xek'oje' y kan man jun chik xk'oje' pa Jerusalem achi'el ta yin.

⁸ Xinch'ek k'a janila chi q'anapueq y saqipueq y ri beyomel ri e kik'amalon-pe ri ch'aqa' chik rey kichin ch'aqa' chik ruwach'ulew. Xek'oje' e k'iy nubixanela' chi achi'a' chi ixoqi'. Y kan xinben ri achike ri rurayibel ránima jun achin: Ri qumuj vino y janipe' chi ixoqi' ri xenwajo'.

⁹ Yin kan janila k'a xnimer nuq'ij chikiwech ri winaqi' y kan janila xibe pa jotol rik'in ronojel ri xk'oje' wik'in, más chikiwech ri e rey ri xek'oje' chinuwech yin re wawe' pa Jerusalem. Y man xaxe ta ri xk'oje' wik'in, xa kan jantape' k'a xk'oje' ri na'oj wik'in.

¹⁰ Y ronojel k'a ri rayixel ri xintzu' kan xinben y chuqa' ronojel ri kikoten ri xurayij ri wánima xinben, roma ri wánima kan xuxlan k'a toq xinben ronojel ri nurayij. Jare' ri xinch'ek chire ronojel ri nusamaj.

¹¹ K'ari' chi'anin xintz'et ronojel ri nima'q taq samaj ri xenben yin, chuqa' ri samaj ri janila k'ayew xuben chinuwech y re' xintz'et chi xa ronojel q'axel, y xa man yitikir ta ninwil ronojel ri ninwajo'. Y re' xa man jun nuk'en-pe chuwe chuwech re ruwach'ulew.

Ri na'oj kan k'o nuk'atzinej-wi

¹² Y k'ari' k'a xinch'ob rij re na'oj re'; ri ch'ujerik y ri banobel ch'obon man ch'obon ri xenbanala'. Roma ¿achike k'a xtitikir xtuben-q'anej ri xtiq'aton kan tzij chuwij yin? Xa junan ri xtuben rija' rik'in ri xinben yin.

¹³ Yin xintz'et k'a chi ri na'oj más rejqalen chuwech ri ch'ujerik, achi'el ri saqil más rejqalen chuwech ri q'equ'm.

¹⁴ Ri wineq aj-na'oj kan ronojel k'a nutz'et rik'in ri runaq'-ruwech, y ri nakanik xa pa q'equ'm nibiyin-wi. Man rik'in ri' chi e ka'i' xa pa kamik ye'apon-wi.

¹⁵ K'ari' xinbij-qa pa wánima: Ri man aj-na'oj ta xa niken y keri' chuqa' xtink'uluwachij yin ¿Achike k'a nik'atzin-wi chi yin janila xintej nuq'ij richin xk'oje-el na'oj wik'in? Y roma ri' xinch'ob-qa chi re' xa kan q'axel chuqa'.

¹⁶ Roma ni ri k'o runa'oj ni ri maneq runa'oj xtik'oje' ta kan kinatabal richin q'asen, roma toq niq'ax ri q'ij xa ronojel nimestex y keri' niken ri k'o runa'oj y niken ri maneq runa'oj.

¹⁷ Roma ri' yin xinwetzelaj k'a ri k'aslen, roma ronojel ri samaj ri nibanatej chuwech re ruwach'ulew xa kan xik'o yan nuk'u'x chire, roma xa ronojel q'axel y xa man yatikir ta nawil ri nawajo'.

¹⁸ Chuqa' kan xinwetzelaj ronojel samaj ri xinben chuwech ri ruwach'ulew, ri kan k'o chi xtinya' kan chire ri q'atoy-tzij ri xtok kan pa nuk'exel yin.

¹⁹ Y kan man wetaman ta k'a, wi ri achin ri xtuben-qa richin chire ronojel ri nusamaj ri xinben rik'in janila ruk'ayewal chuwech re ruwach'ulew, k'o runa'oj ó xa maneq. Ronojel re' kan q'axel chuqa'.

²⁰ Toq xintz'et ronojel ri samaj ri akuchi xinkusaj-wi ri nuna'oj xa xinmalij nuk'u'x;

²¹ roma jun achin ri nisamej rik'in na'oj, rik'in etamabel y rik'in ruchojmilal k'o chi nuya' kan ri rubeyomel chire jun chik ri xa man jun xuben chuch'akik. Re' chuqa' xa kan q'axel y man ruk'amon ta.

²² Roma, ¿achike ta k'a nuch'ek ri achin ri janila nisamej y janila niququt chubanik ronojel ri nik'atzin chire chuwech re ruwach'ulew?

²³ Roma ronojel q'ij richin ri ruk'aslen ri wineq xa kan xaxe q'axo'n, y kan jantape' k'o pa ránima ri rusamaj, ni ta ri chaq'a' man nuxlan ta ri ránima, chuqa' re' xa kan q'axel y man jun rejqalen.

²⁴ Ri más jebel chire ri achin ja ri nutej, nuqum y kan nikikot ránima rik'in ri nuk'ul rik'in ri rusamaj ri rubanon. Y re' kan nuben chuwe chi kan niq'ax chinuwech chi jare' ri rurayibel ri Dios chire ri wineq.

²⁵ Roma, ¿achike ta k'a ri niwa' y nikikot wi man ta keri' nrajo' ri Dios?

²⁶ Roma ri Dios k'o nuya' chire ri wineq ri niqa' chuwech rija': Nuya' na'oj, ronojel ruwech etamabel y kikoten, jak'a chire ri wineq aj-mak nuya' q'ij chi janila k'iy numol richin chi nuya' kan chire ri qajineq chuwech ri Dios; chuqa' re' xa kan q'axel y xa man yatikir ta nawil ronojel.