Wuj Richin ri Miqueas 3 - Kaqchiquel Bible

Ch'abel pa kiwi' ri q'atoy taq tzij

¹ Wakami k'a tiwak'axaj rix tata'al y aj-raqen pa ruwi' ri tinamit Israel: Rix nik'atzin chi niben pa ruchojmilal.

² Jak'a rix xa niwetzelaj ri utz, y ri man utz ta, xa jari' ri niwajo'. Rix niwelesaj ronojel chike ri nuwinaq, achi'el xa ta niwelesaj ri kitz'umal y ri kitiojil chirij ri kibaqil.

³ K'ari' niq'ej ri kibaqil, y niya' pa jun bojo'y. Y pa ruk'isibel, ye'itej.

⁴ Roma ri' chupan ri q'ij toq rix xtik'utuj to'onik chire ri Jehová, rija' kan man xkixrak'axaj ta. Xa xtrewaj-ri' chiwech chupan ri q'ij ri', roma kan ruyon itzel taq banobel ri xe'iben.

Ch'abel pa kiwi' ri nikibananej chi e q'alajirisanel

⁵ Ri nikibananej chi e q'alajirisey ruch'abel ri Dios xa e q'olonel. Toq k'o jun wineq nusuj kiway, nikoyoj urtisanik pa ruwi'. Jak'a ri wineq ri man nusuj ta kiway, xa nikoyoj etzelanik pa ruwi'. Roma ri' ri Jehová xtuya' ruk'ayewal pa kiwi'.

⁶ Rix ri man ix qitzij ta q'alajirisey ruch'abel ri Dios, ri q'ij richin ri isamaj xa nik'is yan, ri q'ij xa xtik'is yan pan iwi' y nipe yan ri q'equ'm. Roma rix xa itz'ukun tzij chuwech ri nutinamit, man jun chik xtik'utumej chiwech. y man xtiwetamaj ta chik achike xtik'uluwachitej.

⁷ Xa kan xkixk'ixbitej y xa xkixsachilan rik'in ri ich'abel. Roma xa man jun chik xtiq'alajirisex chiwech roma ri Dios, xtimatzej ipalej rik'in k'ix.

⁸ Jak'a yin kan in nojineq rik'in uchuq'a' richin ri Espíritu richin ri Jehová; y yiruto' richin yich'on pa ruwi' ri ruchojmilal y ri man utz ta. Kan nuya' k'a wuchuq'a' richin ninq'alajirisaj ri kimak ri nuwinaq, richin niq'alajin ri man utz ta ri ye'ajin chubanik.

Ch'abel pa kiwi' ri q'atoy-tzij richin ri Jerusalem

⁹ Tiwak'axaj rix aj-raqen pa qawi' roj ri oj israelita. Rix ri k'o iq'ij chiqakojol, rix kan man niqa' ta chiwech ri ruchojmilal. Rix kan nixotoba' rubanik ri q'atoj-tzij.

¹⁰ Rix rik'in ri itzel banobel, xik'ut chikiwech ri qawinaq ri itzel taq banobel. Rix yixkamisan, y roma ri' xe'itijoj chi rije' chuqa' yekamisan.

¹¹ Ri e q'atoy taq tzij xa k'o chi yepuaqix na richin nikiq'et-tzij. Ri e sacerdote xa roma k'a méro toq yetijon. Y ri e q'alajirisanela' xa kan nikik'utuj kajel richin nikibij ri niq'alajirisex chikiwech. Stape' rije' nikiben ronojel re', kan nikibij chi ri Jehová kan k'o kik'in. Y chuqa' nikibij chi man jun ruk'ayewal xtiqaqa pa kiwi' rije' roma kan k'o ri Jehová kik'in.

¹² Roma ri kimak re winaqi' re', ri tinamit Sión xa xtok kan jun qasanbel-ulew. Ri Jerusalem xa xtok kan wuluwik abej. Y ri pa ruwi' ri juyu' ri akuchi k'o-wi ri rachoch ri Dios, xa xtok kan k'echelaj ri nojineq chi che'.