Wuj Richin ri Miqueas 1 - Kaqchiquel Bible

Ri rutzijol ri rutojbalil-mak pa ruwi' ri ruwach'ulew Samaria

¹ Ri Jehová xuya' k'a jun rutzijol chuwe yin Miqueas aj-Moréset, ri k'o pa ruwach'ulew Judá, toq ri Jotam, ri Acaz y ri Ezequías xeq'aton-tzij pa ruwi' ri Judá. Y chupan ri ruq'ijul ri', xubij k'a chuwe ri xtibebanatej pa tinamit Samaria y ri pa Jerusalem.

² Tiwak'axaj k'a rix winaqi' richin ronojel tinamit; rix winaqi' richin chijun ruwach'ulew, kan tiya' k'a ixikin, roma ri Jehová ri qajaw qonojel nich'on-pe k'a chupan ri rachoch. Rija' xtuq'alajirisaj k'a ronojel ri ibanobal.

³ Ri Jehová kan xtel k'a pe ri akuchi-k'o-wi; kan xtiqaqa k'a pe richin xkeruxolq'otij ri nima'q taq juyu'.

⁴ Ri akuchi niq'ax-wi ri Jehová kan yebelel-qa ri nima'q taq juyu', achi'el niya'er-qa ri cera chuwech ri q'aq'. Ri taq'aj kojol taq juyu' kan xkesoboso-qa, achi'el nuben jun raqen-ya' chuwech jun ruwa-xulan.

⁵ Ronojel re' xtibanatej roma rix nuwinaq xixyakatej chirij ri Dios. Rix ri ix rijatzul kan ri Jacob xixmakun chuwech rija'. ¿Achike ta k'a k'o rumak chire ri yakatajinenri'il richin ri Israel? ¿Man ja ta kami ri Samaria? ¿Achike ta k'a yeya'on kiq'ij ri wachibel chiri' pa Judá? ¿Man ja ta kami ri Jerusalem?

⁶ Ri Jehová xtuben k'a chire ri Samaria chi xtok kan jun tzobaj wuluwik abej. Xtuben chi ri ulew ri' utz richin nitik uva chuwech. Ronojel ri abej ri e ukusan chire ri tz'aq xketorix-el pa siwan; y keri' xaxe ri ruxe' xtiq'alajin kan.

⁷ Ri jebelej taq wachibel xkewulex y ri sipanik ri xtikich'ek ri ixoqi' ri yewer kik'in achi'a' ri ye'apon pa kachoch ri ki-dios xa xtiporox. Ri wachibel ri' xa xke'ok q'ayis. Ri Samaria xril k'a ronojel re' richin ninimaq'ijun richin nik'iyer ri rutiko'n. Jak'a ri e etzelanel kichin xa xtikik'uaj richin nibekiya' chike ri ixoqi', chupan ch'aqa' chik kachoch ri ki-dios richin nikiya' kiq'ij.

Ri rutzijol ri rutojbalil-mak pa ruwi' ri ruwach'ulew Judá

⁸ Roma ri' kan yibison y kan yijiq'ijo'x chi oq'ej. Xkiwuyin k'a chi oq'ej achi'el yewuyin ri utiwa', y achi'el ri jiloj ri nikiben ri alaji' aj-xik' taq chikopi' toq e malin kan roma ri kite'. Roma k'a ri nubis kan maneq nuxajab y nutziaq xtinkusaj.

⁹ Ri mak ri k'o chiri' pa Samaria achi'el jun yabil ri xa kan maneq chik raq'omal, y chuqa' xa kan xapon yan k'a pa ruwach'ulew Judá. Y kan xok yan k'a pa Jerusalem.

¹⁰ Man tiwelesaj rutzijol, ni man kixoq', richin man yixkak'axaj ta ri tinamit Gat. Pa ruk'exel ri' xa más utz wi nibolqotila-iwi' pa poqolaj roma bis, ri chiri' pa tinamit Bet-le-afrá.

¹¹ Ri winaqi' aj-Safir, rik'in janila k'ixbilal xkebe pa ximonri'il, y kan maneq k'a kitziaq xkebe. Ri winaqi' aj-Bet-ésel xa kan xke'oq' k'a, roma ri winaqi' aj-Zaanán xa man xkebe ta chi kito'ik.

¹² Ri winaqi' aj-Marot kan xtikikototila-ki' roma ri q'axo'n. Rije' kan koyoben k'a chi yeto'ox ta. Jak'a ri Jehová xa xtuk'en-pe ruk'ayewal pa kiwi'. Y ri ruk'ayewal ri' xtapon k'a pa tinamit Jerusalem.

¹³ Ri winaqi' aj-Laquis kan xkekixim ri kiej ri más ye'anin chire ri ki-carruaje. Ja rije' ri xetijon ri winaqi' aj-Sión chire ri mak, rije' kan xeyakatej chirij ri Dios, achi'el xkiben ri aj-Israel.

¹⁴ Ri winaqi' aj-Moréset-gat man jun bey xtikitz'et ta chik ri kitinamit. Ri rey richin Israel retaman chik k'a chi man xtukuquba' ta ruk'u'x kik'in ri winaqi' aj-Aczib.

¹⁵ Ri Dios kan xtuteq k'a pe jun ri xtich'akon-el chikij ri winaqi' aj-Maresá. Y ri ki-rey xtiberewaj-ri' pa jul ri k'o pan Adulam.

¹⁶ Y ri winaqi' aj-Judá xtikisokaj-el ri rusumal-kiwi' richin nikik'ut chi yebison. Xtikijos-el ri rusumal-kiwi', y xketz'anatz'o' kan achi'el ri k'uch. Y ri kalk'ual rije' ri janila yekajo' xa kan xke'uk'uex-el pa ximonri'il.