Wuj Richin ri Josúe 8 - Kaqchiquel Bible

Toq ri e rijatzul ri Israel xkichop ri tinamit Ai

¹ Ri Jehová xubij chire ri Josué: Man taxibij-awi' ni man kamayamo-qa. Ke'ak'uaj konojel ri aj-labal y kixjote-el richin nichop ri tinamit Ai. Wakami yin xtinjech k'a chawe ri rey, ri ruwinaq, ri rutinamit y ronojel ri kulew.

² Rix xtiya' k'a pikbel chirij ri tinamit. Y xtiben chike ri winaqi' richin ri tinamit Ai y chire ri ru-rey achi'el xiben rik'in ri tinamit Jericó y chire ri ru-rey. Xaxe k'a re wakami xtimej-pe ri k'o rejqalen chuwi-kiq'a' y ri kawej, ronojel k'a re' xke'ok iwichin rix, xcha'.

³ Keri' ri Josué y ri aj-labal xkinaba-ki' richin nibekibana' oyowal rik'in ri tinamit Ai. Ri Josué xerucha' k'a el e 30,000 achi'a' ri kan janila e utz richin oyowal, jare' k'a xeruteq-el ri chi'aq'a' ri'.

⁴ Kere' k'a xubij-el chike: Tiwak'axaj, xtiya' k'a jun pikbel ri chirij-el ri tinamit. Man yixjel ta k'a el nej chire ri tinamit, tinaba' k'a iwi' y kan k'ula' k'a xkixtzu'un-wi.

⁵ Yin y konojel k'a ri achi'a' ri ek'o wik'in kan xqojel k'a apo chupan ri nima-tinamit. Y toq xke'el-pe rije' chiqij roj, xqojanimej-pe chikiwech achi'el ri xqaben ri pa nabey.

⁶ Xkepe k'a chiqij, y xkeqelesaj-pe nej chire ri tinamit, roma xtikibij: Xa ye'animej chiqawech achi'el ri nabey mul, xkecha' rije'. Jari' toq xqojanimej k'a pe chikiwech.

⁷ Y jari' toq rix xkixyakatej-pe chire ri pikbel, y xkixok k'a chupan ri tinamit, roma ri Jehová ri qa-Dios xtujech chiqe.

⁸ Y toq ichapon chik ri tinamit, xtiya' ruq'aq'al. Xtiben k'a achi'el ri xubij ri Jehová. Tiwak'axaj chi kan keri' xinbij chiwe, xcha'.

⁹ K'ari' ri Josué xeruteq-el, y rije' xebe k'a ri akuchi k'o chi nikiben-wi ri pikbel chukojol ri tinamit Ai y ri tinamit Betel, pa qajbel-q'ij chire ri Ai. Ri Josué xk'oje' k'a ri akuchi ek'o-wi-qa, chikikojol ri ch'aqa' chik ruwinaq chupan ri aq'a' ri'.

¹⁰ Y xyakatej k'a nimaq'a' yan ri Josué y xerumol ri achi'a' ri'. K'ari' xjote' k'a el rija' y e rachibilan-el ri e aj-raqen. Y rije' xe'el-el pa nabey chikiwech ri achi'a' richin nibekibana' oyowal rik'in ri tinamit Ai.

¹¹ Y konojel ri achi'a' ri' xejote-q'anej, y xe'apon chunaqaj ri tinamit Ai. Y xek'oje-qa chiri' pa xaman chire ri tinamit ri' juk'an chire ri taq'aj pa xaman chire ri tinamit ri'.

¹² Xerucha' k'a 5,000 achi'a' y xeruya' richin pikbel pa qajbel-q'ij chire ri Ai, pa ruchojmilal ri tinamit Betel.

¹³ Kere' ruchojmilal xuben kik'in ri achi'a': Ri aj-labal xek'oje' pa xaman chire ri tinamit, y ri xechajin ri pikbel xek'oje' pa qajbel-q'ij chire ri tinamit. Y ri Josué xuq'axaj ri aq'a' ri' pa runik'ajal ri taq'aj kojol juyu'.

¹⁴ Toq ri rey richin ri Ai y ri ruwinaq xkitz'et ronojel re', jari' toq xeyakatej nimaq'a' yan richin xkiteleche'ej-ki'; k'ari' xebe chikik'ulik ri e rijatzul kan ri Israel, richin nibekichapa' oyowal pa ruchojmilal ri taq'aj richin ri raqen-ya' Jordán, y kan man ketaman ta chi ya'on pikbel chirij ri tinamit.

¹⁵ Ri Josué y konojel ri achi'a' xkiben richin xech'akatej yan; xe'animej chikiwech ri aj-Ai chupan ri bey richin ri tz'iran ruwach'ulew.

¹⁶ Konojel ri achi'a' ri ek'o chiri' pa tinamit Ai xkimol-ki' richin xekitzeqelibej-el konojel ri achi'a' ri e rachibilan ri Josué; y keri' xban chike richin xe'elesex-el chupan ri kitinamit.

¹⁷ Keri', konojel ri achi'a' xe'el-el y man jun xk'oje' kan chupan ri tinamit Ai ni pa Betel. Y roma ri' xkijaqaba' kan ruchi' ri kitinamit.

¹⁸ K'ari' ri Jehová xubij chire ri Josué: Tayaka-q'anej ri akamisabal ri k'o pan aq'a' pa ruchojmilal ri Ai, roma yin xtinjech chawe, xcha'. Y ri Josué kan xuyek-q'anej ri rukamisabal pa ruchojmilal ri tinamit ri'.

¹⁹ Y toq ri e okineq pikbel xkitz'et re', chi'anin k'a xeyakatej ri akuchi ek'o-wi, y junanin k'a xebe y xe'ok chupan ri tinamit. Keri' xkichop ri tinamit y chi'anin xkiya' ruq'aq'al.

²⁰ Y ri achi'a' aj-Ai xetzu'un kan chikij, y xkitz'et chi janila sib nel chupan ri kitinamit, jari' toq rije' man jun akuchi xe'animej-wi roma ri achi'a' ri ek'o rik'in ri Josué ri e animajineq pa tz'iran ruwach'ulew xa xetzolin-pe chikij.

²¹ Y xetzolin-pe roma xkitz'et chi ri e okineq pikbel xkichop yan ri tinamit y kan nibuqun k'a ri sib. K'ari' rije' xkichop kikamisaxik ri aj-Ai.

²² Y ri ch'aqa' chik achi'a' aj-Israel xebe'el-pe chupan ri tinamit ri' richin xebekik'ulu'. Keri' toq ri aj-Ai xek'oje' pa kinik'ajal ri e rijatzul kan ri Israel; ri ch'aqa' chikij y ri ch'aqa' chikiwech. Xekikamisaj k'a konojel ri aj-Ai y man jun xk'ase' kan y man jun xanimej.

²³ Jak'a ri ki-rey xkichop-el y xkik'uaj chuwech ri Josué.

²⁴ Y toq ri achi'a' aj-Israel xekikamisaj yan konojel ri achi'a' aj-Ai ri e beneq pa taq'aj ri pa tz'iran ruwach'ulew ri akuchi e kitzeqeliben-el, y kan konojel xeken yan rik'in espada, jari' toq xetzolin chupan ri tinamit Ai y xekikamisaj konojel ri winaqi' ri ek'o chiri'.

²⁵ Ri kajlabal ri aj-Ai ri xeken chupan ri q'ij ri', chi achi'a', chi ixoqi' xapon e 12,000.

²⁶ Ri Josué kan man xubij ta k'a chike ri achi'a' chi tikitanaba' ri oyowal k'a toq xek'is na kikamisaxik konojel ri aj-Ai.

²⁷ Jak'a ri rijatzul ri Israel xkimej k'a pe chuwi-kiq'a' ri kawej y ronojel ri k'o rejqalen ri xkil chupan ri tinamit, achi'el rubin ri Jehová chire ri Josué.

²⁸ K'ari' xkiya' ruq'aq'al ri tinamit richin xk'is jumul; y kan xtole' kan, k'a re wakami.

²⁹ Y ri rey richin ri Ai, xtzeqebex chire ruq'a' jun che' k'a toq xqaq'ij na qa. K'ari' ri Josué xubij chi tiqasex ri ruch'akul, y tikiya-el chuchi' ri tinamit, y chiri' xkimol kan jun molaj abej pa ruwi', y kan k'o chiri' k'a re wakami.

Ri pixa' ri xsik'ix chuwech ri juyu' Ebal

³⁰ K'ari' ri Josué xubij chi tipabex-q'anej jun porobel richin kamelabel richin ri Jehová Dios richin Israel chiri' chuwech ri juyu' rubini'an Ebal.

³¹ Ri porobel ri' xban rik'in abej ri man e toch'on ta ni man jun bey samajin ta, achi'el xubij kan ri Moisés ri rusamajel ri Jehová toq xtz'ibatej kan chupan ri wuj richin ri pixa'. K'ari' xkisuj chuwech ri Jehová, poron chikop y chuqa' kamelabel richin nuq'alajirisaj chi junan kiwech rik'in rija'.

³² Y ri Josué chuqa' chiri' chikiwech ri ruwinaq xutz'ibaj chuwech ri abej ri ukusan chire ri porobel ri ch'abel richin ri pixa' ri ruya'on ri Dios chire ri Moisés.

³³ Y chiri' chuwech ri porobel y ri káxa richin ri rujikibel-tzij ri Dios, ri e sacerdote rijatzul ri Leví ri e uk'uayon ri káxa kibanon ka'i' tzobaj, ri nik'aj ek'o ri juk'an y ri nik'aj chik ek'o re juk'an chire ri káxa. Konojel ri e rijatzul kan ri Israel, ri aj-raqen pa kiwi' ri winaqi', ri aj-raqen pa kiwi' ri aj-labal, ri to'onela', y chuqa' ek'o-apo ri man e kiwinaq ta: Konojel rije' e pa'el-apo chikiwech ri e ka'i' tzobaj. Nik'aj chike rije' ek'o chuwech ri juyu' Ebal y ri nik'aj chik ek'o chuwech ri juyu' Gerizim, y ri e ka'i' tzobaj kan e kitzuliben k'a ri e sacerdote, achi'el rubin kan ri Moisés ri rusamajel ri Dios toq xch'on chirij ri urtisanik pa ruwi' ri Israel.

³⁴ Chiri' ri Josué xuben chi xsik'ix ronojel ri ch'abel richin ri pixa', y chuqa' ri urtisanik y ri etzelanik, achi'el tz'ibatel kan chupan ri wuj richin ri pixa' kichin konojel winaqi'.

³⁵ Y man jun ch'abel ri man ta xsik'ix chikiwech ri winaqi', ri rubin kan ri Moisés chi nisik'ix chikiwech ri kimolon-ki'; jajun ri ixoqi' y ri ak'uala' y ri man e kiwinaq ta ri ek'o chikikojol rije'.