Wuj Richin ri Josúe 5 - Kaqchiquel Bible

¹ Konojel ri rey kichin ri amorreo ri ek'o re juk'an-pe chire ri ruchi' ri raqen-ya' Jordán pa qajbel-q'ij y konojel ri rey kichin ri aj-Canaán ri ek'o chunaqaj ri palou, toq xkak'axaj chi ri Jehová xuben chire ri ya' richin ri Jordán chi xpa'e' y xumol-ri' chikiwech ri e rijatzul kan ri Israel y xkiq'axaj, jari' toq xmayamo-qa ri kánima y man xk'oje' ta chik uchuq'a' kik'in rije' chikiwech ri e rijatzul kan ri Israel.

Ri achi'a' xequpix richin xya'ox ketal

² Chupan k'a ri q'ij ri' ri Jehová xubij chire ri Josué: Ke'abana' qupibel rik'in chay y ke'aqupij konojel ri achi'a' richin jun retal richin niq'alajin chi rije' e rijatzul ri Israel; ke'aqupij k'a chi ch'uti'q chi nima'q ri e rijatzul kan ri Israel ri man jani k'o ketal.

³ Y ri Josué xeruben k'a ri qupibel y xeruqupij k'a ri achi'a' richin ri retal chi ch'uti'q chi nima'q, chiri' pa taq'aj ruwi-juyu', y rije' xkibij chire ri juyu' ri' Qupibel.

⁴ Ri Josué xuben chi xequpix ri achi'a' richin ri ketal, roma konojel ri e eleneq-pe pan Egipto, ri aj-labal, xa xeken yan kan pa tz'iran ruwach'ulew,

⁵ roma ri achi'a' ri xe'el-pe pan Egipto kan konojel k'a e qupin-pe richin ri ketal. Jak'a ri xe'alex toq e beneq pa bey ri chiri' pa tz'iran ruwach'ulew toq e eleneq chik pe pan Egipto man e qupin ta richin ri retal.

⁶ Konojel k'a ri rijatzul kan ri Israel xebiyin pa tz'iran ruwach'ulew kawineq juna' y kan konojel ri aj-labal ri eleneq-pe pan Egipto xek'is k'a, roma man xkitaqej ta ri ruch'abel ri Jehová. Y roma ri' ri Jehová xuya' rutzij chike chi man nikitz'et ta ri ruwach'ulew ri ruya'on rutzij chire chi nuya' chike ri kite-kitata'; ri ruwach'ulew ri akuchi niwachin-wi ronojel ruwech tiko'n.

⁷ Wakami jak'a ri alk'ualaxela' ri xek'oje' kan pa kik'exel ri kite-kitata', ja rije' ri xequpix richin ri ketal, roma man jani tiya'ox ri etal ri' chike.

⁸ Y toq xequpix yan konojel ri achi'a' richin jun retal, konojel k'a xekanej-qa chiri' akuchi ek'o-wi-qa, k'a toq xe'utzir na.

⁹ Y ri Jehová xubij chire ri Josué: Re q'ij re' ninwelesaj k'a pan iwi' ri qasanri'il ri xik'owisaj pan Egipto; roma ri' ri ruwach'ulew ri' xubini'aj Guilgal*f1* k'a re wakami.

¹⁰ Y rije' xkinimaq'ijuj ri q'ij toq ri Jehová xuya' ri Solbelri'il. Y re nimaq'ij re' xkiben chupan ri q'ij kajlajuj richin ri ik' ri', toq xqaq'ij-qa, ri chiri' pa Guilgal ri k'o pa taq'aj chuwech-apo ri tinamit Jericó.

¹¹ Chupan ri q'ij wolajuj richin ri ik' ri', jari' toq xkitej ri nabey mul ri ruwech ri tiko'n ri richin ri ruwach'ulew ri'. Xkitej k'a jalajoj ruwech ixin k'ilin y chuqa' xkitej kaxlan-wey ri maneq ch'amilej-q'or rik'in.

¹² Y ri aj-chikajil-wey kan xk'is k'a chupan ri q'ij ri' toq xkitej ri ruwech ri tiko'n ri'. Keri' ri e rijatzul kan ri Israel man jun bey chik xk'oje' ri aj-chikajil-wey kik'in. Y kan chupan k'a ri q'ij ri' xkichop rutijik ri ruwech ri tiko'n ri richin ri ruwach'ulew Canaán.

Ri Josué y ri achin ri ruk'uan jun espada pa ruq'a'

¹³ Y ri Josué k'o k'a ke taq ri' chunaqaj ri tinamit Jericó, toq xutz'et jun achin pa'el chuwech y ruk'uan jun espada pa ruq'a' ri eleneq pa ruk'ojelibal. Y ri Josué xjel-apo rik'in y xubij chire: ¿At achike k'a rat? ¿At qachibil o xa at etzelanel qichin?, xcha' chire.

¹⁴ K'ari' ri achin ri' xubij chire ri Josué: Man jun chike ri ka'i' ri nabij rat, yin kan in tata'al kichin ri e richin ri Jehová ri in peteneq wakami, xcha'. Jari' toq ri Josué xuxuk-xumej-ri' chuwech richin xuya' ruq'ij, y xubij chire: Ajaw ¿achike k'a nawajo' nabij chuwe yin ri asamajel?, xcha'.

¹⁵ Y ri tata'al kichin ri e richin ri Jehová ri' xubij chire: Tawelesaj ri axajab roma re akuchi atk'o-wi kan loq'olej-wi roma wawe' ink'o-wi yin, xcha'. Y ri Josué kan keri' xuben.