Wuj Richin ri Josúe 4 - Kaqchiquel Bible

Ri kablajuj abej ri xelesex-pe pa Jordán

¹ Toq ri winaqi' xeq'ax yan apo ri juk'an chire ri raqen-ya' Jordán, ri Jehová xch'on rik'in ri Josué y xubij:

² Tabij chike ri e kablajuj achi'a' ri jujun chikikojol jujun tzobaj ri e ch'aron richin jun samaj:

³ Tikik'uaj-el kablajuj abej wawe' pa runik'ajal ri raqen-ya' Jordán akuchi e pa'el-wi ri sacerdote; xtikik'uaj k'a el y xtikinuk' akuchi xtiq'axaj-wi re aq'a' re', xkacha' chike, xcha' ri Jehová.

⁴ Y toq ri Josué xeroyoj ri e kablajuj achi'a' ri e rucha'on pa jujun tzobaj richin Israel,

⁵ jari' toq xubij k'a chike: Kixtzolin chik k'a akuchi k'o-wi ri káxa richin ri rujikibel-tzij ri Jehová ri qa-Dios. Y chiri' chi'ijujunal richin ri jun tzobaj xtibek'ama-pe jun abej y xtiya-el chuwi-itele'n,

⁶ richin k'a chi jare' xtok retal chi'ikojol rix. Y toq ri iwiy-imam xtikik'utuj chike ri kite-kitata' re chua'q re kabij-apo y xtikibij: ¿Achike k'a nuk'exewachuj re kablajuj abej re'?,

⁷ jari' toq xtikibij chike: Toq ri káxa ri akuchi beneq-wi ri rujikibel-tzij ri Dios xapon chuchi' ri raqen-ya', jari' toq xch'aratej ri raqen-ya' Jordán, xkecha'. Y kan keri' k'a xtiben, roma ri' re jun molaj abej re' xtik'atzin richin natabel chike ri iwiy-imam richin q'asen, xcha' ri Josué.

⁸ Y ri kablajuj achi'a' ri' kan xkiben k'a achi'el ri xbix chike: Xbekik'ama' k'a pe ri abej ri' achi'el k'a xubij ri Jehová chire ri Josué, achi'el k'a ri kajlabal ri kablajuj tzobaj. Y xkik'uaj akuchi xkiq'axaj-wi ri aq'a' ri' y chiri' xkinuk' wi kan ri abej ri'.

⁹ Y chuqa' ri Josué xunuk' chik kan kablajuj abej chiri', akuchi e pa'el-wi ri e sacerdote ri e uk'uayon ri káxa richin ri jikibel-tzij, y ri abej ri' k'a ek'o na chiri' re wakami.

¹⁰ Y ri e sacerdote ri e uk'uayon ri káxa xepa'e' chiri', rokik xbanatej ronojel ri rubin kan ri Jehová chire ri Josué chi tubij chike ri winaqi'. Keri' k'a xbanatej; k'ari' konojel ri winaqi' xeq'ax anineq chupan ri raqen-ya'. Y chuqa' xbanatej achi'el rubin kan ri Moisés chire ri Josué.

¹¹ Y toq konojel ri winaqi' richin ri tinamit xek'is richin xeq'ax-apo, chuqa' ri e sacerdote ri e uk'uayon ri káxa xkiq'axaj ri raqen-ya' y k'ari' xek'oje' chik el pa nabey chikiwech ri winaqi'.

¹² Y chuqa' xeq'ax ri achi'a' richin ri kitzobaj ri Rubén, ri Gad y ri nik'aj richin ri Manasés, y rije' xe'ik'o k'a nabey chikiwech ri ch'aqa' chik kiwinaq y kan kik'ualon k'a ri kikamisabal, achi'el rubin kan ri Moisés chike.

¹³ Y ri achi'a' ri' kan e tijon jebel richin yebe pa labal, y ri kajlabal jubama e 40,000 ri xe'ik'o rik'in ri kikamisabal, y xe'apon k'a pa taq'aj richin ri tinamit Jericó; kan xkiben k'a achi'el rubin ri Jehová.

¹⁴ Chupan k'a ri q'ij ri', ri Jehová xunimirisaj ruq'ij ri Josué chikiwech konojel ri ruwinaq, kan xkiya' k'a rejqalen y xkinimaj k'a rutzij ri Josué ronojel q'ij chire ri ruk'aslen, achi'el xkiben rik'in ri Moisés.

¹⁵ Toq ri winaqi' xeq'ax yan chupan ri ya' jari' toq ri Jehová xch'on rik'in ri Josué y xubij chire chi

¹⁶ ke'el-pe chupan ri raqen-ya' ri sacerdote ri e uk'uayon ri káxa.

¹⁷ Y ri Josué kan keri' ri xuben.

¹⁸ Y toq ri sacerdote ri e uk'uayon ri káxa xe'el-pe chupan ri raqen-ya', y xeq'ax ri juk'an chik ruchi' ri ya', jari' toq ri ya' richin ri Jordán xbiyin chik jun bey y kan nibulbu'x k'a toq xpe.

¹⁹ Chupan ri q'ij lajuj richin ri nabey ik', ri winaqi' xkiq'axaj k'a ri raqen-ya' Jordán, y xek'oje-qa chiri' chupan ri jun taq'aj ulew rubini'an Guilgal ri k'o chiri' pa relebel-q'ij chire ri tinamit Jericó.

²⁰ Toq ek'o pa Guilgal, ri Josué xubij chi tikinuk'u-q'anej ri kablajuj abej ri kik'amon-pe pa Jordán.

²¹ Y xubij chike ri ruwinaq: Toq re chua'q re kabij-apo xtikik'utuj ri kiy-kimam chike ri kite-kitata' y xtikibij: ¿Achike k'a nuk'exewachuj re kablajuj abej re'?,

²² jari' toq xtiq'alajirisex chike chi ri kati't-kimama' xkik'owisaj ri raqen-ya' Jordán pa chaqi'j.

²³ Roma ri Jehová ri qa-Dios xuben chi xpa'e' y xumol-ri' ri ya' richin ri Jordán richin ri qati't-qamama' xeq'ax pa chaqi'j achi'el chuqa' xuben chire ri Kaqa-Palou.

²⁴ Keri' k'a xbanatej richin chi konojel tinamit richin chijun ruwach'ulew xtiketamaj chi ri ruq'a' ri Jehová kan janila ruchuq'a', y richin chuqa' chi rix k'o ta rukiy ri Jehová ri qa-Dios chiwech ronojel q'ij, xkecha', xcha' ri Josué.