Wuj Richin ri Josúe 3 - Kaqchiquel Bible

Toq ri e rijatzul kan ri Israel xeq'ax chupan ri raqen-ya' Jordán

¹ Y ri jun chik q'ij ri Josué xyakatej nimaq'a' yan, rija' y konojel ri ruwinaq y xekiyek-el ri taq kachoch, xe'el-el chiri' pa Sitim y xe'apon pa taq'aj chuchi' ri raqen-ya' Jordán y xek'oje' na el juba' chiri'.

² Toq q'axineq chik oxi' q'ij, ri achi'a' ri e aj-raqen richin ri tinamit xeq'ax chijun ri chiri' ri akuchi ek'o-wi-qa,

³ y xkibij chike ri winaqi': Toq xtitz'et chi ri e sacerdote ri e rijatzul kan ri Leví kik'uan-el ri káxa richin ri rujikibel-tzij ri Jehová ri qa-Dios, jari' toq xkixk'olon-el ri akuchi ixk'o-wi-qa y xkixtzeqe-el chikij rije',

⁴ richin chi niwetamaj ri bey ri akuchi xkixbe-wi, roma rix kan man jun bey ix q'axineq chupan re jun bey re'. Jak'a k'o chi nej ri ikojol xtiben kik'in ri e uk'uayon ri káxa, man yixjel ta apo rik'in y 600 jaj ikojol niben rik'in ri káxa, xecha'.

⁵ K'ari' ri Josué xubij chire ri tinamit: Tich'ajch'ojirisaj-iwi', roma chua'q ri Jehová xtuben meyel taq banobel chiqakojol roj, xcha'.

⁶ Chuqa' xch'on kik'in ri e sacerdote y xubij: Titelej-el ri káxa richin ri jikibel-tzij y kixik'o-el chuwech ri tinamit, xcha'. Y rije' kan xe'ik'o-el chikiwech ri winaqi'.

⁷ K'ari' ri Jehová xubij chire ri Josué: Chupan k'a re q'ij re', xtinchop ninnimirisaj aq'ij chikiwech konojel ri awinaq, richin chi niq'ax chikiwech chi achi'el xik'oje' rik'in ri Moisés, kan keri' chuqa' xkik'oje' awik'in rat.

⁸ Rat kan kere' k'a xtabij chike ri e sacerdote ri e uk'uayon ri káxa richin ri nujikibel-tzij: Toq xkixapon chuchi' ri raqen-ya' xkixok chupan y xkixpa'e' chiri', xkacha' chike, xcha' ri Jehová.

⁹ K'ari' ri Josué xubij chire ri tinamit: Kixjel-pe y tiwak'axaj ri ruch'abel ri Jehová ri qa-Dios, xcha'.

¹⁰ Y chuqa' xubij: Rik'in ri xtitz'et wakami xtiwetamaj chi ri k'aslik Dios kan k'o-wi chiqakojol roj y kan ja rija' xtelesan-el chiqawech ri winaqi' cananeo, ri hitita, ri heveo, ri ferezeo, ri gergeseo, ri amorreo y ri jebuseo.

¹¹ Ri káxa richin ri rujikibel-tzij ri Jehová ri rajaw chijun re ruwach'ulew, jari' ri xtiq'ax nabey chiqawech chupan ri raqen-ya' Jordán.

¹² Wakami k'a ke'icha' kablajuj achi'a', jujun chupan chi kablajuj tzobaj.

¹³ Y toq ri e sacerdote ri e uk'uayon ri káxa richin ri Jehová ri rajaw chijun ri ruwach'ulew xkepa'e' chupan ri raqen-ya', ri ya' ri' kan xtich'aratej, roma ri ya' ri xulan-pe kan xtipa'e' y xtumol-ri', xcha'.

¹⁴ Ri winaqi' xkiyek-el ri taq kachoch y xebe richin chi nikiq'axaj ri raqen-ya' y ri e sacerdote ri e uk'uayon ri káxa richin ri jikibel-tzij, e ik'owineq chikiwech konojel winaqi'.

¹⁵ Chupan ri q'ij toq nik'ol ri tiko'n, ri raqen-ya' ri' kan janila ninimer. Y jari' toq ri e sacerdote ri e uk'uayon-el ri káxa xe'apon chuchi' ri raqen-ya', y toq xe'ok-apo, rije' kan xch'eqe' ri kaqen, y jari' toq

¹⁶ ri ya' ri xulan-pe xpa'e' y xumol kan ri', y ri akuchi xumol kan ri' ri ya' ri', kan janila nej chike rije' y chunaqaj ri tinamit rubini'an Adam ri k'o chunaqaj ri jun chik tinamit rubini'an Saretán, ri ya' ri beneq pa xulan xapon k'a chupan ri Tzayi-Choy y ri winaqi' xeq'ax-apo pa chaqi'j pa ruchojmilal ri tinamit Jericó.

¹⁷ Ri sacerdote ri e uk'uayon-el ri káxa kan pa chaqi'j k'a xek'oje-wi, y jun xek'oje-wi chiri' pa nik'aj chire ri rubey ri ya', rokik xeq'ax-el konojel ri winaqi', keri' ri tinamit Israel xeq'ax-el pa chaqi'j.