Wuj Richin ri Josúe 23 - Kaqchiquel Bible

Ri rupixabanik ri Josué chire ri tinamit

¹ Ri Jehová xuya' uxlanenri'il chike ri israelita pa kiq'a' ri e etzelanel kichin, y toq xq'ax yan k'iy juna', ri Josué janila chik ri'j.

² Ja q'ij ri' xuteq koyoxik konojel ri ruwinaq, ri achi'a' ri k'o kiq'ij, ri e tata'al, ri to'onela' y ri e samajela' ri k'o kiq'ij richin ri tinamit y xubij chike: Yin kan janila k'a in ri'j chik, y k'o chik k'a k'iy nujuna'.

³ Rix xitz'et ronojel ri xuben ri Jehová ri qa-Dios kik'in konojel ri etzelanel qichin qoma roj, y ja rija' ri xbanon ri oyowal pa qak'exel.

⁴ Yin kan xinch'er yan k'a chiwech ri ruwach'ulew rik'in sakinik richin xiwichinaj. Y chuqa' xinjech yan chiwech ri kiruwach'ulew ri winaqi' ri xech'akatej yan y ri man jani kech'akatej. Re ruwach'ulew re' nitiker-pe rik'in ri raqen-ya' Jordán y napon k'a rik'in ri palou ri k'o pa qajbel-q'ij.

⁵ Ri Jehová ri qa-Dios xkerelesaj-el konojel ri winaqi' chiwech rix y kan man xke'itz'et ta chik y rix kan xtok k'a iwichin ri kiruwach'ulew rije' achi'el rubin rija'.

⁶ Titija' k'a iq'ij richin nik'oje' pan iwánima y tibana' ronojel ri tz'ibatel kan chupan ri wuj richin ri pixa' kichin konojel winaqi' ri ruya'on kan ri Moisés. Man tich'er kan iwi' ni pan iwijkiq'a' ni pan iwajxokon,

⁷ richin man nixol ta iwi' kik'in ri winaqi' richin ri tinamit ri k'a ek'o na kan chupan re ruwach'ulew re'. Man tiya' itzij pa kibi' ri ki-dios, ni man ke'isamajij, ni man tiya' kiq'ij y man ke'inataj.

⁸ Kan ja ri Jehová ri qa-Dios ri xtitzeqelibej, achi'el ri qabanon-pe k'a re wakami.

⁹ Ri Jehová xerelesaj k'a chiqawech ri nima'q taq tinamit ri kan k'o kuchuq'a'. K'a re wakami man jun tikirineq ri rupaban ta ri' chiqawech.

¹⁰ Roma jun achin chi'ikojol rix, ye'animej k'a e 1,000 achi'a' chuwech, roma ja ri Jehová ri qa-Dios ri nibanon oyowal pa qak'exel achi'el rubin rija'.

¹¹ Xaxe k'a ninwajo' ninbij chiwe, chi kan titija' iq'ij richin nichajij-iwi', y kan rik'in k'a ronojel iwánima tiwajo' ri Jehová ri qa-Dios,

¹² roma wi xa xtich'er kan iwi' y xtijunamatej-iwech kik'in ri winaqi' ri k'a ek'o na kan chuwech ri ruwach'ulew ri', y xkixk'ule' kik'in richin xtixol-iwi' kik'in rije' y rije' iwik'in rix;

¹³ kan tiwetamaj k'a chi wi xtiben keri', ri Jehová man xkerelesaj ta el chiwech rix ri winaqi' richin ri ruwach'ulew ri'. Y xa xke'ok k'a jun pikbel chiwe rix, y xkixqaqa pa kiq'a', y xtina' k'a achi'el yixjich' chi xik'a'y y achi'el chuqa' jun k'ix k'o pa runaq'-iwech, y kan xkixruk'is-el chuwech re jebelej ruwach'ulew ri xuya' ri Jehová ri qa-Dios chiqe.

¹⁴ Roma yin xa yiken yan, wakami k'a tiwetamaj kan jebel y tik'oje' kan pan iwánima, y tik'oje' kan chi'ik'u'x, chi ronojel ri rusujun ri Jehová ri qa-Dios chiqe, ronojel xbanatej y man jun xk'oje' ta kan chaq keri'.

^15-16 Wi xtiq'ej ruwi' ri rujikibel-tzij ri Jehová ri qa-Dios ri ruya'on chiwe, y kan xkixbe chikij ri jujun chik dios, xtiya' kiq'ij, y xke'isamajij; wi xtiben keri' ri Jehová ri qa-Dios xtuya-pe ruk'ayewal pan iwi'. Achi'el k'a ri urtisanik ri xuya' rija' pa qawi', keri' chuqa' xtuya-pe ri etzelanik pan iwi', y xkixruk'is-el chuwech ri ruwach'ulew ri xuya' chiqe, xcha' ri Josué.