Wuj Richin ri Josúe 13 - Kaqchiquel Bible

Ruwach'ulew ri man jani kech'akatej

¹ Toq ri Josué kan janila chik ri'j, jari' toq ri Jehová xubij chire: Rat kan janila chik k'iy ajuna', y kan k'a k'o k'iy ruwach'ulew ri k'o richin ye'ich'ek richin nok iwichin.

² Jare' ri ruwach'ulew ri k'a ek'o kan: Chijun ri kiruwach'ulew ri aj-Filistea y ronojel ri kiruwach'ulew ri guesureo,

³ nitiker-el rik'in ri raqen-ya' Sihor ri k'o pa relebel-q'ij chire ri Egipto y napon k'a rik'in ri ruchi' ri tinamit Ecrón ri k'o pa xaman, y ronojel re' nibix ruwach'ulew kichin ri aj-Canaán chire; y chupan ri' ek'o wo'o' tata'al chikikojol ri aj-Filistea. Re' xek'oje' pa tinamit Gaza, Asdod, Ascalón, Gat y Ecrón. Y keri' chuqa' ri kiruwach'ulew ri aveo

⁴ ri k'o pa xokon chire ri kiruwach'ulew ri aj-Canaán; nitiker-el rik'in ri tinamit Mehara ri kichin ri aj-Sidón, y napon k'a pa tinamit Afec, ri akuchi k'o-wi ri ruk'ulba't ri ruwach'ulew kichin ri amorreo.

⁵ Y chuqa' k'a k'o na ri ruwach'ulew kichin ri aj-Guebal, y chijun ri ruwach'ulew Líbano, nitiker-el pa Baal-gad chuxe' ri juyu' Hermón y napon k'a pa relebel-q'ij rik'in ri tinamit Hamat.

⁶ Yin kan xkenk'is k'a chiwech rix, konojel ri aj-Sidón y ri ek'o chuwi' taq juyu' ri nitiker k'a pa Líbano y napon k'a pa Misrefot-maim. Wakami k'a xtajech chike ri awinaq richin keri' xtikichinaj kan jumul, achi'el ri nubin chawe.

⁷ Tach'ara' k'a re ruwach'ulew re' chikiwech ri beleje' tzobaj y chikiwech ri nik'aj tzobaj richin ri Manasés richin nikichinaj kan, xcha' ri Dios chire ri Josué.

Ri ruwach'ulew ri xuch'er kan ri Moisés

⁸ Ri tzobaj richin ri Rubén, ri Gad y ri nik'aj chik tzobaj richin ri Manasés, kan kik'ulun chik k'a kan ri kulew pa ruq'a' ri Moisés ri rusamajel ri Jehová. Y ri ruwach'ulew ri' k'o pa relebel-q'ij chire ri raqen-ya' Jordán.

⁹ Rije' xkichinaj k'a ri ruwach'ulew ri nitiker-pe pa tinamit Aroer ri k'o chuchi' ri ch'uti'n raqen-ya' Arnón y ri tinamit ri k'o pa taq'aj kojol juyu' chire ri raqen-ya' ri', y chijun ri chuwi' taq juyu' ri nitiker-el rik'in ri tinamit Medebá y napon k'a pa tinamit Dibón,

¹⁰ y ronojel ri tinamit ri akuchi xq'aton-wi-tzij ri Sihón rey kichin ri amorreo, ri xk'oje' pan Hesbón, y napon akuchi k'o-wi ri k'ulba't richin ri kiruwach'ulew ri e rijatzul kan ri Amón.

¹¹ Y chuqa' xkichinaj kan ri ruwach'ulew Galaad y chijun ri kiruwach'ulew ri guesureo y ri maacateo, chijun ri juyu' Hermón y chijun ri ruwach'ulew richin ri Basán y napon k'a pa tinamit Salcá.

¹² Y ri rey ri xk'oje' pa ruwi' ri ruwach'ulew ri' ja ri Og, ri xk'oje' juba' pa tinamit Astarot y juba' pa tinamit Edrei; rija' jun ruk'isibel chike ri winaqi' refaíta ri nima'q kipalen. Y ri winaqi' ri' kan e ruch'akon kan ri Moisés y xerelesaj kan chupan ri kiruwach'ulew.

¹³ Jak'a ri israelita man xekelesaj ta el pa kiruwach'ulew ri winaqi' guesureo y ri maacateo, y roma ri' xek'oje-qa chikikojol k'a re wakami.

¹⁴ Jak'a ri tzobaj richin ri Leví man jun xkichinaj kan, roma ri kichin rije', ja ri nel kan chire ri niporox chuwech ri Jehová ri ki-Dios; jari' ri kichinan kan rije', achi'el rubin ri Jehová chike.

¹⁵ Ri Moisés xujech k'a chire ri tzobaj richin ri Rubén, y xuya' chike achi'el ri kajlabal chi kach'alal-ki'.

¹⁶ Y ri kiruwach'ulew rije' nitiker-pe pa tinamit Aroer ri k'o chuchi' ri ch'uti'n raqen-ya' Arnón y ri tinamit ri k'o pa taq'aj kojol juyu' chire ri raqen-ya' ri' y chijun ri chuwi' taq juyu' ri nitiker-el rik'in ri tinamit Medebá,

¹⁷ y napon k'a pa ruwach'ulew Hesbón rik'in ronojel ri rutinamit ri ek'o pa taq'aj: Ja ri Dibón, Bamot-baal, Bet-baal-meón,

¹⁸ Jahas, Cademot, Mefáat,

¹⁹ Quiriataim, Sibmá, Séret-sáhar, ri k'o pa taq'aj kojol juyu',

²⁰ Bet-peor, Bet-jesimot, y ri tinamit ri ek'o chuwa taq juyu' richin Pisgá.

²¹ Y ronojel re ruwach'ulew re' y ri tinamit ri ek'o chuwi' taq juyu' y ronojel ri ek'o pa ruq'a' ri Sihón rey kichin ri amorreo, ri xk'oje' pan Hesbón. Re rey re' kan ch'akatajineq k'a kan roma ri Moisés; chuqa' xeruch'ek kan re tata'al re' richin ri Madián: Ri Eví, ri Réquem, ri Sur, ri Hur y ri Reba; re tata'al re' ri ojer kan xek'oje' chuxe' ri ruq'atbal-tzij ri Sihón.

²² Y chikikojol ri xekikamisaj ri israelita, xken chuqa' ri achin ri nubananej chi nuq'alajirisaj ri peteneq, ri rubini'an Balaam ralk'ual ri Beor.

²³ Ja ronojel re' ri xkichinaj kan ri tzobaj richin ri Rubén, ri ruwach'ulew ri' rik'in ri kitinamit y ri kokoj taq kitinamit, napon k'a chuchi' raqen-ya' Jordán, xkichinaj kan achi'el ri kajlabal chi kach'alal-ki'.

²⁴ Ri tzobaj richin ri Gad xya'ox chuqa' ri kiruwach'ulew roma ri Moisés y xuya' chike achi'el ri kajlabal chi kach'alal-ki'.

²⁵ Ri xkichinaj rije' ja ri tinamit Jazer y ronojel tinamit richin Galaad y nik'aj chire ri kiruwach'ulew ri amonita, ri napon k'a pa tinamit Aroer ri k'o-apo chuwech ri tinamit Rabá,

²⁶ y chuqa' ri ruwach'ulew ri nitiker-el pan Hesbón y napon pa xaman chire ri tinamit Ramat-mispé, y ri tinamit Betonim, y nitiker-el pa relebel-q'ij chire ri tinamit Mahanaim y napon k'a chuchi' ri tinamit Debir.

²⁷ Y chupan ri taq'aj richin ri raqen-ya' Jordán, chuqa' xkichinaj ri tinamit Bet-aram, ri tinamit Bet-nimrá, ri tinamit Sucot, ri tinamit Safón, y ri ch'aqa' chik tinamit ri xek'oje' pa ruq'a' ri Sihón, rey richin ri Hesbón. Ri jun k'ulba't napon pa qajbel-q'ij chire ri raqen-ya' Jordán y ri jun chik k'ulba't napon pa xaman chire ri ruchi' ri choy richin Quinéret.

²⁸ Jare' ri ruwach'ulew y ri kitinamit rachibilan ri kokoj taq kitinamit ri xkichinaj kan ri rijatzul ri Gad achi'el ri kajlabal chi kach'alal-ki'.

²⁹ Chuqa' ri Moisés xujech kan ri ruwach'ulew richin xkichinaj kan ri nik'aj tzobaj richin ri Manasés; xuya' k'a chike achi'el ri kajlabal chi kach'alal-ki'.

³⁰ Ri kiruwach'ulew rije' nitiker-pe rik'in ri tinamit Mahanaim y napon rik'in ri ruwach'ulew Basán ri xk'oje' pa ruq'a' ri rey Og; y keri' chuqa' ri oxk'al kokoj tinamit ri e richin kan ri Jaír, ri xek'oje' pa Basán,

³¹ y chuqa' ri nik'aj ruwach'ulew ri Galaad, ri tinamit Astarot, ri tinamit Edrei. Ronojel re' xok kichin ri nik'aj tzobaj richin ri rijatzul kan ri Manasés ri rutata' ri Maquir, xek'uluman achi'el ri kajlabal chi kach'alal-ki'.

³² Chijun k'a re ruwach'ulew re' xujech kan ri Moisés richin xichinex kan ri k'o pa taq'aj richin ri Moab pa relebel-q'ij chire ri raqen-ya' Jordán ri k'o juk'an ya' chuwech-apo ri Jericó.

³³ Jak'a ri tzobaj richin ri Leví, kan man jun ruwach'ulew xkichinaj pa ruq'a' ri Moisés, roma ja ri Jehová biyon chi ja ri sipanik ri niya'ox chire rija', jari' ri xkichinaj kan rije'.