Wuj Richin ri Josúe 12 - Kaqchiquel Bible

Ri rey ri xech'akatej kan roma ri Moisés

¹ Toq ri Moisés k'a k'es na, jari' toq ri winaqi' israelita xekich'ek ri e ka'i' rey ri yeq'aton-tzij pa ruwi' ri ruwach'ulew ri k'o pa taq'aj chire ri relebel-q'ij chire ri raqen-ya' Jordán, y chuqa' ri chuwi' taq juyu' ri nitiker-el rik'in ri ch'uti'n raqen-ya' Arnón y napon k'a pa juyu' Hermón.

² Y jun k'a chike ri rey ri xch'akatej, rubini'an Sihón, rija' ki-rey ri amorreo, ri k'o chiri' pa tinamit Hesbón. Ri ruq'atbal-tzij nitiker-pe pa tinamit Aroer, ri k'o chuchi' ri ch'uti'n raqen-ya' Arnón, y napon k'a akuchi nusutij-ri' ri ch'uti'n raqen-ya' Jaboc, y ri raqen-ya' ri' jari' ri ruk'ulba't kichin ri rijatzul kan ri Amón. Nel chi tzij chi numej nik'aj chire ri ruwi-juyu' richin ri Galaad.

³ Y chuqa' xuq'et-tzij pa kiwi' ri winaqi' ri ek'o pa taq'aj ri k'o chunaqaj ri raqen-ya' Jordán, ri nitiker-pe chuchi' ri choy richin Quinéret ri k'o pa xaman y napon k'a pa Tzayi-Choy, y re' k'o pa ruchojmilal ri bey ri nibe pa tinamit Bet-jesimot ri k'o pe chuxe' ri ruwi-juyu' Pisgá.

⁴ Y ri jun chik rey ri xch'akatej rubini'an Og, ja rija' ri ruk'isibel chike ri e rijatzul kan ri Refa ri nima'q kipalen. Rija' rey pa ruwi' ri ruwach'ulew Basán y xk'oje' juba' pa tinamit Astarot y juba' pa tinamit Edrei.

⁵ Y ri ruq'atbal-tzij nitiker-pe pa ruwi' ri juyu' Hermón chiri' pa tinamit Salcá y chijun ri ruwach'ulew Basán y napon chuchi' ri tinamit Guesur y ri Maacá, y ri nik'aj chik chire ri ruwach'ulew Galaad, ri k'o chunaqaj ri ruruwach'ulew ri rey Sihón richin ri Hesbón.

⁶ Keri' ri Moisés ri rusamajel ri Jehová, y ri tinamit Israel xekich'ek ri e ka'i' rey ri'. Y ri Moisés xujech re ruwach'ulew re' chike ri tzobaj richin ri Rubén, richin ri Gad y ri nik'aj tzobaj richin ri Manasés, richin xok kichin richin q'asen.

Ri rey ri xech'akatej roma ri Josué

⁷ Jare' ri ruwach'ulew ri xech'akatej roma ri Josué y ri tinamit Israel ri k'o pa qajbel-q'ij chire ri raqen-ya' Jordán. Nel-pe pa tinamit Baal-gad ri k'o pa taq'aj chire ri juyu' Líbano y napon k'a pa juyu' Halac ri nijote-q'anej pa ruwach'ulew Seír. Y ri Josué xujech k'a re ruwach'ulew re' chike chikijujunal ri tzobaj richin ri tinamit Israel achi'el ri rucholajen ri kitzobaj richin xkichinaj kan jumul.

⁸ Xujech k'a ri chuwi' taq juyu', ri ruwa taq juyu' ri ek'o pa qajbel-q'ij, ri taq'aj richin ri raqen-ya' Jordán, ri ruwa taq juyu' ri ek'o pa relebel-q'ij y chuqa' ri tz'iran ruwach'ulew chiri' pa xokon. Ja winaqi' re' ri e richin re ruwach'ulew re': Ri hitita, ri amorreo, ri cananeo, ri ferezeo, ri heveo y chuqa' ri jebuseo.

^9-24 Jak'a tinamit re' ri xech'akatej y chuqa' ri ki-rey: Ri Jericó, ri Ai ri k'o chunaqaj ri Betel, ri Jerusalem, ri Hebrón, ri Jarmut, ri Laquis, ri Eglón, ri Guézer, ri Debir, ri Guéder; ri Hormá, ri Arad; ri Libná, ri Adulam, ri Maquedá, ri Betel, ri Tapúah, ri Héfer, ri Afec, ri Sarón, ri Madón, ri Hasor, ri Simron-merón, ri Acsaf, ri Taanac, ri Meguido, ri Quedes, ri Jocneam ri k'o chunaqaj ri juyu' Carmelo, ri Dor ri k'o pa ruwach'ulew Dor, ri Goím ri k'o pa ruwach'ulew Guilgal, y ri Tirsá. Ri kajlabal konojel ri rey y ri kitinamit ri xech'akatej, e juwineq julajuj.