Wuj Richin ri Josúe 10 - Kaqchiquel Bible

Toq ri winaqi' amorreo xek'is

¹ Chupan ri q'ij ri' ri Adonisédec ri amorreo, rey richin ri Jerusalem, xrak'axaj yan chi ri Josué xuchop yan ri tinamit Ai y kan xuk'is, y kan xuben rik'in ri tinamit ri' y ri ru-rey achi'el xuben rik'in ri tinamit Jericó y ri ru-rey. Y chuqa' xrak'axaj chi ri aj-Gabaón xjunamatej yan kiwech kik'in ri israelita y ek'o chik chikikojol.

² Jari' toq janila k'a xuk'en rukiy, roma chikikojol konojel tinamit ri k'o ru-rey, ja ri tinamit Gabaón ri más nim chikiwech ri ch'aqa' chik tinamit; y chuqa' roma ri Gabaón kan más nim chuwech ri tinamit Ai; y chuqa' roma ri aj-labal ri ek'o chiri' kan maneq xibinri'il chikiwech.

³ K'ari' ri Adonisédec xuteq rubixik chike ri ch'aqa' chik rey kichin ri amorreo; ri Hoham rey richin ri tinamit Hebrón, ri Piram rey richin ri tinamit Jarmut, ri Jafía rey richin ri tinamit Laquis y ri Debir rey richin ri tinamit Eglón. Y xubij k'a chike:

⁴ Kixanpe y kinito' richin nibeqabana' oyowal kik'in ri aj-Gabaón, roma rije' xa xjunamatej-kiwech kik'in ri Josué y ri e ruwinaq, xcha'.

⁵ Xepe k'a ri wo'o' rey ri' kichin ri amorreo; xkimol k'a ki' y xekik'uaj-el konojel ri aj-labal y xebe-q'anej chunaqaj ri Gabaón, richin nibekibana' oyowal kik'in.

⁶ K'ari' ri aj-Gabaón xkiteq rubixik chire ri Josué ri ek'o chiri' akuchi ek'o-wi-qa pa Guilgal y xkibij-el: Man qojamalij kan. Chi'anin kajote-pe qik'in richin yojato', roma konojel ri rey kichin ri amorreo ri ek'o chuwa taq juyu' xkitun-ki' richin nokibana' oyowal qik'in, xecha'.

⁷ Ri Josué xjote' k'a el pa Guilgal kik'in konojel ri aj-labal y konojel ri maneq xibinri'il chikiwech.

⁸ Y ri Jehová xubij chire ri Josué: Man tik'en kikiy rije', roma yin xenjech yan pan iq'a'. Man jun chike rije' ri xtitikir ta xtupaba' ri' chiwech, xcha'.

⁹ Y ri Josué y ri achi'a' chijun k'a aq'a' xebiyin y k'ate' xe'apon kik'in ri e wo'o' rey ri'.

¹⁰ Ri Jehová xuben k'a chike ri amorreo richin xpe jun xibinri'il richin kamik pa kiwi' koma ri israelita. Y keri' ri Josué y ri achi'a' xekikamisaj e k'iy chike ri winaqi' ri' ri chiri' pa Gabaón. Y ri ch'aqa' chik xa xe'animej. Y ri Josué y ri achi'a' xekitzeqelibej k'a pe chupan ri bey ri nixule-qa pa tinamit Bet-horón y xekikamisaj e k'iy k'a chiri' pa tinamit Azecá y pa tinamit Maquedá.

¹¹ Y toq e animajineq chikiwech ri e rijatzul kan ri Israel ri keri' pa xulan richin Bet-horón, ri Jehová xuben richin xpe nimalej taq saqboch pa kiwi' ri amorreo, y ri saqboch ri' xapon k'a ri chiri' pan Azecá, y kan e k'iy k'a xeken. Kan más e k'iy xeken roma ri saqboch ri', chuwech ri xeken rik'in espada.

¹² Chupan k'a ri q'ij ri' ri Jehová xerujech ri amorreo pa kiq'a' ri israelita. Jari' toq ri Josué xch'on rik'in ri Jehová chikiwech ri ruwinaq, y xubij: Rat q'ij, kapa'e' pa ruwi' ri tinamit Gabaón y rat ik', kapa'e' pa ruwi' ri taq'aj kojol juyu' richin Aialón.

¹³ Kan jari' k'a toq ri q'ij y ri ik' xepa'e', k'a toq ri nuwinaq xech'akon chikij ri e etzelanel qichin, xcha' ri Josué. Y ronojel re' tz'ibatel kan chupan ri wuj richin ri Jaser. Ri q'ij xpa'e' pa runik'ajal ri kaj y man chi'anin ta xqaqa, y keri' kan xnimer k'a ri q'ij roma jubama jun q'ij ri xpa'e'.

¹⁴ Man jun bey k'a k'uluwachitajineq ta jun q'ij keri' achi'el ri q'ij ri'; ni ta ri rubanon-pe, ni ta chiqawech-apo, toq ri Jehová xuben ri xubij jun achin, toq kan ja ri Jehová ri nibanon oyowal junan kik'in ri ruwinaq.

¹⁵ Toq ri Josué y ri achi'a' xech'akon yan kan chikij ri e wo'o' rey, jari' xetzolin chiri' akuchi ek'o-wi-qa chiri' pa Guilgal.

¹⁶ Y toq man jani tik'is kan ri oyowal, ri e wo'o' rey xe'animej y xkewaj-ki' chupan jun jul ri k'o chiri' pa Maquedá.

¹⁷ Y xya'ox k'a rutzijol chire ri Josué chi ri e wo'o' rey re' kewan-ki' chiri'.

¹⁸ K'ari' rija' xubij chike ri achi'a': Ke'inima' nima'q taq abej chuchi' ri jul, y ke'iya' achi'a' richin xkechajix richin man ye'el ta pe ri rey.

¹⁹ Y jak'a rix man k'a kixpa'e-qa, xa kan ke'itzeqelibej ri e etzelanel qichin y ke'ikamisaj. Man tiya' q'ij richin ye'ok pa taq kitinamit, roma ri Jehová ri qa-Dios xerujech yan pa qaq'a', xcha'.

²⁰ Y toq ri Josué y ri achi'a' xekich'ek yan ri e etzelanel kichin, ri jujun ri xek'oje' kan chike rije' xe'ok pa taq tinamit ri sutin-rij chi tz'aq.

²¹ K'ari' konojel ri aj-labal xetzolin e utz, y man jun xkik'uluwachij; xe'apon k'a akuchi ek'o-wi-qa pa Maquedá rik'in ri Josué. Y keri' man jun k'a itzel xch'on chikij ri israelita.

²² K'ari' ri Josué xubij chi tijaq ruchi' ri jul y ke'elesex-pe ri e wo'o' rey.

²³ Keri' k'a xkiben y xekelesaj-pe ri e wo'o' rey: Ri rey richin Jerusalem, richin ri Hebrón, richin ri Jarmut, richin ri Laquis y richin ri Eglón.

²⁴ Y toq xek'amer-pe re rey re' chuwech ri Josué, k'ari' rija' xuben chike richin xek'otz'e-qa, y jari' toq xeroyoj konojel achi'a' ri e ruwinaq, y xch'on kik'in ri aj-raqen ri ek'o pa kiwi' ri aj-labal ri e rachibilan rija' y xubij chike: Kixjel-pe, y tiya' ri iwaqen pa kiqul re wo'o' rey re', xcha'. Rije' xejel k'a apo y kan keri' k'a xkiben.

²⁵ Y ri Josué xubij chike ri aj-raqen ri': Man tixibij-iwi' ni man timayamo-qa ri iwánima: titija' iq'ij y kow kixk'oje', roma keri' xtuben ri Jehová chike konojel ri e etzelanel qichin ri xtibebana' oyowal kik'in, xcha'.

²⁶ Chirij ri' ri Josué y ri achi'a' xekikamisaj ri e wo'o' rey ri' y k'ari' xekikanoj wo'o' che', y ri kich'akul xetzeqebex chike ri che' ri' y chiri' xek'oje-wi, k'a toq xqaqa na qa ri q'ij.

²⁷ K'ari' toq ri Josué xubij chi keqasex ri kich'akul, y keya'ox chupan ri jul akuchi xkewaj-wi-ki'. K'ari' xkitz'apej k'a kan ruchi' rik'in nima'q taq abej. Kan keri' xban chike, y chiri' ek'o-wi k'a re wakami.

Toq xch'akatej ri ruwach'ulew ri k'o pa xokon chire ri Canaán

²⁸ Y keri' chuqa' chupan k'a ri q'ij ri' ri Josué y ri achi'a' xkich'ek ri tinamit Maquedá, y xekikamisaj rik'in espada, keri' chuqa' xkikamisaj ri rey, y xekik'is k'a konojel ri winaqi' ri ek'o chupan ri tinamit ri'; y kan man jun k'a xkiya' kan, y xkiben chire ri rey achi'el xkiben chire ri rey richin ri Jericó.

²⁹ Ri Josué y konojel ri aj-labal xe'el k'a el chiri' pa Maquedá, y xebe pa tinamit Libná y xkichop nikiben oyowal kik'in rije'.

³⁰ Y ri Jehová chuqa' xujech pa kiq'a' ri Josué y ri achi'a', re tinamit re' y ri ru-rey; xekikamisaj k'a konojel chi espada y kan man jun xkiya' kan rik'in ruk'aslen. Chuqa' kan keri' xkiben rik'in ri rey achi'el xkiben rik'in ri rey richin Jericó.

³¹ Ri Josué y ri achi'a' xe'el-el pa Libná y xebe pa tinamit Laquis. Chunaqaj ri tinamit ri' xek'oje-wi-qa y xkichop oyowal kik'in ri aj-Laquis.

³² Chuqa' ri Jehová xujech pa kiq'a' rije' ri tinamit ri', y pa ruka'n q'ij xkich'ek. Xekikamisaj k'a konojel chi espada y kan man jun xkiya' kan rik'in ruk'aslen achi'el xkiben pa tinamit Libná.

³³ Y chuqa' ri rey Horam y ri achi'a' e richin ri tinamit Guézer xejote-el chuto'ik ri tinamit Laquis. Jak'a ri Josué y ri achi'a' xekikamisaj konojel rije', y kan man jun xkiya' kan rik'in ruk'aslen.

³⁴ Ri Josué y ri achi'a' xe'el k'a el pa Laquis y xe'apon pa tinamit Eglón. Xek'oje' k'a qa chunaqaj re tinamit re', y xkichop oyowal kik'in rije'.

³⁵ Chupan k'a ri q'ij ri' xkich'ek ri tinamit Eglón y xekikamisaj k'a konojel chi espada achi'el xuben rik'in ri tinamit Laquis.

³⁶ K'ari' ri Josué y ri aj-labal xe'el-pe chiri' pan Eglón y xebe pa tinamit Hebrón; xkichop k'a oyowal kik'in rije'.

³⁷ Xkich'ek k'a y xekikamisaj chi espada ri rey y konojel winaqi' ri ek'o pan Hebrón y chuqa' ri winaqi' ri ek'o pa taq kokoj tinamit ri ek'o chunaqaj. Y keri' xekikamisaj konojel y man jun xkiya' kan rik'in ruk'aslen, achi'el xkiben kik'in ri aj-Eglón; keri' k'a xekik'is konojel ri k'o kik'aslen ri ek'o chiri'.

³⁸ Chirij k'a ronojel re' k'ari' ri Josué y ri achi'a' xetzolin-qa pa xokon richin xebe pa tinamit Debir, y xkiben oyowal kik'in rije'.

³⁹ Xkich'ek ri tinamit ri', y xekikamisaj chi espada ri ru-rey y konojel winaqi' ri ek'o pa Debir y chuqa' ri winaqi' ri ek'o pa taq kokoj tinamit, y kan man jun xkiya' kan rik'in ruk'aslen. Achi'el xkiben rik'in ri tinamit Hebrón, y rik'in ri tinamit Libná, keri' xkiben rik'in ri tinamit Debir y ri ru-rey.

⁴⁰ Ri Josué y ri achi'a' xekich'ek k'a konojel tinamit ri ek'o pa xokon: Ri winaqi' ri ek'o chuwech ri ruwach'ulew ri ek'o chuwa taq juyu', ri ek'o pa xokon chire ri ruwach'ulew, ri ek'o pa taq'aj chuwech ri palou y ri ek'o pa xulan chire ri relebel-q'ij. Y xekikamisaj ri ki-rey y konojel winaqi' ri ek'o chiri', y kan man jun k'a xkiya' kan rik'in ruk'aslen. Kan konojel k'a xekikamisaj, achi'el rubin ri Jehová Dios richin Israel.

⁴¹ Ri Josué y ri achi'a' xekich'ek konojel re winaqi' re': Nitiker k'a pe rik'in ri tinamit Cadés-barnea y napon k'a pa tinamit Gaza; nitiker k'a pe rik'in ri tinamit Gosen y napon k'a pa Gabaón.

⁴² Ri Josué y ri achi'a' xekikamisaj k'a kan konojel re rey re' richin xkich'ek kan ri kiruwach'ulew: Y re' kan xetikir xkiben pa jun bey, roma ri Jehová ri ki-Dios xbanon oyowal junan kik'in rije'.

⁴³ K'ari' ri Josué y ri aj-labal xebe y xetzolin-qa pa Guilgal ri akuchi ek'o-wi-qa.