Wuj Richin ri Jeremías 50 - Kaqchiquel Bible

Toq xtich'akatej ri ruwach'ulew Babilonia

¹ Ri Jehová xch'on rik'in ri Jeremías pa ruwi' ri ruwach'ulew Babilonia y kere' xubij chire:

² Tiya' k'a rutzijol chikikojol ri tzobaj winaqi' richin re ruwach'ulew y tibana' chike chi nikak'axaj; tiyaka-q'anej ri tzieq ri ruk'exewach ri iruwach'ulew y man jun tiwewaj y tibij: Rix aj-Babilonia xixch'akatej y ri i-dios Bel k'ixbitajineq, ri i-dios Marduc xwulex kan. Ri e etzelanel iwichin xkekiyojobej ri ch'aqa' chik wachibel y xkewulex kan.

³ Roma kan k'a pa xaman xkepe jun tzobaj winaqi' chiwij y ja rije' ri xkebanon chire ri iruwach'ulew chi xtok kan tz'iran. Kan man jun chik k'a xtik'ase' kan chiri', ni winaqi' ni ta ri chikopi', roma konojel xke'animej-el.

⁴ Yin Jehová ri yibin. Chupan ri q'ij ri', rix winaqi' richin ri ruwach'ulew Israel y ri Judá kan rik'in k'a oq'ej xkinikanoj.

⁵ Rix xtik'utuj ri akuchi k'o-wi ri bey ri nibe pa tinamit Sión. Y keri' k'a xkixbe y xtibij chi nijunamatej-iwech wik'in. Xtiben k'a jun jikibel-tzij richin q'asen, richin chi man jun bey xkinimestaj.

⁶ Rix nutinamit xa ix achi'el karne'l ri ix sachineq, roma ri aj-raqen xa xixkitaluj kan achi'el nuben jun yuq'unel ri yerutaluj kan ri rukarne'l. Rije' xkiya' q'ij chiwe chi xixsach kan pa taq juyu'. Xixel-el pa juyu' y kan ximestaj kan ri iqejoj.

⁷ Toq ri e etzelanel iwichin yixkil, kan yixkik'is. Y k'ari' rije' nikibij chi man kimak ta ri keri' xkiben iwik'in, roma rix kan xixmakun chinuwech, ri in qitzij yuq'unel, achoq ik'in xkikuquba-wi kik'u'x ri ite-itata'.

⁸ Kixanimej k'a el chiri' pa Babilonia. Y kan ja rix ri nabey yixel-el achi'el nikiben ri achija' taq tzuntzun chikiwech ri ch'aqa' chik chikopi'.

⁹ Roma kan ninbenbana' chi k'iy tzobaj winaqi' ri junan xkepe re kere' pa xaman richin xkekichop chi oyowal ri aj-Babilonia. Kan xtikiben oyowal kik'in y kan xkekich'ek kan ri aj-labal ri kan e richin labal ri kan jebel yetikir. Toq nikik'eq ri kich'ab, kan choj nikimej ri nikiq'ijuj.

¹⁰ Kan ronojel k'a xtikelesaj chikiwech ri aj-Babilonia y ri xke'elesan-el chike kan janila xkekikot rik'in ri xtikik'uaj. Ja yin Jehová ri yibin.

¹¹ Rix ri aj-Babilonia toq xik'uaj-el ronojel pa nutinamit, kan xixkikot y xixnimaq'ijun. Rix kan xixtzopin rik'in kikoten achi'el nuben jun nima-alaj ixoq wákix nitzopiyaj toq nich'ay ri trigo. Chuqa' xixyijij achi'el nikiben ri kiej.

¹² Roma ri' ri iruwach'ulew y ri tinamit ri akuchi ix alaxineq-wi kan xkek'oje' kan pa k'ixbilal. Ja rija' ri xtibech'akatej pa ruk'isibel chike ri tzobaj taq winaqi' richin ri ruwach'ulew y kan xtok k'a tz'iran; chaqi'j-chaqi'j y man jun xtik'oje' kan chiri'.

¹³ Roma ri woyowal kan xtinben chi kan man jun chik winaqi' xkek'oje' kan chiri'. Chuqa' xtinben chire chi xtok tz'iran ruwach'ulew richin q'asen y konojel k'a ri xkeq'ax chiri' xtikixibij-ki' roma xtikitz'et ri rutojbalil ri xuk'ul.

¹⁴ Y rix ri ix etzelanel kichin ri aj-Babilonia, kan ticholajij k'a iwi' richin nisutij-rij ri kitinamit. Rix ri ix aj-ch'ab, kan tik'aqa' ronojel ri ch'ab chikij roma xemakun chinuwech yin.

¹⁵ Tiraqa' k'a ichi' chikij xabakuchi, roma ri aj-Babilonia nikijech yan ki' pan iq'a'. Xketzaq k'a ri kachoch ri chajinela' ri k'o pa ruwi' ri tz'aq, y xkewulatej k'a ri tz'aq. Tiya' k'a ri ruk'exel chike rije'. Tibana' k'a kik'in rije' achi'el xkiben kik'in ri ch'aqa' chik.

¹⁶ Man tiya' q'ij richin nik'ase' jun wineq aj-Babilonia richin nuben-qa rutiko'n o nuk'ol ta ruwech ri rutiko'n. Chuqa' ri winaqi' ri man e aj chiri' ta xketzolin pa taq kiruwach'ulew. Chikijujunal xke'animej y xkebe pa taq kiruwach'ulew toq xtikitz'et ri labal ri kan nuk'is ronojel.

Ri aj-Israel xketzolin pa kiruwach'ulew

¹⁷ Rix winaqi' israelita ri italun-iwi' achi'el karne'l ri e sachineq y e tzeqeliben koma koj. Ri nabey koj ja ri rey richin Asiria, ri xixrutej rix. K'ari' xpe ri Nabucodonosor rey richin Babilonia y xupaq'aq'ej ri ibaqil.

¹⁸ Roma ri' yin Jehová ri k'o ronojel uchuq'a' wik'in, ri i-Dios kere' ninbij: Ninya' rutojbalil pa ruwi' ri rey richin Babilonia y ri ruwinaq, achi'el xinben kik'in ri aj-Asiria.

¹⁹ Xtinben chi rix xkixtzolin pan iruwach'ulew. Y chiri' kan jebel xkixwa' achi'el jun karne'l ri nik'oje' k'iy ruq'os chiri' pa juyu' Carmelo, pa ruwach'ulew Basán, pa k'echelaj richin Efraín y chiri' pa Galaad.

²⁰ Yin Jehová ri yibin. Y chupan ri q'ij ri', wi jun wineq nukanoj richin nubij ri imak, man xtril ta, roma yin xkenkuy ri juba' ri xekanej kan.

Ri Jehová xkeruk'is ri aj-Babilonia

²¹ Rix ri ix etzelanel kichin ri aj-Babilonia, ke'ichapa' k'a chi oyowal ri winaqi' ri ek'o pa ruwach'ulew Merataim y chuqa' ri winaqi' ri ek'o chiri' pa tinamit Pecod. Ke'itzeqelibej k'a; ke'ikamisaj kan jumul; kan tibana' k'a chike ronojel ri ninbij chiwe yin. Yin Jehová ri yibin.

²² Chupan ri tinamit nak'axatej k'a raqoj-chi'ij richin labal roma ri nimalej ruk'ayewal.

²³ Ri ojer kan ri Babilonia achi'el jun bajibel kichin konojel ruwach'ulew. Jak'a re wakami, ja rija' ri xwulatej y kan xk'is. Y toq ri winaqi' nikitz'et, kan janila nikixibij-ki' chuwech.

²⁴ Yin xinben jun pikbel kichin ri aj-Babilonia y kiyon rije' xetzaq chupan. Kan xeqaqa k'a pa pikbel roma kan xkipaba-ki' chinuwech.

²⁵ Yin xinjeq akuchi ek'o-wi ri nukamisabal y xinwelesaj k'a pe ri kamisabel richin woyowal, roma yin Jehová ri k'o ronojel uchuq'a' wik'in, k'o k'a jun ri k'o chi ninben chupan ri ruwach'ulew Babilonia.

²⁶ Y rix ri ix etzelanel kichin, kan ke'ik'ulu' k'a chi oyowal xabakuchi. Tijaqa' k'a ri kik'ujay. Timolo' ronojel ri k'o kik'in y ke'ik'isa', richin keri' man jun xtik'oje' kan.

²⁷ Ke'ikamisaj k'a konojel aj-labal, achi'el niban kik'in ri taq wákix toq yekamisex. Toq'ex k'a kiwech rije' roma xapon ri kiq'ij, richin niya'ox ri rutojbalil pa kiwi'.

²⁸ Xtak'axatej k'a ri ch'abel kichin ri winaqi' ri xke'animej-pe pa ruwach'ulew Babilonia y xke'apon pa tinamit Sión richin xtokitzijoj ri rutojbalil ri xtinya' pa kiwi', roma ri xkiben chire ri wachoch.

²⁹ Ke'iwoyoj k'a konojel ri aj-ch'ab, richin chi nibekibana' oyowal kik'in ri aj-Babilonia. Tisutij k'a rij ri tinamit richin chi man jun nanimej-el. Tiya' k'a ri rutojbalil pa kiwi' achi'el ri ruk'amon. Tibana' k'a kik'in achi'el ri xkiben rije', roma kan xkinimirisaj-ki' chinuwech yin, Jehová ri loq'olej Dios richin ri tinamit Israel.

³⁰ Roma ri' konojel ri alaboni' xkeken chiri' pa taq bey y konojel ri aj-labal xkeken chupan ri q'ij ri'.

³¹ Yin Jehová ri k'o ronojel uchuq'a' wik'in ninbij chi kan in yakatajineq chikij konojel ri kinimirisan-ki'. Y wakami xapon ri q'ij richin ninya' ri rutojbalil pa kiwi'.

³² Ri winaqi' ri' wakami xtikipajk'ij kaqen y xketzaq, y man jun xtiyako kichin richin xketo'ox. Xtinya' ruq'aq'al ronojel ri tinamit Babilonia y ri q'aq' ri' xtuk'is ronojel ri ek'o chikinaqaj.

³³ Yin Jehová ri k'o ronojel uchuq'a' wik'in ninbij chi ri tinamit Israel y ri Judá ek'o pa tijoj-poqonal. Ri e etzelanel kichin kan e kiya'on pa ximonri'il y man yekisq'opej ta pe.

³⁴ Jak'a yin ri yikolon kichin y kan k'o uchuq'a' wik'in, y nubini'an Jehová ri k'o ronojel uchuq'a' wik'in y kan pa ruchojmilal ri xtinben kik'in. Xtinya' uxlanibel-k'u'x chupan ri kiruwach'ulew, jak'a pa kiwi' ri aj-Babilonia xa xtinya' xibinri'il.

³⁵ Yin Jehová ri yibin. Ri woyowal xtiqaqa pa kiwi' ri aj-Babilonia, pa kiwi' ri e aj-raqen y pa kiwi' ri achi'a' e aj-na'oj.

³⁶ Chuqa' ri woyowal xtoqaqa pa kiwi' ri aj-itza' y rije' kan xke'ok achi'el ch'u'j. Chuqa' ri woyowal xtoqaqa pa kiwi' ri achi'a' ri maneq xibinri'il chikiwech, richin xtikixibij-ki'.

³⁷ Ri woyowal xtoqaqa pa kiwi' ri kikiej y ri ki-carruaje. Xtoqaqa k'a pa kiwi' ri ch'aqa' chik aj-labal y rije' man xtikajo' ta xkebe pa labal, achi'el nuben jun ixoq. Chuqa' ri woyowal xtoqaqa pa ruwi' ri kibeyomel y kan ronojel k'a xtelesex-el chuwi-kiq'a'.

³⁸ Xtipe ri saq'ij y ri raqen taq ya' kan xkechaqi'j-qa, roma ri Babilonia jun ruwach'ulew ri nojineq rik'in wachibel y roma nikiya' kiq'ij ri itzel taq wachibel ri', ri winaqi' kan yech'ujer.

³⁹ Roma ri' ri chiri' pa Babilonia kan xtikiben kisok ri utiwa', ri túkur y ri ch'aqa' chik chikopi' ri ek'o pa tz'iran ruwach'ulew. Kan man jun bey chik k'a xkek'ase' winaqi' chiri' tibe-q'ij tibe-seq.

⁴⁰ Kan xenk'is k'a ri tinamit Sodoma y Gomorra y ri tinamit ri ek'o chikinaqaj. Y kan keri' chuqa' xtinben rik'in ri Babilonia. Y man jun chik k'a ri xtibek'oje' chik chiri'. Yin Jehová ri yibin.

⁴¹ K'a kela' pa xaman xkepe winaqi' kichin jalajoj ruwech taq ruwach'ulew richin nokibana' oyowal.

⁴² Kan kik'ualon chik ri kich'ab y ri kikum. Rije' kan janila e mal y man jun joyowanik ri k'o kik'in. Ri raqoj-chi'ij ri nikiben achi'el niq'ajan ri palou. Y kan yech'oke' k'a pe chirij taq kiej y kan kinaban chik ki' richin nikichop oyowal iwik'in rix aj-Babilonia.

⁴³ Ri i-rey toq xtrak'axaj ri rutzijol chi e peteneq, kan xtik'is ri ruchuq'a'. Kan xtipe bis pa ránima, y xtuna' jun q'axo'n achi'el nuna' jun ixoq toq nalex yan ti ral.

⁴⁴ Ri e etzelanel iwichin chaq k'ate' k'a xkepe achi'el nuben jun koj ri nel-pe pa taq q'ayis richin ri raqen-ya' Jordán. Y rix aj-Babilonia kan ix talutajineq achi'el nikitaluj-ki' ri karne'l ri e tzeqeliben roma ri koj chupan ri soq'olbel. Chuqa' xtinben chi ri xtiq'aton-tzij chiri' ja ri wineq ri xtincha' yin, roma man jun chik xtitikir xtujunamaj-ri' wik'in yin. Y wi yin xkipe achi'el nuben jun koj richin yixintaluj rix, ¿achike ta k'a yuq'unel ri nitikir nupaba-ri' chinuwech?

⁴⁵ Tiwak'axaj k'a ri nuch'obonik pa kiwi' ri aj-Babilonia. Kan xke'uk'uex-el ri alaboni' y ri xtani' achi'el ri taq karne'l ri más taq e kokoj ri ye'uk'uex-el pa kamik. Y chuqa' kan xtibek'is ri iruwach'ulew, achi'el nik'is jun soq'olbel ri jebel rubanon.

⁴⁶ Toq xtich'akatej ri iruwach'ulew Babilonia, ri iruwach'ulew kan xtisilon y kan janila xtiq'ajan y ri raqoj-chi'ij ri xtikiben kan xtak'axatej k'a juk'an chik ruwach'ulew, xcha' ri Dios.