Wuj Richin ri Jeremías 5 - Kaqchiquel Bible

Ri aj-Jerusalem man xkiben ta achi'el xubij ri Jehová

¹ Ri Jehová nubij: Kixbiyin pa taq bey richin ri tinamit Jerusalem y titz'eta' jebel. Ke'ikanoj pa taq nima'q ruwech bey y titz'eta' wi k'o jun nuben ronojel pa ruchojmilal, jun ri nrajo' nuben xaxe ri qitzij. Wi rix niwil jun, yin xtinkuy rumak ri itinamit Jerusalem.

² K'o jujun nikijikiba' kitzij pa nubi' yin, jak'a xa nikibananej richin nikijikiba' kitzij, xcha'.

³ Jehová, ¿man ja ta kami ri qitzij nakanoj rat? Rat xaya' rutojbalil-mak pa kiwi' y man xeq'axomer ta; xaya' wululen pa kiwi', jak'a man xkajo' ta xatkinimaj. Kan xkikowirisaj k'a ri kánima, más chuwech ri abej y kan man xkajo' ta xetzolin chupan ri utzilej bey.

⁴ K'ari' yin xinbij: Kan qitzij na wi rije' man jun ok k'o kik'in; kan man tz'aqet ta ri kich'obonik, roma man ketaman ta ri bey richin ri Jehová y man ketaman ta ri nubij.

⁵ Wakami k'a yibe kik'in ri nima'q taq winaqi' richin yibech'on kik'in, roma rije' kan ketaman ri rubey ri Jehová, ri ruchojmilal richin ri Dios. Jak'a rije' chuqa' xa xkiq'ej ri rutzij ri Jehová y man xkinimaj ta rutzij.

⁶ Roma ri' ri koj ri k'o pa k'echelaj kan xkerukamisaj, ri utiwa' ri ek'o pa tz'iran ruwach'ulew kan xkekiwech', ri balma xtuchop ri' kik'in chiri' chunaqaj ri kitinamit y kan xkeruk'ajij toq xke'el-pe, roma janila k'iy mak e kibanalon y janila k'iy q'oloj ri xekibanala'.

⁷ Roma ri' yin kere' ninbij: Yin kan man xtinkuy ta ri imak. Chuqa' ri iwalk'ual xinkimalij kan y kan xkiya' kitzij pa kibi' dios ri xa man e qitzij ta. Xinya' kiway pa ruk'iyal, jak'a rije' xa man xkinimaj ta nutzij y rije' xa xekitzeqelibej ch'aqa' chik dios.

⁸ Y ri achi'a' xa xekitzeqelibej-el kixjayilal ri kachpochel, achi'el jun kiej ri kan jebel ilin, ri kan k'o rayibel chire y kan niyijij chirij jun ixoq kiej.

⁹ Roma ri' xtinya' rutojbalil-mak pan iwi'. Kan rik'in ronojel wánima xtinya' ruk'exel chiwe. Ja yin Jehová ri yibin.

¹⁰ Roma ri' ninya' q'ij chike ri e etzelanel iwichin richin yixkik'is, achi'el toq nijoq'-el ri ruq'a' ri uva ri xemayamo' yan qa, roma re' man e wichin ta yin. Jak'a man ye'ik'is ta el ronojel.

¹¹ Xtinben ronojel re' roma rix aj-Israel y aj-Judá xa xixyakatej chuwij.

¹² Rije' man xkinimaj ta rutzij ri Jehová y xkibij: Ronojel re' man qitzij ta y man jun xtiqak'uluwachij. Man xqojkamisex ta rik'in espada, ni man xtipe ta wayjal chiqij.

¹³ Ri nikibananej chi e q'alajirisey ruch'abel ri Dios xa xke'ok achi'el ri kaq'iq', roma ri Dios xa man jun chik nuq'alajirisaj chike. Y kere' xtibanatej kik'in rije', yecha'.

¹⁴ Roma ri' kere' nubij ri Jehová ri Dios k'iytisanel richin ronojel: Roma xkibij re ch'abel re', yin ninbenbana' chawe Jeremías chi rat xkatok achi'el jun q'aq' y ri tinamit xtok achi'el si'. Y toq rat yach'on, ri q'aq' kan xkeruk'is.

¹⁵ Y chuqa' ninbij chiwe rix nutinamit, chi yin xkenteq-pe winaqi' chiwij ri k'a janila nej yepe-wi, jun tinamit ri k'o ruchuq'a' y kan ojer ri' k'o-pe. Y rix kan man xtiq'ax ta k'a chiwech ri kich'abel rije'.

¹⁶ Konojel rije' e aj-labal ri man nikixibij ta ki' y chikijujunal ri rute' ch'ab nuk'exewachuj kamik.

¹⁷ Rije' xtikitej ronojel ruwech ri itiko'n y ri iway. Xkekik'uaj konojel ri iwalk'ual. Xkekitej ronojel ri iwawej y xkekik'is ri ijuwi-uva y ri iwíkix. Kan rik'in k'a ri kikamisabal xtikik'is kan ronojel ri nima'q taq itinamit ri kan e tz'apen rik'in tz'aq, ri achoq ik'in ikuquban-wi ik'u'x.

¹⁸ Man rik'in ri' chupan apo ri q'ij ri' man xkixink'is ta jumul. Yin Jehová ri yibin.

¹⁹ Toq xtik'utux chawe ri achike roma yin kere' xinben, rat Jeremías, xtabij k'a chike: Ri Jehová xixrumalij kan, roma rix xa xe'iwilij ch'aqa' chik dios ri man e richin ta re tinamit re'. Keri' chuqa' k'o chi xke'iwilij winaqi' ri man e richin ta re tinamit re', ri ek'o pa jun chik ruwach'ulew, xkacha'.

Ri kiyakatajinenri'il ri aj-Israel

²⁰ Tiya' k'a rutzijol chiwech-qa rix, ri aj pa rachoch kan ri Jacob y tiya' rutzijol richin nikak'axaj konojel ri winaqi' aj-Judá.

²¹ Tiwak'axaj k'a rix ri maneq iwetamabal y ri man jun niq'ax chiwech. K'o runaq' taq iwech y man yixtzu'un ta, k'o ixikin y man yixak'ex ta.

²² ¿Kan man nixibij ta k'a iwi' chinuwech?, nubij ri Jehová. ¿Kan man yixbaybot ta k'a chinuwech yin, ri xinya' ri sanayi' richin ruk'ulba't ri palou, jun k'ulba't ri man nitikir ta nuq'axaj ri ya'? Xtibolqo't k'a ri ruwi' ri ya', jak'a xa xtik'is-qa; kan xtiwajin, jak'a man xtiq'ax ta chire ri ruk'ulba't. Yin Jehová ri yibin.

²³ Jak'a rix kan janila ikowirisan ri iwánima y kan ix yakatajineq chuwij. Kan xiniq'ol y ja ri ruche'el-iwij ri xiya' kan chinuwech.

²⁴ Kan man xibij ta qa: Tiqaya' ruq'ij ri Jehová ri qa-Dios, roma kan pa ruq'ijul nuya-pe ri nabey y ri ruk'isibel taq job y kan ruya'on k'a pe jun q'ij richin niqak'ol ruwech ri tiko'n, man yixcha' ta qa.

²⁵ Ja ri imak rix, ri xbanon chi xjalatej ronojel re' y ja ri imak ri xq'aton richin niqaqa ri utz pan iwi'.

²⁶ Roma chi'ikojol rix ek'o ri itzel taq achi'a' ri kan k'ulan yetzu'un achi'el nikiben ri yeya'on pikbel, richin yekichop kan winaqi'.

²⁷ Kan nikinojisaj ri kachoch rik'in ronojel ri keleq', achi'el toq yenoj ri taq jay kichin ri aj-xik' taq chikopi'. Roma ri' xebeyomer-q'anej.

²⁸ Y kan janila e ti'oj, roma jebel yetzuq. Ri kimak kan ik'owineq chik ruwi' ri nikiben, roma man nikiben ta pa ruchojmilal kik'in ri meba'i', ni man nikiq'et ta tzij pa ruchojmilal pa kiwi' ri man jun ok k'o kik'in.

²⁹ Kan xtinya' rutojbalil-mak pa kiwi' roma ronojel re'. Yin Jehová ri yibin. Chi ninya' rutojbalil pa kiwi' ri winaqi' ri'.

³⁰ Kan janila itzel taq banobel yebanatej chupan re ruwach'ulew re':

³¹ Ri nikibananej chi e q'alajirisey nuch'abel xa ruyon tz'ukun taq tzij ri xkiben; ri e sacerdote nikiq'et-tzij achi'el ri nikajo' rije' y ri nutinamit ja ri keri' ri nikajo'. ¿Achike k'a xtiben rix toq xtapon ri q'ij richin ri q'atoj-tzij?