Wuj Richin ri Jeremías 48 - Kaqchiquel Bible

Ri rutzijol pa ruwi' ri ruwach'ulew Moab

¹ Ri Jehová ri k'o ronojel uchuq'a' pa ruq'a', ri qa-Dios richin Israel, xuya' re rutzijol re' chuwe pa ruwi' ri ruwach'ulew Moab: ¡Toq'ex ruwech ri tinamit Nebo roma xtiwulatej! Chuqa' ri tinamit Quiriataim xtich'akatej y xtiqasex ruq'ij. Ri tz'aq ri k'o chirij ri tinamit ri', kan jumul xtiwulatej.

² Ri iruwaq'ijaj rix aj-Moab xa xtik'is, roma chiri' pa tinamit Hesbón ri e etzelanel iwichin nikich'ob richin yixkik'is. Chuqa' rix ri aj-Madmén kan xkixkik'is y ri labal man jun bey xkixruya' kan.

³ Chiri' pa tinamit Horonaim xtak'axatej raqoj-chi'ij y xa wululen y ruk'ayewal ri xtik'oje' chiri'.

⁴ Ri iruwach'ulew rix aj-Moab xtik'oje' pa wululen y ri raqoj-chi'ij kichin ri taq iwalk'ual xtapon xabakuchi.

⁵ Kan xtibiyin ri ruya'al runaq' taq iwech toq xkixjote-el pa tinamit Luhit y chiri' pa ruwaxulan chire ri tinamit Horonaim, ri e etzelanel iwichin xtikak'axaj ri iraqoj-chi'ij roma ri ruk'ayewal.

⁶ ¡Kixanimej! ¡Tikolo' ri ik'aslen! Kixanin achi'el ri taq bur ri ek'o pa tz'iran ruwach'ulew.

⁷ Rix winaqi' aj-Moab kan ikuquban ik'u'x rik'in ri iwuchuq'a' y rik'in ri ibeyomel, jak'a xa xkixchap-el y xkixuk'uex-el iwachibilan ri i-dios Quemós, ri ru-sacerdote y ri e aj-raqen pa ruwi' ri itinamit.

⁸ Ri wululen xtapon k'a pa ronojel itinamit y man jun ri xtikolotej ta kan. Kan ronojel xtik'is; ri taq'aj kojol juyu' y chuqa' ri taq'aj.

⁹ Kan tiyaka-q'anej jun abej retal akuchi xkemuq-wi ri iwinaq, roma xa kan xkek'is y ri itinamit kan xtiwuluwu' kan. Y man jun chik wineq ri xtik'oje' kan chiri'.

¹⁰ Itzel ruwa-kiq'ij ri man xkixkik'is ta rix achi'el xinbij yin. Itzel ruwa-kiq'ij wi man xtikajo' ta xtikiyoj-ki' richin xkixkikamisaj.

¹¹ Rix aj-Moab kan pa rutikeribel k'o-pe ri uxlanibel-k'u'x iwik'in. Man jun bey ix uk'uan ta el pa ximonri'il. Rix ix achi'el k'a ri vino ri niya'ox pa jun k'ojelibel ri man jun bey nituk ruwech richin nutun ta ri' rik'in ri k'ey y man nijam ta chupan jun chik k'ojelibel. Roma ri' kan k'o ruki'il y man k'isineq ta ri ruxla'.

¹² Jak'a yin Jehová ninbij chi xtapon k'a jun q'ij toq yin xkixinteq-el pa jun chik ruwach'ulew, achi'el xtikijem ri vino chupan ch'aqa' chik k'ojelibel. Jak'a ri k'ojelibel iwichin rix xa xkepaxix kan.

¹³ K'ari' rix aj-Moab xkixk'ixbitej roma ri i-dios Quemós*f11* achi'el xkiben ri winaqi' israelita roma ri ki-dios ri k'o pa Betel, ri kan kikuquban kik'u'x rik'in.

¹⁴ Man tibij rix aj-Moab chi maneq xibinri'il chiwech y ix aj-labal ri kan k'o janila iwuchuq'a',

¹⁵ xtapon k'a ri niwulan richin ri iruwach'ulew y ri itinamit. Ri jebel rubanon chupan ri ruk'ajolil xtiken. Keri' ninbij yin ri rey pa ruwi' chijun ri ruwach'ulew, yin Jehová ri k'o ronojel uchuq'a' pa nuq'a'.

¹⁶ Ri wululen peteneq chirij ri iruwach'ulew Moab y k'o chik pe naqaj. Ri ruk'ayewal kan chiri' chik k'o-wi-pe.

¹⁷ Chuqa' xtinbij chike ri tinamit ri ek'o-pe chi'inaqaj richin rije' xkebison chiwij, roma rije' ketaman ri jebelej itzijol rix. Rije' xke'oq' y xtikibij: ¡Titz'eta', kan xk'is k'a ri kiq'atbal-tzij rije', stape' janila kuchuq'a', xkecha'.

¹⁸ Rix winaqi' aj-Dibón, kixqaqa-pe ri akuchi janila iq'ij y xkixtz'uye' pa chaqi'j ulew, roma ri nik'ison richin ri ruwach'ulew Moab kan peteneq chuqa' chiwij rix. Y kan xtuwulaj k'a ri tz'aq richin ri itinamit rix.

¹⁹ Y rix winaqi' aj-Aroer, kixpa'e' k'a chuchi' ri bey y xke'itz'et ri winaqi' ri e animajineq. Xtik'utuj k'a chike, ri achike xbanatej.

²⁰ Y rije' xtikibij: Ri ruwach'ulew Moab xwulatej yan; xqasex ruq'ij y kan janila ruxibin-ri'. Kan kixoq' kik'in y kan tiraqa' ichi' roma ri qaq'axo'n. Tiya' rutzijol chiri' pa raqen-ya' Arnón chi ri ruwach'ulew Moab kan xk'is yan, xkecha' chiwe.

²¹ Kan xtiqaqa k'a ri rutojbalil-mak pa kiwi' ri wineq moabita, ri ek'o chiri' pa taq taq'aj kojol juyu': Ri Holón, ri Jahas, ri Mefáat,

²² ri Dibón, ri Nebo, ri Bet-diblataim,

²³ ri Quiriataim, ri Bet-gamul, ri Bet-meón,

²⁴ ri Queirot, ri Bosrá y ri ch'aqa' chik tinamit richin Moab.

²⁵ Yin Jehová ninbij chi ri ruchuq'a' ri ruwach'ulew Moab xa xtik'is y ri q'atbel-tzij ri k'o pa ruq'a' kan xtiwulatej.

²⁶ Rix kan xkixbiyin achi'el q'abarela' roma xixyakatej chuwij yin Jehová. Rix kan xtikich-iwi' chupan ri ixa'oj y konojel winaqi' xkeyojoben chiwij,

²⁷ roma rix aj-Moab, kan xixyojoben chikij ri israelita y xixch'on chikij rije' rik'in joyobenik, chi achi'el xa ta e eleq'oma'.

²⁸ Roma ri' rix aj-Moab xtimalij kan ri iruwach'ulew y xtibewewaj k'a iwi' chuxe' nima'q taq abej, achi'el nikiben ri taq paloma, ri nikiben kisok chuchi' nima'q taq siwan.

²⁹ Kan wetaman k'a ri inimirisanen rix.

³⁰ Yin wetaman chi rix janila yakatajineq iwoyowal, jak'a xa man jun nuk'en-pe chiwe ri inimirisanen. Yin Jehová ri yibin.

³¹ Roma ri' kan janila xtinwoq'ej y xtinbisoj ri tinamit Moab y xkijiq'ijo'x koma ri ek'o pa tinamit Quir-heres.

³² Rix aj-Sibmá janila ix beyoma' achi'el ri juwi-uva ri k'o janila ruwech. Y ri ibeyomel ri' napon k'a pa tinamit Jazer ri chiri' pa xaman y napon k'a chuchi' ri Tzayi-Choy ri k'o pa qajbel-q'ij, achi'el ri ruq'a' ri juwi-uva. Jak'a xa xtik'is y yin janila xkinoq', achi'el nikiben ri winaqi' aj-Jazer roma ri ki-uva.

³³ Ri kikoten kan maneq pa taq qejoj y ulew richin tiko'n, roma xtinben chi ri vino man xtibiyin ta chik akuchi niyitz'-wi ri uva y kan man jun ri xtibixan ta rik'in kikoten toq nuyitz' ri uva. Kan maneq chik bixanik richin kikoten.

³⁴ Ri raqoj-chi'ij richin ri tinamit Hesbón xtak'axatej k'a chupan ri tinamit Elalé y ri Jahas. Xtitiker-pe pa tinamit Sóar y xtapon k'a pa tinamit Horonaim y ri Eglat-selisiya. Chuqa' ri ti raqen-ya' Nimrim xa xtichaqi'j-qa.

³⁵ Yin xkenk'is xabachike winaqi' moabita ri yejote-el pa taq ko'ol juyu' richin nibekisuju' kamelabel y nikiporoj pom chikiwech ri ki-dios. Yin Jehová ri yibin.

³⁶ Ri wánima janila xtiq'axon koma ri winaqi' aj-Moab y koma ri achi'a' e aj-Quir-heres. Y ri bix richin bis kan achi'el niq'ajan ri xul ri nikusex pa jun muqunik, roma ri kibeyomel ri xkimol, xa xk'is yan.

³⁷ Konojel winaqi' xa xtikisokaj-el ri rusumal-kiwi', chuqa' xtikelesaj-el ri rusumal-kichi'. Konojel k'a xtikisokola' ri kiq'a' y xtikikusaj tzieq richin bis.

³⁸ Pa ruwi' ronojel jay richin Moab y pa taq bey, kan xaxe chik k'a oq'ej ri xtak'axatej, roma yin kan xtink'is k'a ri kiruwach'ulew, achi'el toq nipax jun bojo'y ri man nik'atzin ta chik. Yin Jehová ri yibin.

³⁹ Roma ri' xkixoq' koma ri aj-Moab. Y chiri' kan janila xibinri'il xtik'oje', y kan xtikiya' k'a kan ri ruche'el-kij roma kik'ix. Ri ruwach'ulew Moab kan xke'ok yakol tze'en y ri ch'aqa' chik winaqi' xtikixibij-ki' koma rije'.

⁴⁰ Yin Jehová ri yibin. Ri e etzelanel iwichin rix aj-Moab kan xtikik'eq-pe-ki' pan iwi' rix, achi'el nuben jun kot toq rurik'on jebel ri ruxik'.

⁴¹ Konojel itinamit xkeqaqa pa kiq'a' ri e etzelanel iwichin y ri tz'aq xketzaq. Chupan ri q'ij ri' rix aj-labal kan xtiq'axon janila ri iwánima, achi'el ruq'axo'n jun ixoq toq nik'oje' yan ti ral.

⁴² Ri iwajawaren kan xtich'akatej, roma kan xixyakatej chuwij yin Jehová.

⁴³ Yin Jehová ri yibin. Rix winaqi' aj-Moab kan xkixk'is jumul. Ix oyoben koma oxi' ruwech ruk'ayewal: Ri e etzelanel iwichin, ri jul o ri pikbel.

⁴⁴ Wi xkixkolotej pa kiq'a' ri e etzelanel iwichin, xkixbetzaq chupan jun jul. Y wi xkixel-pe chupan ri jul, xkixbetzaq pa pikbel, roma yin kan xtinya' ri rutojbalil pan iwi'. Yin Jehová ri yibin.

⁴⁵ Rix ri ix yakatajineq chuwij, ri ix uk'uan-el, xkixapon pa tinamit Hesbón, ri rutinamit kan ri rey Sihón, roma xke'el-pe ri e etzelanel iwichin chiri' achi'el ruxaq q'aq'. Y ri q'aq' ri' xkeruk'et ri taq juyu' richin ri iruwach'ulew Moab.

⁴⁶ ¡Toq'ex iwech rix aj-Moab! ¡Rix winaqi' richin ri dios Quemós kan kixk'is! Ri iwinaq chi achi'a' chi ixoqi', chi alaboni', chi xtani', xke'uk'uex-el pa ximonri'il.

⁴⁷ Jak'a ri pa ruk'isibel, yin xkixinkol-pe y xtinya' urtisanik pan iwi'. Yin Jehová ri yibin, xcha' ri Dios. Jare' ri rutzijol ri rutojbalil-mak ri xtiqaqa pa kiwi' ri aj-Moab.