Wuj Richin ri Jeremías 37 - Kaqchiquel Bible

Ri Sedequías nuk'utuj utzil chire ri Jeremías

¹ Chirij re' ri Nabucodonosor xuben chire ri Sedequías ruk'ajol ri Josías richin xok kan rey richin nuq'et-tzij pa ruwi' ri tinamit Judá, pa ruk'exel ri Jeconías, ri ruk'ajol ri Joaquim.

² Jak'a ri rey Sedequías, ni ri aj-raqen, ni ri winaqi' richin ri tinamit man xeniman ta chire ri ruch'abel ri Jehová ri xinbij.

³ Y ri rey Sedequías xuteq-el ri Jucal ruk'ajol ri Selemías y ri sacerdote Sofonías ruk'ajol ri Maaseías, richin chi nikibij chuwe chi tinbana' utzil richin yich'on rik'in ri Jehová ri qa-Dios koma rije'.

⁴ Y chupan ri q'ij ri', yin k'a yinel-yinok na chikikojol ri winaqi' roma man jani kiya'ox pa cárcel.

⁵ Rokik ri' ri aj-labal richin Egipto xepe yan wawe', y toq xapon k'a rutzijol kik'in ri aj-Babilonia ri kisutin-rij ri Jerusalem, jari' toq rije' xe'el-el wawe'.

⁶ K'ari' xch'on chik pe ri Jehová wik'in y xubij chuwe:

⁷ Kere' nubij ri Jehová, Dios richin ri tinamit Israel chi tabij chike ri e ka'i' ri e rutaqon-pe richin kere' nokik'utuj chuwe: Yin Jehová Dios richin Israel ninbij chawe rat rey Sedequías chi ri aj-labal aj-Egipto, ri kichapon chik pe bey richin yixokito-el, xa xetzolin chik pa kiruwach'ulew.

⁸ Jak'a xketzolin chik k'a pe ri aj-Babilonia y xtikichop chi oyowal re tinamit re' y xtok kichin y xtikiya' ruq'aq'al.

⁹ Yin Jehová ninbij chiwe rix chi man tikuquba' ik'u'x chi ri aj-Babilonia man xketzolin ta chik pe chiwij, roma rije' xa kan xkepe chik chiwij.

¹⁰ Roma stape' rix xke'ik'is konojel ri aj-labal aj-Babilonia y yek'oje' ta kan jujun achi'a' ri e sokotajineq, re achi'a' re' xkeyakatej k'a pe y xtikiya' ruq'aq'al ri itinamit, xcha' ri Dios chuwe.

Ri Jeremías xya'ox pa jun jul

¹¹ Y xbanatej k'a chi ri aj-labal aj-Babilonia xe'el-pe chiri' pa Jerusalem, roma xkak'axaj chi e peteneq ri aj-labal aj-Egipto.

¹² Y jari' toq yin xinel-pe chiri' pa Jerusalem richin yibe pa nuruwach'ulew chiri' pa Benjamín, richin ninbenk'ulu' kan juba' wulew.

¹³ Jak'a toq xibe chiri' pan okibel richin Benjamín, chiri' k'o k'a jun aj-raqen kichin ri aj-labal, rubini'an Irías, ruk'ajol ri Selemías, rumam ri Hananías. Rija' xiruchop y xubij chuwe: ¡Rat yabeq'ax kik'in ri aj-Babilonia!, xcha'.

¹⁴ Jak'a yin xinbij chire chi yin man yibeq'ax ta kik'in. Jak'a ri Irías man xuya' ta rejqalen ri nuch'abel y xa xiruk'uaj-el chikiwech ri aj-raqen pa ruwi' ri tinamit.

¹⁵ Y rije' xyakatej janila koyowal chuwij y xkiteq nuch'ayikil y xinkiya' pa jul ri k'o chiri' pa rachoch ri Jonatán ri aj-tz'ib, roma ri chiri' kan xkiben chire chi xok cárcel.

¹⁶ Xinok k'a apo chiri' chuwa-jay y xiya'ox k'a chupan ri jul y chiri' xik'oje-wi janila k'iy q'ij.

¹⁷ K'ari' ri rey Sedequías xubij chi kinuk'uex-el pan ewel pa rachoch rija'. Y toq xinapon rik'in, xuk'utuj chuwe: ¿K'o kami jun rutzijol ri xuteq-pe ri Jehová? Y yin xinbij chire chi k'o. Y xinbij chire chi rija' xtiqaqa pa ruq'a' ri rey richin Babilonia.

¹⁸ Chuqa' xinbij chire: ¿Achike k'a xinmakuj chawech rat o chikiwech ri aj-raqen, o chikiwech ri winaqi' richin ri tinamit richin chi xinaya' pa jul?

¹⁹ ¿Akuchi kami ek'o-wi ri man e qitzij ta q'alajirisey ruch'abel ri Dios ri xkibij chawe chi ri rey richin Babilonia man xkixkichop ta chi oyowal, ni rix ni re winaqi' richin re ruwach'ulew re'?

²⁰ Wakami k'a, tabana' utzil tawak'axaj ri k'utunik ri xtinben chawe. Man taya' q'ij richin yinkik'uaj chik el pa rachoch ri Jonatán ri aj-tz'ib roma wi xkibe chik, chiri' xkiken-wi, xicha' chire.

²¹ K'ari' ri rey Sedequías xuteq woyoxik richin chi yin yik'oje' chiri' chuwa-jay ri akuchi k'o-wi ri cárcel y chi ronojel q'ij tiya'ox jun kaxlan-wey chuwe ri nik'ayix pa taq bey. Y kan keri' k'a xban chuwe k'a ja toq xk'is ri kaxlan-wey pa tinamit. Y keri' yin xik'oje' kan chiri' chuwa-jay ri akuchi k'o-wi ri cárcel.