Wuj Richin ri Jeremías 32 - Kaqchiquel Bible

Ri Jeremías xuloq' juba' rulew pan Anatot

¹ Ri Jehová xch'on chik jun bey wik'in yin Jeremías, chupan ri juna' lajuj toq niq'aton-tzij ri Sedequías rey richin Judá y chupan chuqa' ri juna' waqxaqlajuj chire ri q'atbel-tzij richin ri Nabucodonosor.

² Chupan k'a ri q'ij ri' ri aj-labal e richin ri Nabucodonosor kisutin k'a rij ri tinamit Jerusalem. Y yin in ximil chiri' chuwa-jay akuchi ek'o-wi ri chajinela' richin ri rachoch ri rey Sedequías,

³ roma ja rija' xiya'on chiri'. Y xuk'utuj chuwe: ¿Achike roma re kere' naq'alajirisaj? ¿Achike roma xabij chi ri Jehová nubij chi re tinamit re' xtitzaq pa ruq'a' ri rey richin Babilonia?

⁴ Y chuqa' xabij chi yin man xkitikir ta xkinanimej kan pa kiq'a' ri aj-Babilonia, xa kan xkijach k'a pa ruq'a' ri Nabucodonosor y chi xkinapon rik'in rija'.

⁵ Chuqa' xabij chi rija' xkiruk'uaj-el pa Babilonia y ri chiri' ja ri Jehová xtiya'on ruk'ayewal pa nuwi'. Y chuqa' xabij chi stape' roj xtiqaben oyowal kik'in rije', kan man xqojch'akon ta, xacha' chuwe.

⁶ Y ri Jehová xch'on chik pe wik'in y xubij chuwe chi

⁷ nipe ri Hanamel ruk'ajol ri nuch'utitata' Salum. Y xubij chuwe chi ri Hanamel xtoch'on wik'in pa ruwi' jun ulew y xtubij chuwe chi tinloq'o' ri rulew rija' ri k'o pa tinamit Anatot, roma ja yin ri in rach'alal ri ink'o más naqaj y roma ri' ruk'amon richin ninloq'.

⁸ Kan achi'el k'a rubin ri Jehová chuwe, kan keri' xbanatej, y xapon k'a wik'in ri Hanamel chiri' chuwa-jay ri akuchi in chajin-wi, y xubij chuwe: Tabana' utzil taloq'o' ri wulew ri k'o chiri' pan Anatot, pa ruwach'ulew kan ri Benjamín, roma kan at wach'alal y ruk'amon richin nok kan awichin. Roma ri' taloq'o' kan, xcha' chuwe. K'ari' xq'ax chinuwech chi kan ja ri Jehová ri xbin chuwe richin ninloq' kan.

⁹ Keri', xinloq' kan ri ulew ri' chuwi-ruq'a' ri Hanamel y xinwetaj ri saqipueq ri xinya' chuwech: Waqi' onza xintojbej-wi.

^10-11 Xban ka'i' ruwujil ri wulew y xintz'ibaj ri nubi' chupan. Chuqa' ri xetz'eton ronojel re' xkitz'ibaj kibi' chupan y k'ari' xya'ox retal. Y chirij ri' k'ari' xinwetaj ri saqipueq pa jun etabel.

¹² Y k'o k'a chiri' chuwa-jay ri Baruc ri ruk'ajol ri Nerías, rumam kan ri Maaseías. Y xinjech chire ri Baruc chuwech ri Hanamel, chikiwech ri xkitz'ibaj kibi' chupan ri wuj y chikiwech konojel ri winaqi' ri ek'o chiri' chuwa-jay akuchi in ximil-wi.

¹³ K'ari' xinbij chire ri Baruc:

¹⁴ Ri Jehová k'iytisanel richin ronojel, ri qa-Dios, nubij chi tayaka' ri ka'i' wuj ri ruwujil ri wulew chupan jun bojo'y richin chi nukoch' nik'oje' k'iy q'ij chiri'.

¹⁵ Roma rija' nubij chi k'o jun q'ij xkeloq' chik jay, qasanbel-ulew, y ulew ri akuchi e tikon-wi uva chuwech, xicha' chire.

Ri Jeremías nich'on rik'in ri Dios pa ruwi' ri ulew ri xuloq'

¹⁶ Toq xinya' yan el ri ruwujil ri ulew chire ri Baruc, jari' toq yin xich'on rik'in ri Jehová y kere' xinbij chire:

¹⁷ ¡Wajaw Jehová!, rik'in ri nimalej awuchuq'a' xaben ri kaj y ri ruwach'ulew y kan man jun k'ayew chawech rat.

¹⁸ ¡Rat kan nak'ut k'a ri awajowabal pa kiwi' janila chi winaqi'. Jak'a chuqa' naya' rutojbalil pa kiwi' ri winaqi' roma ri kimak ri kite-kitata'! ¡Jehová kan janila nim ak'ojlen y ri abi' ja ri Jehová k'iytisanel richin ronojel!

¹⁹ Rat kan janila at nim rik'in ri apixabanik y at nimalej rik'in ronojel ri naben. Rat natz'et ronojel ri yekiben ri winaqi' y chikijujunal naya' rutojbalil pa kiwi' achi'el ri ruk'amon.

²⁰ Rat kan xaben k'a nima'q y meyel taq banobel ri chiri' pan Egipto y k'a re q'ij wakami naben wawe' pan Israel y chikikojol ri winaqi'. Keri' xnimer ri abi' k'a re wakami.

²¹ Kan xe'awelesaj k'a pe ri awinaq Israel chupan ri ruwach'ulew Egipto rik'in nima'q y meyel taq banobel. Rik'in nimalej awuchuq'a' xaben chike ri aj-Egipto chi e k'iy chike rije' kan xkik'en janila rukiy.

²² Y xaya' re ruwach'ulew re' chike ri qati't-qamama' ri xajikiba' richin naya' chike: Chuwech re ruwach'ulew re' kan janila niwachin ri tiko'n.

²³ Rije' xe'ok k'a chupan ri ruwach'ulew ri', jak'a xa man xkinimaj ta ri atzij, ni man xkiben ta achi'el nubij ri apixa'. Kan man jun k'a xkiben chire ronojel ri xabij chike k'a re wakami, roma ri' rat xaben chi xpe jun ruk'ayewal pa qawi'.

²⁴ Wakami k'a ri aj-Babilonia xkimontonij-q'anej ulew chirij ri tz'aq richin nikichop chi oyowal ri tinamit, Roma ri labal, ri wayjal y ri nima-yabil, re tinamit re' xtijach-el pa kiq'a' rije'. Ri xabij rat Jehová, kan jare' ri nibanatej wakami.

²⁵ Y man rik'in ri', rat Jehová xabij chuwe chi tinloq'o' kan re ulew re' rik'in saqipueq y chi yenk'en-pe ri xetz'eton ronojel, stape' ri tinamit xa nitzaq yan pa kiq'a' ri aj-Babilonia, xicha' chire ri Dios.

Ri Jehová xuya' rutzij chi yerukol ri aj-Israel richin jantape'

²⁶ Ri Jehová xch'on chik wik'in y xubij chuwe:

²⁷ Ja yin Jehová, Dios kichin konojel ri k'o kik'aslen ri ek'o chuwech re ruwach'ulew. Chinuwech yin kan man jun k'ayew.

²⁸ Roma ri' wakami ninjech ri tinamit pa ruq'a' ri Nabucodonosor y ri ruwinaq.

²⁹ Rije' kan xtikiben oyowal rik'in re tinamit re' y xtikiya' ruq'aq'al y xtikiporoj, junan rik'in ri jay ri achoq pa ruwi' nikiporoj-wi pom chire ri Baal y nikisuj vino chike ch'aqa' chik dios y re' xkiben chuwe richin xkiyek woyowal.

³⁰ Ri winaqi' israelita y ri awinaq aj-Judá kan pa rutikeribel kibanon-pe ri man niqa' ta chinuwech yin, roma rije' kan man kiya'on ta k'a kan richin nikiya' kiq'ij ri wachibel ri xa ja rije' ri e banayon y re' nuben chuwe richin nikiyek woyowal.

³¹ Roma re tinamit re', kan ruyakon-pe woyowal kan k'a ja toq xpabex-q'anej y k'a re wakami, roma ri' kan xkenk'is-el chuwech re ruwach'ulew,

³² roma ronojel ri itzel taq kibanobal, ri e rey richin Israel y ri e richin ri Judá, ri ki-sacerdote, ri e q'alajirisey nuch'abel y konojel ri winaqi' kan xkiyek k'a janila woyowal.

³³ Rije' kan ja ri ruche'el-kij ri xkiya' kan chinuwech, stape' yentijoj y kan k'iy mul xentijoj. Man xkik'ul ta ri nupixabanik.

³⁴ Kan xkiben chire ri wachoch ri kan ch'aron chuwe, chi man ch'ajch'oj ta, y kan man utz ta chik nintz'et, roma xkiya' wachibel chupan, richin nikiya' kiq'ij.

³⁵ Chuqa' xekipaba-q'anej porobel richin ri Baal chiri' pa taq'aj kojol juyu' Ben-hinom, richin chi chiri' yekiporoj-wi ri kimi'al-kik'ajol richin kamelabel chire ri ki-dios Moloc. Ronojel re' kan man xinbij ta chike chi nikiben, ni man jun bey xinch'ob rij. Y toq ri winaqi' ri' xkiben ri itzel taq banobel ri', xkiben richin xemakun ri ch'aqa' chik kiwinaq.

Ri xsuj chike richin chikiwech-apo

³⁶ Wakami k'a, ri Jehová Dios richin ri tinamit Israel nubij: Rik'in ronojel ri nibij chirij re tinamit re' ri achoq pa ruwi' yixch'on-wi y nibij: Xtijach pa ruq'a' ri rey richin Babilonia; roma oyowal, wayjal y roma nima-yabil.

³⁷ Jak'a toq maneq chik woyowal, k'ari' xkenmol chik konojel ri winaqi' ri' ri akuchi xentaluj-wi-el. Kan xkenk'en k'a pe re wawe' y xkenjikiba' re wawe' richin yek'ase' pa kiruwach'ulew.

³⁸ Rije' xke'ok nutinamit y yin xkinok ki-Dios.

³⁹ Xtinben k'a chike richin xtinjel ri kánima y ri kich'obonik richin nikiya' nuq'ij richin jantape' y keri' xkek'ase' k'a el chi utzil; rije' y ri kalk'ual chik rije'.

⁴⁰ Xtinben k'a kik'in rije' jun jikibel-tzij richin q'asen. Kan xtinya' nutzij chi jantape' xtinben utz kik'in. Xtinben k'a chike richin nikiya' nuq'ij jantape' y man jun bey chik xtikijech'ej kan ki' wik'in.

⁴¹ Yin Jehová kan xkikikot k'a roma utz xtinben kik'in. Kan xkenya' k'a rik'in qitzijri'il chupan re ruwach'ulew re', rik'in ronojel wánima y ronojel nuk'u'x.

⁴² Roma ri Jehová kere' nubij: Achi'el toq xinya-pe ri ruk'ayewal pa kiwi', keri' chuqa' xtinya-pe ri utz pa kiwi' rije' achi'el ri nusujun chike.

⁴³ Re wakami nibij chi xa tolan kan, man jun chik wineq k'o chuwech y ni ta ri chikop, roma re ruwach'ulew re' xa jachon pa kiq'a' ri aj-Babilonia. Jak'a chupan ri q'ij ri' xtikiloq' chik qasanbel-ulew chupan re ruwach'ulew re'.

⁴⁴ Kan xkeloq' k'a ulew, xtiban kiwujil y xtiya'ox ketal chikiwech ri winaqi' ri xetz'iban kibi'. Re' xtibanatej chupan chijun ruwach'ulew Benjamín, chuqa' chunaqaj ri Jerusalem, pa taq tinamit richin Judá, ri keri' pa taq k'echelaj y pa taq tinamit ri ek'o pa taq'aj y ri ek'o pa xokon, roma kan xtinya' chik jun bey utzil pa kiwi' konojel. Yin Jehová ri yibin, xcha' chuwe.