Wuj Richin ri Jeremías 28 - Kaqchiquel Bible

Ri man qitzij ta ri xuq'alajirisaj ri Hananías

¹ Y chupan ri juna' ri' chuqa' xbanatej chi ri Hananías, ruk'ajol ri Azur, aj-Gabaón, jun chike ri q'alajirisey ri nubananej chi xch'on wik'in pa rachoch ri Jehová chikiwech ri e sacerdote y chikiwech konojel winaqi' richin re tinamit. Y re' xbanatej k'a chupan ri rukaj juna' chire ri q'atbel-tzij richin ri Sedequías, chupan ri ro' ik'. Y ri Hananías xubij chuwe:

² Ri Jehová k'iytisanel richin ronojel, Dios richin ri tinamit Israel nubij chi rija' xtrelesaj ri ruchuq'a' ri rey richin Babilonia pan iwi' rix, achi'el nrelesaj ri yugo richin jun chikop.

³ Y pa ka'i' apo juna' xtuben chi ri samajibel richin ri rachoch ri Jehová, ri xuk'uaj-el ri rey Nabucodonosor pa Babilonia, xtitzolin chik chupan re tinamit re'.

⁴ Chuqa' ri Jehová xtuben chire ri Jeconías ruk'ajol ri Joaquim, chi xtitzolin-pe y chirij rija' xkepe konojel aj-Judá ri xe'uk'uex-el pa ximonri'il chiri' pa Babilonia, roma ri Dios kan xtrelesaj-el ri ruchuq'a' ri Nabucodonosor, xcha' ri Hananías.

⁵ K'ari' yin xich'on rik'in ri Hananías, chikiwech ri e sacerdote y ri winaqi' ri e pa'el chiri' pa rachoch ri Jehová.

⁶ Y xinbij: Ja' kan k'ate' ta keri' ri xtuben ri Jehová. Kan xtujikiba' ta ri ruch'abel ri xuq'alajirisaj chawech richin chi nuben chi yetzolin-pe wawe' ri samajibel ri e richin ri rachoch ri Jehová, y keri' chuqa' konojel ri winaqi' ri xe'uk'uex-el pa ximonri'il chiri' pa Babilonia.

⁷ Jak'a rat tawak'axaj re ch'abel re' ri xtinbij chawe y chike konojel ri winaqi' richin re tinamit re':

⁸ Ri e q'alajirisey ri ruch'abel ri Dios ri xek'oje' ojer kan, k'a toq man jani qojalex roj, rije' xkiq'alajirisaj chi xtibanatej labal pa kiwi' nima'q taq ruwach'ulew y chi xtipe yabil y wayjal pa kiwi' ri nima'q taq q'atbel-tzij.

⁹ Jak'a toq jun q'alajirisanel nuq'alajirisaj chi nik'oje' uxlanibel-k'u'x, toq ri ruch'abel ri q'alajirisanel ri' kan nibanatej, kan xtiq'alajin chi kan qitzij chi ja ri Jehová taqayon-pe richin, xicha'.

¹⁰ Jari' toq ri Hananías xrelesaj ri yugo ri k'o chinuqul y xuq'ej.

¹¹ Y kan jari' xubij chike konojel ri winaqi' ri ek'o chiri': Ri Jehová nubij chi kere' xtuben chupan apo ka'i' juna', toq xtrelesaj ri yugo ri ruya'on ri rey Nabucodonosor pa kiwi' konojel tzobaj winaqi' richin ri ruwach'ulew, xcha'. Jak'a ri Jeremías xa xel-pe chiri'.

Ri rutojbalil-mak ri xtoqaqa pa ruwi' ri Hananías

¹² Xq'ax yan juba' q'ij toq ri Hananías xrelesaj yan ri yugo chinuqul y kan xuq'ej y jari' toq ri Jehová xch'on wik'in y xubij chuwe:

¹³ Kabech'on rik'in ri Hananías y taya' re rutzijol re' chire: Rat xaq'ej ri yugo ri banon rik'in che', jak'a pa ruk'exel re' xtinben yugo ri banon rik'in q'eqapueq.

¹⁴ Yin Jehová ri k'iytisanel richin ronojel ri yibin. Y kan xtinya' k'a jun yugo ri banon rik'in q'eqapueq pa kiwi' konojel tzobaj winaqi', richin chi nikisamajij ri Nabucodonosor, rey richin Babilonia. Chuqa' xinya' chuxe' ri rutzij rija' konojel ri taq chikopi' ri ek'o pa k'echelaj, xcha' chuwe.

¹⁵ K'ari' ri Jeremías xubij chire ri Hananías: Tawak'axaj k'a. Ri Jehová man at rutaqon ta pe, rat xaben chike ri winaqi' richin ri tinamit richin xkikuquba' kik'u'x rik'in ri ach'abel ri xa man qitzij ta.

¹⁶ Roma ri', ri Jehová nubij chi rija' xkarelesaj k'a el chuwech re ruwach'ulew. Chupan re juna' re' xkaken, roma rik'in ri ach'abel xe'ataqchi'ij ri winaqi' richin xeyakatej chirij ri Dios, xicha' chire.

¹⁷ Y chupan k'a ri juna' ri' chupan ri ruwaq ik' xken ri Hananías.