Wuj Richin ri Jeremías 19 - Kaqchiquel Bible

Ri tinamit Judá achi'el jun paxineq bojo'y

¹ Chirij ri', ri Jehová xubij chuwe: Tabeloq'o' jun bojo'y y ke'awachibilaj-el ka'i-oxi' achi'a' ri k'o kiq'ij chupan ri tinamit y jujun aj-raqen kichin ri e sacerdote y

² k'ari' kixel-el chiri' akuchi yetorix-wi ri paxineq taq bojo'y, chupan ri taq'aj Ben-hinom y xtach'abalij re ch'abel re':

³ Yin Jehová k'iytisanel richin ronojel ri yibin y roma ri' rix rey richin ri tinamit Judá y ri winaqi' richin ri tinamit Jerusalem, tiwak'axaj k'a ri rutzijol ri xtinya' chiwe. Xtinbentaqa' k'a pe jun nima-ruk'ayewal pan iwi', konojel ri xke'ak'axan re rutzijol re' kan xtisach k'a kik'u'x.

⁴ Roma ri winaqi' israelita xinkimalij kan y kan xkiben chire ri taq'aj ri' chi xenoj chi dios ri man e aj wawe' ta y man xketamaj ta kiwech ri iwati't-imama', ni ri e rey ri xek'oje' ojer kan. Y wawe' xisuj pom chikiwech y kan xinojisaj ri tinamit rik'in kik' roma xe'ikamisaj ri winaqi' ri xa man jun kimak.

⁵ Chuqa' xe'ipaba-q'anej porobel richin xe'iporoj ri iwalk'ual richin xe'isuj chire ri Baal, jun banobel ri man nubin ta yin richin niben y ni chuqa' man jun bey nuch'obon rij richin keri' niben.

⁶ Roma ri' xtapon ri q'ij chi re wawe' man xtubini'aj ta chik Tófet, ni taq'aj richin Ben-hinom, xa kan xtubini'aj k'a Taq'aj richin Kamisanik.

⁷ Re wawe' xtinwulaj-wi ri ich'obonik rix aj-Judá y aj-Jerusalem. Y xtinben chi ri e etzelanel iwichin xkixkich'ek y xkixkikamisaj chi espada. Y chuqa' ri ich'akul kan xtik'atzin richin xtok kiway ri aj-xik' taq chikopi' y ri chikopi' ri ek'o pa k'echelaj.

⁸ Kan xtinben chire ri Jerusalem chi konojel ri winaqi' ri xkeq'ax chiri' xtikixibij-ki' chuwech y xtikiyojobej roma wulatejineq chik kan ronojel.

⁹ Xtinben k'a chi ri e etzelanel iwichin xtikisutij-rij ri itinamit y roma ri wayjal, xtitej-qa ri iwalk'ual y chi'ijujunal xtitej-qa-iwi' chi iwachibil-iwi', xkacha'.

¹⁰ Toq xabij yan qa re ch'abel re', k'ari' xtapaxij ri bojo'y chikiwech ri achi'a' ri e tzeqelibeyon-el awichin.

¹¹ Y k'ari' xtabij chi ri Jehová Dios ri k'iytisanel richin ronojel kere' nubij: Kere' xtik'is re tinamit re' achi'el re jun paxineq bojo'y re' y man jun chik nitikir nichojmirisan. Y wawe' pa Tófet xkemuq-wi ri kaminaqi' roma maneq chik akuchi yemuq-wi.

¹² Keri' k'a xtinben chire ri tinamit ri' y chiwe rix ri ixk'o chiri', achi'el ri Tófet.*f5*

¹³ Ri kachoch ri rey y ri ch'aqa' chik jay ri ek'o pa tinamit Jerusalem kan xke'ok achi'el ri Tófet, roma pa ruwi' ri iwachoch xisuj-wi pom chikiwech ri xmotza' ri ek'o chuwech ri kaj. Chuqa' roma xitix vino chikiwech ch'aqa' chik dios. Ronojel re' xke'ok man ch'ajch'oj ta achi'el ri Tófet, xkacha'.

¹⁴ Chirij re' xitzolin chiri' pa Tófet ri akuchi in rutaqon-wi ri Jehová richin yich'on pa rubi' rija'. Y xinapon chuwa-jay chire ri rachoch ri Dios y xinbij k'a chike konojel ri winaqi':

¹⁵ Ri qa-Dios Jehová ri k'iytisanel richin ronojel kere' nubij: Wakami k'a nink'en-pe ri ruk'ayewal pa ruwi' re tinamit re' y pa kiwi' konojel tinamit ri ek'o chunaqaj, ri nuya'on chik rutzijol roma xixyakatej chuwij y kan xikowirisaj ri iwánima richin man xiniwak'axaj ta, xicha' chike.