Wuj Richin ri Jeremías 17 - Kaqchiquel Bible

Ri mak ri xkiben ri winaqi' aj-Judá

¹ Ri Dios xuya' ri rutzijol chuwe richin ninya' chike ri winaqi' aj-Judá: Ri iwánima nuk'ut ri imak achi'el ri e tz'iban chuwech jun abej rik'in jun q'eqapueq o jun chik abej o pa ruwi' ri achi'el taq uk'a' ri ek'o pa rutza'n ri taq ruxikin ri porobel.

² Y k'iy sol winaqi' chiwe rix noqaqa k'a chi'ik'u'x ri porobel y ri paban-che' ri kan e ch'aron richin niya' kiq'ij ch'aqa' chik dios, chuxe' ri che' ri janila kixaq y pa ruwi' ri nima'q taq juyu'.

³ Xtinben chi xteleq'ex-el ri ibeyomel ri k'o iwik'in roma ri imak y xkewulex ri chiri' pa ruwi' taq juyu' ri akuchi ich'aron-wi.

⁴ K'o chi xtiya' kan ri ruwach'ulew ri xinsipaj chiwe richin xiwichinaj kan. Y kan xtinben chiwe richin kan xkixok iliy kichin ri e etzelanel iwichin, chupan jun ruwach'ulew ri kan man jun bey itz'eton, roma yakatajineq woyowal achi'el jun q'aq' y re' kan xkixruk'is.

⁵ Yin Jehová ri yibin. Itzel ruwa-ruq'ij ri wineq ri nuch'er kan ri' wik'in yin, richin nukuquba' ruk'u'x kik'in achi'a' y kik'in rije' nukanoj-wi to'onik.

⁶ Ri nibanon keri', kan achi'el ri ruxulu-kiej ri k'o pa tz'iran ruwach'ulew chukojol abej y atz'an y ri man jun bey nik'iy ta juba'.

⁷ Jak'a jebel ruwa-ruq'ij ri wineq ri rukuquban ruk'u'x wik'in yin, ri kan nroyobej ronojel wik'in yin.

⁸ Kan xtik'iy k'a achi'el jun che' ri tikil chuchi' jun raqen-ya' y ri ruxe' man nichaqi'j ta qa toq napon ri k'aten. Chuqa' ri ruxaq beneq ruwech rex-rex rubanon. Y chupan ri saq'ij man xtimayamo' ta qa y kan beneq ruwech nuya' ruwech ri che' ri'.

⁹ Xa ruyon q'oloj k'o pa ránima ri wineq. Man nuben ta ronojel pa ruchojmilal. Y kan man jun nitikir niq'ax chuwech ri nuch'ob.

¹⁰ Jak'a yin Jehová yitikir nintz'et ri ránima y kan wetaman jebel ronojel. Kan ninya' ri rutojbalil pa kiwi' chikijujunal achi'el ri kibanobal.

¹¹ Ri wineq ri numol rubeyomel ri xa man pa ruchojmilal ta ri nuben, xa achi'el jun saqkorowach ri nijupe' pa ruwi' ri saqmolo' ri man richin ta rija'. Y toq pa nik'aj chire ri ruk'aslen ri wineq ri', xa nuya' kan ronojel y pa taq ruk'isibel xa nibeq'alajin-pe chi rija' jun nakanik, xcha' ri Dios.

Ri Jeremías nuk'utuj to'onik rik'in ri Dios

¹² Ri awachoch, rat qa-Dios, ri kan janila nim ri pa rutikeribel y kan k'o ruq'ij.

¹³ Jehová, ja rat ri at oyobenri'il richin ri qatinamit Israel, achi'el jun alaxibel-ya' ri nuya' k'aslen. Jak'a konojel ri winaqi' ri xkatkimalij, kan xkek'ixbitej y konojel ri xtikich'er kan ki' awik'in kan xkek'is achi'el jun bi'aj tz'ibatel kan pa poqolaj.

¹⁴ Kan ja rat Jehová kataq'oman wichin, richin xkik'achoj-el. Kinakolo' y xkikolotej, roma yin xa kan xaxe rat ri ninya' aq'ij.

¹⁵ Roma ri winaqi' nikik'utuj chuwe achike k'a banatajineq rik'in ri ach'abel. Kan tibanatej k'a re wakami.

¹⁶ Man rik'in ri' yin man nubin ta chawe chi kan tataqa-pe jun wululen. Rat kan jebel awetaman achike ri xinbij yin roma kan chawech rat ri xinbij-wi, yecha'.

¹⁷ Man k'a naben chuwe richin nik'oje' akiy chinuwech, ja rat ri at nutobal chupan ri q'ij richin ruk'ayewal.

¹⁸ Kan ke'ak'ixbisaj k'a ri e tzeqelibeyon wichin y man ja ta yin ri xkik'ixbitej. Kan ja ta k'a rije' ri xtikixibij-ki' chawech y man ja ta yin. Kan taya' k'a pe ri ruk'ayewal pa kiwi' rije' y kan ke'ak'isa' jumul, xicha' chire.

Ri ruchojmilal pa ruwi' ri q'ij richin uxlanenri'il

¹⁹ Kere' k'a xubij ri Jehová chuwe: Kabiyin y kak'oje' chiri' chuchi' ronojel ruchi' ri tinamit Jerusalem y chuqa' ri akuchi ye'el-ye'ok ri e rey, richin naya' jun rutzijol chike.

²⁰ Y kere' tabij chike: Tiwak'axaj ri ruch'abel ri Jehová, rix rey y rix winaqi' aj-Jerusalem y aj-Judá y rix ri yixok chupan re tinamit re'.

²¹ Nubij ri Jehová chi man tik'uaj ejqa'n ri q'ij richin uxlanenri'il y man tikusaj-apo chupan ri tinamit chupan ri q'ij ri'.

²² Chuqa' man tiwelesaj-pe ri iwejqa'n, ni man tiben isamaj chupan ri q'ij richin uxlanenri'il. Xa kan tiya' k'a rejqalen ri q'ij ri' achi'el xubij ri Jehová chike ri ánima qati't-qamama', xkacha' chike.

²³ Jak'a rije' xa man xkinimaj ta, ni man xkak'axaj ta ri rutzijol. Xa kan xkikowirisaj k'a ki' y man xkixibij ta ki' chuwech ri ruk'ayewal.

²⁴ Chirij ri' ri Jehová xubij: Kan tinimaj k'a nutzij y man k'a tik'uaj ejqa'n chupan ri tinamit chupan ri q'ij richin uxlanenri'il. Kan tiya' k'a nuq'ij y kan man jun k'a isamaj tiben chupan ri q'ij ri'.

²⁵ Wi keri' xtiben, ri rey y ri rijatzul ri k'o kan pa rutz'uyubal ri David, beneq ruwech xke'ok chiri' pa taq ki-carruaje y e yuqen-el koma kiej. Y kan e tzeqeliben-el koma ri aj-raqen, ri winaqi' aj-Judá y ri ch'aqa' chik aj-Jerusalem. Y chiri' pa Jerusalem beneq ruwech xkek'oje' winaqi'.

²⁶ Chuqa' xkepe k'a winaqi' richin ronojel tinamit richin Judá y ri ek'o pa ruwach'ulew richin Benjamín, ri ek'o pa taq'aj kojol juyu', ri ek'o pa taq k'echelaj y ri ek'o pa xokon. Rije' xkekik'en k'a pe pa wachoch, chikopi' richin yeporox chijun y richin ch'aqa' chik kamelabel, sipanik richin jalajoj ruwech ixin, pom y sipanik richin matioxinik.

²⁷ Jak'a wi rix xa man ninimaj ta ri nupixa' richin man nich'er ta ri q'ij richin uxlanenri'il y k'a niq'axaj na apo ejqa'n pa taq ruchi' ri tinamit Jerusalem; wi keri' xtiben, kan xtuya' k'a pe q'aq' pa ruwi' ri tinamit. Y re q'aq' re' kan xtuk'is ri tinamit ri' y kan man jun xtitikir xtichupu, xcha' ri Dios.