Wuj Richin ri Jeremías 16 - Kaqchiquel Bible

Ri Jeremías xbix chire chi man nukanoj ta rixjayil

¹ K'ari' ri Jehová xch'on k'a wik'in y xubij:

² Man k'a takanoj awixjayil, richin man yek'oje' ta awalk'ual,

³ roma kan k'o xtibanatej kik'in ri taq kokoj alk'ualaxela' ri ek'o wawe' y ri te'ej-tata'aj ri xe'alk'ualan kichin.

⁴ Xkeken konojel rik'in itzel taq yabil y man jun xtoq'en y man jun xtimuqun kichin. Kan xkech'otot kan pa taq bey, achi'el ri pamaj, roma ch'aqa' xkekamisex chi espada y ch'aqa' chik xkeken roma wayjal. Y ri aj-xik' taq chikopi' y ri chikopi' ri ek'o pa k'echelaj xtikitej ri kich'akul.

⁵ Man katok-apo chupan jun jay ri akuchi ek'o pa bis ri winaqi', roma k'o kaminaqi' kik'in. Man katoq', ni man tak'ut chi yabison chirij, roma chupan re tinamit re' xinwelesaj yan el ri uxlanibel-k'u'x, ri wajowabal y ri nujoyowanik. Yin Jehová ri yibin.

⁶ Kan chi ch'uti'q chi nima'q xkeken chupan re ruwach'ulew re' y man jun xtimuqun, ni man jun xtoq'en kichin, ni man jun xtibison chikij y xtusok ta ri' o nusokaj ta ri rusumal-ruwi' retal richin bis.

⁷ Man jun k'a xtik'amon-pe q'utun richin yekiq'ejela' ri ek'o pa bis. Chuqa' man jun xtik'amon-pe vino, stape' kan ja ri te'ej o ri tata'aj ri niken.

⁸ Chuqa' man katok-apo chupan jun jay ri akuchi k'o jun nima-wa'in. Man yabetz'uye' kik'in richin yabewa' y yabetuk'ya'.

⁹ Yin Jehová k'iytisanel richin ronojel, ri Dios richin ri tinamit Israel ri yibin. Tabij k'a chike ri awinaq: Chi yin xtinben chi chupan ronojel ri itinamit xtik'is ri bixanik richin nimaq'ij, ri kikoten y chuqa' ri bixanik richin k'ulubik. Re' kan xtibanatej yan y rix kan xtitz'et rik'in ri runaq' taq iwech, xkacha' chike.

¹⁰ Toq xtaya' re rutzijol re' chike, rije' xtikik'utuj chawe ri achike roma yin xinya' ri ruk'ayewal ri' pa kiwi'. Xtikik'utuj k'a ri achike itzel kibanon y achike mak kibanon chinuwech.

¹¹ K'ari' rat Jeremías, xtabij chike chi roma ri iwati't-imama' xinkimalij kan y xebe chikij ch'aqa' chik dios richin chi nikiya' kiq'ij y xekisamajij y man xkiben ta ri nubij ri pixa'.

¹² Y rix xa kan más k'a xiben chikiwech ri iwati't-imama', roma kan chi'ijujunal niben ri rurayibel ri iwánima y man iniman ta nutzij.

¹³ Roma ri' xkixinwelesaj-el chupan ri iruwach'ulew y xkixinq'axaj chupan jun chik ruwach'ulew ri man jun bey itz'eton; ni rix y ni ta ri iwati't-imama'. Y chiri' xke'iya' kiq'ij ch'aqa' chik dios chi paq'ij chi chaq'a', roma yin man xtinjoyowaj ta chik iwech y kan man xkiniman ta chik chiwe, xkacha' chike.

¹⁴ Kan xtoqaqa k'a ri q'ij toq man xtibix ta chik: Utz ruwa-ruq'ij ri Jehová, roma xerelesaj-pe ri qati't-qamama' chupan ri ruwach'ulew Egipto.

¹⁵ Xa kan xtikibij: Utz ruwa-ruq'ij ri Jehová chi xerelesaj-pe ri qawinaq israelita chiri' chupan ri ruwach'ulew ri k'o pa xaman y ri pa taq ch'aqa' chik ruwach'ulew ri akuchi e rutalun-wi-el, xkecha'. Roma kan xkentzolij chupan ri ruwach'ulew ri xinya' chike ri kati't-kimama'.

¹⁶ Yin Jehová ri yibin. Xkenteq k'a pe e k'iy karunela' richin yekichop-el. Xkenteq-pe e k'iy kanonela' y xkekichop-el ri ek'o pa taq juyu' y pa ruwi' kojol taq juyu' y k'a pa taq jul chire ri nima'q taq abej.

¹⁷ Roma kan nutz'eton ronojel ri nikiben y kan man jun k'a ri ewatel ta chinuwech.

¹⁸ Kan xtinben chike chi xtikitoj ka'i' mul ri itzel taq kibanobal y ri kimak, roma rije' xkitz'ilobisaj ri nuruwach'ulew. Y rije' xekitorij kan ri itzel taq wachibel ri nikiya' kiq'ij achi'el ri kaminaqi' ri man e muqun ta. Xkiben chire chijun ri ruwach'ulew ri xinya' chike richin xkichinaj kan chi man jun rejqalen, roma xkiben itzel taq banobel chuwech ri kan man utz ta nintz'et yin, xcha' chuwe.

Oyobenri'il kichin ri ruwach'ulew

¹⁹ Xinbij chire ri Jehová: Ja rat ri yaya'on wuchuq'a' jantape' y at to'oy wichin. Ja rat ri at nutobal toq k'o ruk'ayewal. Kan awik'in k'a rat xkepe-wi konojel tzobaj taq winaqi' richin re ruwach'ulew y xtikibij chawe: Ri qati't-qamama' xekisamajij ri dios ri man e qitzij ta ri man jun yetikir nikiben.

²⁰ Y re dios re' ri e banon koma achi'a', xa man e qitzij ta, xkecha'.

²¹ Y ri Jehová xubij chuwe: Roma ri' re wakami, xtink'ut chikiwech ri nimalej wuchuq'a' richin tiketamaj chi ri nubi' yin, ja ri Jehová, xcha'.