Wuj Richin ri Jeremías 14 - Kaqchiquel Bible

Ri nimalej saq'ij ri peteneq pa ruwi' ri tinamit Judá

¹ Xk'oje' k'a jun nimalej saq'ij. Y chupan ri q'ij ri', ri Jehová xch'on chik wik'in y xubij chuwe:

² Ri winaqi' aj-Jerusalem y ri ch'aqa' chik richin ri tinamit Judá ek'o pa bis, ri tinamit kan e poqonatajineq y ri winaqi' kan kitorin-ki' pan ulew roma ri q'axo'n. Rije' nikireq kichi' roma ri ruk'ayewal.

³ Ri beyoma' yekiteq-el ri kisamajela' chukanoxik ya'. Rije' yebe akuchi ek'o-wi yakbel taq ya', jak'a xa man nikil ta pe y yetzolin k'a pe rik'in ri kikuku' ri man jun ya' chupan. Sachineq-pe kik'u'x y e k'ixbitajineq-pe y nikikuch-pe ri kijolon.

⁴ Ri achi'a' ri yesamej pa juyu' kan sachineq k'a kik'u'x y kan kitz'apelon k'a ri kijolon retal richin bis, roma man nuben ta chik job y ri ruwach'ulew kan xrajro-qa.

⁵ Keri' chuqa' ri masat ri ek'o pa k'echelaj yekimalij kan ri taq kal ri k'a juba' ke'alex, roma maneq chik kiq'os.

⁶ Ri juyubel taq bur kan e pa'el pa ruwi' tz'iran taq juyu' y kan nikik'ul kaq'iq' achi'el nikiben ri utiwa'. Ri kiwech kan niq'equmatej roma kan maneq chik kiq'os, xcha' ri Dios.

⁷ Y ri winaqi' xkibij chire: Ri qabanobal nuq'alajirisaj ri qamak y k'iy mul kan man niqaben ta ri nabij rat. Kan oj makuwineq-wi chawech. Man rik'in ri', rat Jehová kan qojakolo' k'a roma ri ruruwaq'ijaj ri abi'.

⁸ Kan ja rat ri at oyobenri'il qichin roj. Kan at kolonel qichin chupan ri ruk'ayewal. ¿Achike roma yojato' xaxe jun q'ij y ri jun chik q'ij xa yabe?

⁹ ¿Achike roma naben achi'el jun achin ri sachineq ruk'u'x, achi'el jun aj-labal y xa man nitikir ta nuto' ri'? Jehová rat kan atk'o pa qanik'ajal roj y konojel kan ketaman chi roj oj atinamit. Roma ri' man k'a qojamalij kan, xecha'.

¹⁰ Y ri Jehová jare' ri xubij pa kiwi' rije': Re tinamit re' niqa' chikiwech yebe-kela' yebe-kela' nikiben. Roma ri' man niqa' ta chinuwech ri nikiben. Re wakami kan noqaqa chinuk'u'x ri kimak y kan xtinya' ri rutojbalil pa kiwi', xcha' chuwe.

Ri man e qitzij ta e q'alajirisey ruch'abel ri Dios

¹¹ Chuqa' ri Jehová xubij chuwe: Man tak'utuj utzil chuwe richin utz xkebe re tinamit re'.

¹² Stape' rije' xkemewayin, yin man xkenwak'axaj ta toq xkech'on wik'in. Y stape' xtikisuj chikop ri niporox chijun y ch'aqa' chik sipanik chinuwech, yin kan man xtink'ul ta. Xa kan xkenk'is k'a chi espada, rik'in wayjal y rik'in nima-yabil, xcha' ri Dios.

¹³ K'ari' yin xinbij chire: Jehová, ri nikibananej chi e q'alajirisey ri ach'abel rat, xa nikibij chike ri winaqi' chi man xtibanatej ta ri labal, ni man xtipe ta wayjal y chi rat kan xtaya' jun uxlanibel-k'u'x richin q'asen re wawe'.

¹⁴ K'ari' ri Jehová xubij chik chuwe: Ri achi'a' ri' xa kan nikitz'uk k'a tzij, roma yin kan man e nutaqon ta el, ni man jun xinbij-el chike. Ri nikiq'alajirisaj, xa ronojel man qitzij ta. Y xa nikibananej ri nikiq'alajirisaj, xa kiyon rije' nikitz'uk. Jare' ri nikiq'alajirisaj rije'.

¹⁵ Stape' rije' nikiq'alajirisaj pa nubi' yin, xa man e nutaqon ta el. Rije' nikibij chi man nibanatej ta ri labal, ni man nipe ta wayjal chupan re tinamit re'. Jak'a yin Jehová ninbij chi re achi'a' re' kan xkekamisex k'a chi espada y kan xkeken roma wayjal.

¹⁶ Y ri winaqi' richin ri tinamit ri achoq ik'in xkech'on-wi, xkeken chuqa' chupan ri labal y ri wayjal, keri' chuqa' xkeken ri kixjayilal y ri kalk'ual. Y ri kich'akul xtipune' kan pa taq bey richin Jerusalem y man jun achike xkemuqun kichin. Kan keri' k'a xtinben chike richin xtikitoj ri kimak.

¹⁷ Y ri Jehová xubij chuwe chi tinq'alajirisaj ri k'o wik'in. Y kere' xinbij: Kan nibiyin k'a ri ruya'al ri runaq' taq nuwech chi paq'ij chi chaq'a'. Kan man nitane' ta k'a, roma ri ruk'ayewal ri qajineq pa kiwi' ri nuwinaq.

¹⁸ Wi yibe pa juyu', yentz'et ri xeken kan pan oyowal. Toq yinok-apo chupan ri tinamit, yentz'et winaqi' ri yeken yan qa roma wayjal. Chuqa' ri nikibananej chi e q'alajirisey ruch'abel ri Dios y ri e sacerdote chaq k'ate' xe'uk'uex-el pa jun chik ruwach'ulew ri man ketaman ta, xicha' chike.

Ri Jeremías nich'on chik jun bey rik'in ri Jehová

¹⁹ Jehová, ¿kan xawixowaj kami kan jumul ri tinamit Judá? ¿Kan itzel chik kami k'a natz'et ri tinamit Sión? ¿Achike roma janila xojaya' pa tijoj-poqonal? Qoyoben k'a uxlanibel-k'u'x, jak'a xa man utz ta ri qak'ulun. Qoyoben k'a raxnaqil, jak'a xa kan xaxe k'a xibinri'il ri k'o.

²⁰ Kan oj makuwineq-wi chawech, roma ri itzel taq qabanobal roj y ri etzelal ri xekiben ri qati't-qamama'. Kan oj makuwineq-wi chawech Jehová.

²¹ Man k'a tawetzelaj más ri qatinamit roma ruk'ojlen ri abi', ni man taqasaj ruq'ij ri tinamit akuchi naq'et-wi-tzij. Kan toqaqa k'a chi'ak'u'x ri jikibel-tzij ri xaben qik'in.

²² ¿K'o kami jun chike ri wachibel ri xa man qitzij dios ta, ri nitikir ta nuya-pe job? ¿Ja kami ri kaj ri niya'on-pe ri job? ¡Ni, Jehová ri qa-Dios roj! Xaxe rat ri yaya'on-pe ri job, ja rat ri yabanon re ronojel re'. Roma ri' ronojel niqoyobej awik'in rat, xicha' chire.