Wuj Richin ri Jeremías 13 - Kaqchiquel Bible

Ri nuk'exewachuj ri ximibel-rupan ri Jeremías

¹ Ri Jehová xubij chuwe chi tinbenloq'o' jun ximibel-nupan ri banon rik'in lino y tinkusaj y man tinch'ej.

² Yin xinloq' k'a ri ximibel ri' y xinxim nupan rik'in.

³ K'ari' ri Jehová xch'on chik jun bey wik'in y xubij chuwe chi

⁴ yin yibe pan Éufrates richin ninya' kan chiri' ri ximibel-nupan, chiri' chupan jun abej ri akuchi ch'aratajineq juba' y k'ari' nintz'apej kan.

⁵ K'ari' yin xibe chiri' y xinwewaj kan, achi'el xubij ri Jehová chuwe.

⁶ Toq ik'owineq chik k'iy q'ij ri Jehová xubij chik chuwe chi yibe chik pa Pará richin ninbenk'ama' ri ximibel ri nuya'on kan chiri'.

⁷ K'ari' yin xipe y xink'ot rupan ri abej ri'. Jak'a toq xinwil-pe ri ximibel, xa q'ayineq chik y man jun chik nik'atzin wi.

⁸ K'ari' ri Jehová xch'on chik wik'in y xubij chuwe:

⁹ Kere' k'a xtinben richin chi yek'is ri awinaq aj-Judá y ri aj-Jerusalem roma ri kinimirisanen.

¹⁰ Re tinamit re' kijachon-ki' chubanik etzelal y kan man xkajo' ta xkinimaj ri ninbij yin. Kan xkiben ri rurayibel ri kánima y kan xekitzeqelibej k'a ch'aqa' chik dios, richin chi man yinkisamajij ta yin y man nikiya' ta nuq'ij. Roma ri' kan xtinben chike achi'el ri ximibel, ri man jun chik nik'atzin-wi.

¹¹ Yin kan xenxim ri tinamit Israel y ri Judá, achi'el toq jun achin nuxim-ok kow ri ximibel-rupan. Keri' xinben kik'in richin yek'oje-pe naqaj wik'in, richin chi ye'ok nutinamit y nikiq'alajirisaj ta ri nubi'. Y kan ja ta rije' ri e nuruwaq'ijaj y e nuk'ojlemal. Jak'a xa man xinkinimaj ta.

¹² Roma ri' ri Dios xubij chuwe chi tinbij chike ri nuwinaq chi tikinojisaj kan chi vino ronojel kibojo'y. Y rije' xkibij chuwe: ¿Man qetaman ta kami roj niqanojisaj chi vino ri qabojo'y?, xecha' chuwe.

¹³ Y ri Dios xubij chuwe chi kere' tinbij chike: Rix aj-Judá ix achi'el ri bojo'y ri' y kan xtinq'ej k'a pe ri woyowal pan iwi'. Y rix kan xkixbiyin achi'el q'abarela', chuqa' ri i-rey rijatzul kan ri David, ri i-sacerdote, ri nikibananej chi e q'alajirisey nuch'abel y konojel ri ek'o pa Jerusalem.

¹⁴ Chirij re' yin kan xtinben k'a chiwe achi'el toq nikipaxij-ki' ri bojo'y. Y k'ari' xkixwulex iwonojel, nitiker-el kik'in ri rijita'q taq winaqi' y napon k'a kik'in ri taq kokoj alk'ualaxela'. Y yin man xkixinpoqonaj ta rix, jak'a kan xkixink'is y man xtinjoyowaj ta iwech, nicha' ri Jehová.

Ri aj-Judá ye'uk'uex-el pa ximonri'il

¹⁵ Yin xinbij: Rix aj-Judá, tiya' ixikin y tiwak'axaj jebel ri ruch'abel ri Jehová y man k'a tinimirisaj-iwi'.

¹⁶ Tiya' ruq'ij ri Jehová ri qa-Dios, roma wi man niben ta keri', nuteq-pe jun q'equ'm pan iwi' richin nipajk'ij iwaqen y ri saqil ri iwoyoben rix, rija' xa xtuben q'equ'm chire.

¹⁷ Roma wi rix man xkixniman ta, yin kan xkinoq'. Kan xtibiyin k'a ri ruya'al taq nuwech, roma kan xkixuk'uex-el pa ximonri'il, rix ri ix tzobaj richin ri Jehová, xicha'.

¹⁸ Y ri Dios xuya' k'a jun rutzijol chuwe richin chi ninbij chiwe: Rat rey y ri ate', k'o chi niya' kan ri itz'uyubal y tiwelesaj ri i-corona, roma ri ajawaren kan xtelesex pan iq'a'.

¹⁹ Konojel ri tinamit ri ek'o pa xaman, xsutix yan kij y man jun achike ri nitikir ri niq'ax. Ri winaqi' aj-Judá xke'uk'uex-el pa ximonri'il y kan man jun ri xtik'oje' kan.

²⁰ Kixtzu'un-q'anej kere' pa xaman y titz'eta' jebel ri achike ri e peteneq. Rix ri ix aj-raqen, ¿akuchi ek'o-wi ri tzobaj winaqi' ri xinya' pan iq'a' ri kan roma ri' inimirisan-iwi'?

²¹ ¿Y achike ta k'a xtibij rix aj-Jerusalem, toq k'o chi niq'at-tzij pan iwi' koma ri winaqi' ri xa ja rix ri xixtijon kichin? Kan jari' toq xtipe q'axo'n pan iwi' achi'el toq niq'axon jun ixoq ri royoben alanik.

²² Y wi xtik'utuj-qa achike roma kere' xik'uluwachij y kan xiya' ik'ix roma xixch'anabex y kan xkiqasaj iq'ij rik'in uchuq'a', xa roma ri nimalej taq imak.

²³ ¿Nitikir kami jun wineq q'eq, nok ta seq? ¿Nitikir kami jun balma nrelesaj-el ri taq seq'eseq ri ek'o chirij? Rix chuqa' winaqi' aj-Judá, man yixtikir ta chik niben ri utz, roma kan ruk'ulun chik chiwe richin niben ri etzelal.

²⁴ Roma ri' kan xkixintaluj-el achi'el ri páxa ri ruk'uan-el kaq'iq' ri nipe pa tz'iran ruwach'ulew.

²⁵ Kere' k'a xtik'uluwachij rix. Jare' k'a ri k'atzinel richin niban iwik'in rix. Yin Jehová ri yibin. Roma kan xinimestaj kan y xikuquba' ik'u'x kik'in wachibel ri xa man e qitzij ta.

²⁶ Y roma ri' yin chuqa' kan xkixinch'anaba' richin xkixinya' pa k'ixbilal.

²⁷ Kan nutz'eton ri itzel irayibel, achi'el nikiben ri achi'a' y ri ixoqi' ri nikikanola-ki' richin yemakun, kan nutz'eton k'a ri ruk'ixbilal ri ik'aslen, ri itzel taq ibanobal ri niben pa ruwi' ko'ol taq juyu' y pa taq juyu'. Roma ri' toq'ex iwech rix aj-Jerusalem ¿K'a janipe' k'a nich'ajch'ojirisaj-iwi'?, xcha' ri Jehová.