Wuj Richin ri Esdras 7 - Kaqchiquel Bible

Ri Esdras y ri e kachibil xe'apon pa Jerusalem

¹ Ik'owineq chik k'a ronojel re', chupan ri q'atbel-tzij richin ri Artajerjes rey richin Persia, chi xjote-el pa Babilonia ri Esdras ri ruk'ajol kan ri Seraías, ri ruk'ajol kan ri Azarías, ri ruk'ajol kan ri Hilquías,

² ri ruk'ajol kan ri Salum, ri ruk'ajol kan ri Sadoc, ri ruk'ajol kan ri Ahitub,

³ ri ruk'ajol kan ri Amarías, ri ruk'ajol kan ri Azarías, ri ruk'ajol kan ri Meraiot,

⁴ ri ruk'ajol kan ri Zeraías, ri ruk'ajol kan ri Uzí, ri ruk'ajol kan ri Buquí,

⁵ ri ruk'ajol kan ri Abisúa, ri ruk'ajol kan ri Finees, ri ruk'ajol kan ri Eleazar, ri ruk'ajol kan ri Aarón, ri nimalej sacerdote.

⁶ Re Esdras re' xjote-el pa Babilonia. Rija' jun aj-tz'ib ri kan nucha-ruk'u'x chire ri rupixa' ri Jehová Dios richin Israel ri rujachon chire ri Moisés. Y ri rey kan xuya' ronojel ri achike xuk'utuj rija', roma ri ruq'a' ri Jehová ri ru-Dios kan k'o k'a pa ruwi' ri Esdras.

⁷ Y chupan ri juna' wuqu' toq niq'aton-tzij ri rey Artajerjes, xebe rik'in ri Esdras pa Jerusalem jun tzobaj israelita, ch'aqa' e sacerdote, e levita, e bixanela', ri e kijatzul ri yechajin ri ruchi' ri rachoch ri Dios y chuqa' ri kijatzul ri xesamej chiri'.

⁸ Y xe'apon k'a pa Jerusalem chupan ri ro' ik' chupan ri juna' wuqu' toq niq'aton-tzij ri rey Artajerjes.

⁹ Xe'el k'a pe pa Babilonia ri nabey q'ij richin ri nabey ik' chire ri juna', y xe'apon chi'anin pa Jerusalem ri nabey q'ij chire ri ro' ik', roma ri ruq'a' ri Dios kan k'o pa kiwi' rije',

¹⁰ roma ri Esdras kan xucha' ruk'u'x richin xunik'oj ri pixa' ri xuya' ri Jehová chike, chuqa' xuben ri nubij y xucha' chuqa' ruk'u'x richin yerutijoj ri ruwinaq.

¹¹ Kere' k'a rubanik ri wuj ri xuteq ri rey Artajerjes chire ri sacerdote Esdras, tz'ibanel ri kan jebel tijon chupan ronojel ri ruchojmilal y ri pixa' ri xya'ox chire ri Moisés roma ri Jehová:

¹² Yin, Artajerjes, rey kichin ri e rey, ninteq rubixik re' chawe Esdras sacerdote y tz'ibanel ri k'o awetamabal rik'in ri pixa' ri xuya' ri Dios ri rajaw ri kaj. K'o ta uxlanibel-k'u'x awik'in.

¹³ Yin kan ninbij chi konojel ri awinaq ri ek'o chuxe' ri nuq'atbel-tzij yin, y chuqa' ri e sacerdote y ri e levita; wi nikajo' yebe chawij pa Jerusalem, utz yebe.

¹⁴ Roma yin y ri e wuqu' nupixabanela' yatiqateq-el richin chi yabe pa ruwach'ulew Judá y pa tinamit Jerusalem. Yabe k'a richin nabetz'eta' wi nibanatej achi'el rubin ri i-Dios.

¹⁵ Y chuqa' tik'uaj-el ri saqipueq y ri q'anapueq ri qasujun chawe rik'in ronojel qánima chire ri i-Dios, ri ki-Dios ri tinamit Israel, ri k'o pa Jerusalem.

¹⁶ Y tik'uaj chuqa' ronojel ri saqipueq y ri q'anapueq ri xtisipex-el chiwe pa ruwach'ulew Babilonia, y chuqa' xabachike sipanik ri kiya'on-apo ri iwinaq y ri e sacerdote, richin ri rachoch ri i-Dios ri k'o pa Jerusalem.

¹⁷ Y rik'in re méro re' tiloq'o' k'a nima-alaji' achija' taq wákix, achija' taq karne'l, alaji' taq karne'l, sipanik richin jalajoj ruwech ixin y sipanik richin vino. Y ronojel re' kan xtisuj pa ruwi' ri porobel chiri' pa rachoch ri i-Dios ri k'o pa Jerusalem.

¹⁸ Y rik'in ri saqipueq y ri q'anapueq ri man xk'is ta, tabana' achike niqa' chawech rat y ri awach'alal, y achi'el ri rurayibel ri i-Dios rix.

¹⁹ Ronojel ri samajibel ri nijach chawe richin ri samaj pa rachoch ri i-Dios, kan taya-apo chire ri i-Dios.

²⁰ Y xabachike chik ri nik'atzin richin ri rachoch ri i-Dios y ri ruk'amon richin naya-apo, kan taya-apo richin ri nubeyomel yin.

²¹ Yin, ri rey Artajerjes, ninbij chiwe ri ix yakol méro ri ixk'o pa ruwach'ulew ri k'o pa qajbel-q'ij chire ri raqen-ya' Éufrates: K'o chi niya'ox chi'anin ronojel ri nuk'utuj ri sacerdote Esdras, ri tz'ibanel y kan jebel tijon chupan ri pixa' ri ruya'on ri Dios rajaw ri kaj.

²² K'atzinel richin niya' oxk'al wolajuj quintal saqipueq, 350 quintal trigo, 2,200 litro vino, 2,200 litro aceite richin olivo y ri atz'an ri janipe' nrajo' rija'.

²³ Ronojel ri nubij ri Dios ri rajaw ri kaj pa ruwi' ri rachoch, kan tiban chi'anin, richin chi man nipe ta ri ruk'ayewal pa ruwi' ri nuq'atbel-tzij y pa kiwi' ri walk'ual.

²⁴ Y chiwe rix, ninbij richin chi niwetamaj chi konojel ri sacerdote, ri levita, ri bixanela', ri yechajin ri ruchi' ri rachoch ri Dios y ri ch'aqa' chik samajela' chupan ri rachoch rija'; kan man nikitoj ta chuwe ri nikitoj pa ruwi' ri ulew, ri jay, y ri k'ayij.

²⁵ Y rat, Esdras, rik'in ri na'oj ri ruya'on ri a-Dios chawe, ke'akanoj k'a ri yechojmirisan ri yebanatej, y ye'akanoj chuqa' aj-raqen ri nikiq'et-tzij pa kiwi' konojel ri awinaq ri ek'o pa ruwach'ulew ri k'o pa qajbel-q'ij chire ri raqen-ya' Éufrates. Y wi man ketaman ta ri pixa' richin ri a-Dios, tak'utu' chikiwech.

²⁶ Y xabachike k'a ri man xtuben ta ri nubij ri pixa' ri' y ri ruchojmilal ri nuya'on yin, k'o chi niq'at-tzij pa ruwi' chi'anin. Ri aj-raqen ri' xkekiteq kikamisaxik, o xke'elesex-el chupan ri tinamit, o xtelesex kan kiméro, o xkeya'ox pa cárcel, xcha-el ri rey chupan ri wuj.

Ri Esdras nich'on rik'in ri Dios

²⁷ K'ari' ri Esdras xch'on rik'in ri Dios y xubij chire: Janila utz ruwa-aq'ij rat Jehová ri qa-Dios, ri chuqa' ki-Dios ri qati't-qamama'. Rat xaya' pa ránima ri rey, richin niya'ox aq'ij chupan ri awachoch, ri k'o pa Jerusalem.

²⁸ Y xajoyowaj k'a nuwech chuwech ri rey, chikiwech ri rupixabanela' y chikiwech ri e tata'al ri kan k'o janila kiq'ij ri kan e rusamajela' ri rey, xcha' ri Esdras. Y yin, kan xk'oje' wuchuq'a' roma kan xuya' ruq'a' ri Dios pa nuwi'. Xenmol k'a konojel ri e tata'al richin ri tinamit Israel richin chi yebe-el chuwij.